Sagradong Tinago
Usa ka butang nga naggikan sa Diyos, gihimong tinago hangtod sa iyang gitakdang panahon, ug ipadayag lamang ngadto kanilang iyang gipili nga ipahibalo kini.
Ang Gregong pulong nga my·steʹri·on, nga gihubad nga “sagradong tinago,” pangunang nagtumong sa usa ka butang nga nahibaloan niadtong kinsa nakasinati ug rituwal nga pagsulay aron mahimong membro. Sa karaang misteryosong mga relihiyon nga midagsang sa panahon sa unang Kristohanong kongregasyon, kadtong buot makigbahin sa misteryosong mga selebrasyon kinahanglang moagi sa rituwal nga pagsulay aron mahimong membro; ang wala masulayi dili makaapil sa gitawag nga sagradong mga buhat ug dili makahibalo bahin niini. Kadtong nasulayan niini nailalom sa panaad nga magpakahilom, nga dili mobutyag sa mga sekreto. Hinunoa, gigamit usab kining pulonga sa sekular nga paagi ug ingon man sa “adlaw-adlaw” nga pagkinabuhi, sama nianang sa usa ka pribadong tinago o sekreto, usa ka sekreto tali sa mga higala, ug mga sekreto sa pamilya. Si apostol Pablo migamit sa passive nga porma sa my·eʹo niining ulahing diwa sa dihang siya miingon: “Nakat-onan ko ang sekreto [sa literal, naagian ko ang pagsulay nganha sa mga sekreto] kon unsaon pagkabusog ug kon unsaon pagkagutom, kon unsaon sa pagkinabuhi sa kadagaya ug kon unsaon sa pag-antos sa kawalad-on.”—Flp 4:12.
Lahi Gikan sa Misteryosong mga Relihiyon. Mahitungod sa Gregong pulong nga my·steʹri·on, ang Vine’s Expository Dictionary of Old and New Testament Words nagpatin-aw: “Diha sa [Bag-ong Tugon] kini nagtumong, dili sa usa ka butang nga misteryoso, kondili nianang mahibaloan lamang pinaagi sa pagpadayag sa Diyos, sanglit kini dili matugkad sa kinaiyanhong pagsabot, ug gipahibalo diha sa paagi ug sa panahon nga gitudlo sa Diyos, ug ngadto lamang kanila nga gilamdagan sa Iyang Espiritu. Sa ordinaryong diwa ang usa ka misteryo nagtumong sa usa ka kahibalo nga wala ibutyag; ang Kasulatanhong kahulogan niini maoy kamatuoran nga gibutyag. Busa ang mga termino nga ilabinang nalangkit niini mao ang ‘gipahibalo,’ ‘gipadayag,’ ‘gibutyag,’ ‘giwali,’ ‘nakasabot,’ ‘pag-apod-apod.’”—1981, Tomo 3, p. 97.
Busa, ang mga sagradong tinago sa Diyos ug ang ubang “mga misteryo” sa Bibliya, sama nianang sa Dakong Babilonya, maoy mga butang nga dili magpabiling tinago hangtod sa kahangtoran, kondili igapadayag ni Jehova nga Diyos sa iyang gitakdang panahon ngadto kanilang modangop kaniya ug ngadto kanilang iyang gipili nga ipadayag kini. Si apostol Pablo naghisgot niining butanga diha sa 1 Corinto 2:6-16. Diha niana siya naghisgot bahin sa “sagradong tinago” sa Diyos ingong “natagong kaalam,” nga gipadayag pinaagi sa espiritu sa Diyos ngadto sa iyang Kristohanong mga alagad. Usa kini ka butang nga dili matugkad sa espiritu sa kalibotan o sa tawhanong kaalam sa pisikal nga mga tawo kondili gipamulong ug gisabot niadtong mga ‘naglangkob sa espirituwal nga mga butang sa espirituwal nga mga pulong.’ Una pa niini si Jesu-Kristo namulong ngadto sa iyang mga tinun-an: “Kaninyo gihatag ang sagradong tinago [Gr., my·steʹri·on] mahitungod sa gingharian sa Diyos, apan alang sa mga anaa sa gawas ang tanang butang mahitabo pinaagig mga sambingay, aron nga, bisag nagatan-aw, sila magatan-aw apan dili makakita, ug, bisag nagapamati, sila makadungog apan dili makasabot sa diwa niini, ni mobalik gayod ug sila hatagan ug kapasayloan.”—Mar 4:11, 12; Mat 13:11-13; Luc 8:10.
Ang dakong kalainan tali sa sagradong tinago sa Diyos ug sa mga tinago sa misteryosong mga relihiyon maoy, una sa tanan, sa diwa: ang tinago sa Diyos maoy maayong balita ug dili usa ka bakak o hinimo-sa-tawo nga panglimbong. (Ju 8:31, 32, 44; Col 1:5; 1Ju 2:27) Ikaduha, kadtong gipili aron makasabot sa sagradong tinago sa Diyos kinahanglang dili magtago niini, kondili magmantala ug magpahayag niini kutob sa maarangan. Kini gipadayag, sumala sa nahisgotan na, pinaagi sa paggamit sa Bibliya sa mga termino sama sa “giwali,” ‘gipahibalo,’ ‘gipadayag,’ ug usab ‘nagpahayag,’ ‘nagsulti,’ maylabot sa “sagradong tinago sa maayong balita.” Ang matuod nga mga Kristohanon naghago pag-ayo sa pagpahayag niining maayong balita nga naundan sa pagsabot bahin sa sagradong tinago ngadto “sa tibuok kalalangan ilalom sa langit.” (1Co 2:1; Efe 6:19; Col 1:23; 4:3, 4) Gitino sa Diyos kon kinsa ang mga dili takos ug gililong kanila ang pagsabot. Ang Diyos dili kay mapihigon sa dihang siya nagbuhat niini; kini maoy tungod sa “pagkakubol sa ilang mga kasingkasing” nga tungod niana ang Diyos wala maghatag kanila sa pagsabot bahin sa iyang sagradong tinago.—Efe 4:17, 18.
Nasentro Kang Kristo. Sanglit “ang pagpamatuod bahin kang Jesus maoy nagdasig sa pagpanagna,” kinahanglang masentro kang Kristo ang “sagradong tinago sa Diyos.” (Pin 19:10; Col 2:2) Ang tanang “sagradong mga tinago” sa Diyos nalangkit sa iyang Mesiyanikong Gingharian. (Mat 13:11) Si apostol Pablo misulat ngadto sa mga isigka-Kristohanon: “Maampingong natago diha kaniya ang tanang bahandi sa kaalam ug kahibalo,” ug “diha kaniya nga ang tibuok kabug-osan sa hiyas sa Diyos nagapuyo nga lawasnon.”—Col 2:2, 3, 9.
Si Pablo naghisgot sa iyang kaugalingon ingong gipiyalan sa “sagradong mga tinago sa Diyos.” (1Co 4:1) Siya naghisgot bahin sa pagsabot nga iyang nabatonan labot “sa sagradong tinago bahin kang Kristo.” (Efe 3:1-4) Iyang gipatin-aw nga kining sagradong tinago maoy tinagong kaalam nga gimbut-an daan sa Diyos sa wala pa ang mga sistema sa mga butang. (1Co 2:7) Ang pagpahayag bahin sa misteryo, o sa “sagradong tinago sa Diyos,” nagsugod sa kaugalingong tagna ni Jehova diha sa Genesis 3:15. Sulod sa kasiglohan ang mga tawo sa pagtuo nagpaabot sa “binhi” sa saad nga moluwas sa katawhan gikan sa sala ug kamatayon, apan wala sa tin-aw masabti kon kinsa gayod kini nga “binhi” ug kon sa unsang paagi kini nga “binhi” moabot ug magdalag kaluwasan. Natin-aw lamang kini sa dihang miabot si Kristo ug “naghatag ug kahayag nganha sa kinabuhi ug sa pagkadili-madunoton pinaagi sa maayong balita.” (2Ti 1:10) Unya ang kahibalo maylabot sa misteryo bahin sa ‘binhi sa babaye’ sugod nga nasabtan.
Ang Mesiyanikong Gingharian. Sa mga sulat ni Pablo iyang gihatag ang usa ka bug-os nga larawan sa pagpadayag bahin sa sagradong tinago ni Kristo. Sa Efeso 1:9-11 siya naghisgot sa pagpahibalo sa Diyos bahin sa “sagradong tinago” sa iyang kabubut-on, ug nag-ingon: “Sumala sa iyang gikahimut-an nga gilaraw niya sa iyang kaugalingon ang usa ka pagdumala inig-abot sa kinutoban sa tinudlong kapanahonan, nga mao, aron tigomon pag-usab ang tanang butang diha kang Kristo, ang mga butang sa mga langit ug ang mga butang sa yuta. Oo, diha kaniya, nga nahiusa kaniya kita usab natudlo ingong mga manununod, sa pagkaagi nga kita gimbut-an daan sumala sa katuyoan niya nga nagapalihok sa tanang butang sumala sa gilaraw sa iyang kabubut-on.” Nalangkit niining “sagradong tinago” ang usa ka kagamhanan, ang Mesiyanikong Gingharian sa Diyos. “Ang mga butang sa mga langit,” nga gihisgotan ni Pablo, mao ang umaabot nga mga manununod niana nga langitnong Gingharian uban ni Kristo. “Ang mga butang sa yuta” mao ang yutan-ong mga sakop niini. Gihisgotan ni Jesus ngadto sa iyang mga tinun-an nga ang sagradong tinago maoy maylabot sa Gingharian sa dihang siya miingon kanila: “Kaninyo gihatag ang sagradong tinago mahitungod sa gingharian sa Diyos.”—Mar 4:11.
Naglakip sa Kongregasyon. Adunay daghang bahin ang kahibalo labot sa sagradong tinago. Ang apostol naghatag ug dugang mga detalye sa dihang siya miingon nga ang sagradong tinago naglakip sa kongregasyon, diin ang Ulo niini mao si Kristo. (Efe 5:32; Col 1:18; Pin 1:20) Kini sila mao ang iyang kaubang mga manununod, nga kanila siya magpaambit sa Gingharian. (Luc 22:29, 30) Sila gikuha taliwala sa mga Hudiyo ug mga Hentil. (Rom 11:25; Efe 3:3-6; Col 1:26, 27) Kini nga bahin sa “sagradong tinago” tin-aw lamang nga nahibaloan sa dihang si Pedro gisugo sa pagduaw sa Hentil nga si Cornelio ug nakakita niining Hentil nga panimalay nga nakadawat sa mga gasa sa balaang espiritu, niadtong 36 K.P. (Buh 10:34, 44-48) Sa pagsulat ngadto sa Hentil nga mga Kristohanon, si Pablo miingon kanila: “Kamo sa maong panahon walay Kristo, . . . estranyo sa mga pakigsaad labot sa saad, ug kamo walay paglaom ug mga walay Diyos dinhi sa kalibotan. Apan karon nga nahiusa kang Kristo Jesus kamong kanhi nahilayo nahiduol na pinaagi sa dugo ni Kristo.” (Efe 2:11-13) Pinaagi sa mga pakiglabot sa Diyos uban sa kongregasyon, ‘ang mga kagamhanan ug ang mga awtoridad diha sa langitnong mga dapit’ makahibalo sa “nagkadaiya uyamot nga kaalam sa Diyos.”—Efe 3:10.
Kini nga kongregasyon gipakita diha sa panan-awon sa Pinadayag ngadto kang Juan ingong gilangkoban sa 144,000 ka tawo nga “gipalit gikan sa katawhan ingong mga unang bunga ngadto sa Diyos ug sa Kordero.” Sila nagbarog uban sa Kordero, si Jesu-Kristo, diha sa Bukid sa Zion, ang dapit Pin 14:1, 4; Heb 12:22; 1Cr 29:23; 1Pe 2:4-6) Ang pagkabanhaw nila ngadto sa pagkawalay-kamatayon ug pagkadili-madunoton panahon sa presensiya ni Kristo maoy usa sa mga bahin sa mga pagpakiglabot sa Diyos sa kongregasyon, “usa ka sagradong tinago” mismo.—1Co 15:51-54.
diin nahimutang ang “siyudad sa buhing Diyos, ang langitnong Jerusalem.” Didto sa karaang yutan-ong Jerusalem nahimutang ang “trono ni Jehova,” diin naglingkod diha niana ang mga hari sa linya ni David; diha usab niana nahimutang ang templo ni Jehova. Sa langitnong Jerusalem si Jesu-Kristo naentrono, ug ang iyang maunongong dinihogan sa espiritu nga mga sumusunod nakig-ambit sa pagmando sa iyang Gingharian. (Ang Sagradong Tinago sa Diyosnong Pagkamahinalaron. Si Pablo misulat kang Timoteo: “Nagsulat ako niining mga butanga kanimo, . . . aron ikaw mahibalo kon unsaon nimo paggawi diha sa panimalay sa Diyos, nga mao ang kongregasyon sa buhing Diyos, usa ka haligi ug tukod sa kamatuoran. Sa pagkatinuod, dako gayod ang sagradong tinago niining diyosnong pagkamahinalaron: ‘Siya [si Jesu-Kristo] gipadayag diha sa unod, gipahayag nga matarong diha sa espiritu, nagpakita sa mga manulonda, giwali taliwala sa kanasoran, gituohan dinhi sa kalibotan, gidawat sa itaas diha sa kahimayaan.’”—1Ti 3:14-16.
“Ang kongregasyon sa buhing Diyos” nakabaton sa kamatuoran, ug kini tukmang nahibalo sa misteryo, o sa “sagradong tinago,” bahin sa tinuod nga diyosnong pagkamahinalaron, ug ang kongregasyon dili kay nagbaton sa dagway lamang kondili nagbaton usab sa gahom sa maong diyosnong pagkamahinalaron. (Itandi ang 2Ti 3:5.) Busa kini nagsilbing “haligi ug tukod sa kamatuoran” taliwala sa usa ka kalibotan nga puno sa kasaypanan ug sa bakak nga relihiyon, ‘mga misteryo’ nga sagrado ngadto kang Satanas ug niadtong iyang gibutaan. (2Co 4:4) Si Jesu-Kristo mismo mao ang Usa kansang diyosnong pagkamahinalaron gitagna ug gihubit diha sa inspiradong Hebreohanong Kasulatan. Sulod sa kasiglohan, sukad nga gihagit ang pagkasoberano sa Diyos, diin ang integridad sa tawo gikuwestiyon, kini maoy usa ka misteryo, o “sagradong tinago,” kon bug-os bang mamentinar ang usa ka kompleto, dili-matarog, walay-lama nga diyosnong pagkamahinalaron ni bisan kinsa nga pit-oson sa Yawa. Kinsa, kon aduna man, ang makabarog ilalom sa pagsulay ug mogawas nga hinlo gayod, walay sala, ug wala mabulingi nga naghupot ug bug-os nga pagkamahinalaron kang Jehova? Nalangkit niini mao ang pangutana kon kinsa ang ‘binhi sa babaye’ nga maoy magsamad sa ulo sa Halas. Kini bug-os nga nabutyag sa dihang si Kristo “gipadayag diha sa unod, gipahayag nga matarong diha sa espiritu, nagpakita sa mga manulonda, giwali taliwala sa kanasoran, gituohan dinhi sa kalibotan, gidawat sa itaas diha sa kahimayaan.” (1Ti 3:16; 6:16) Usa gayod kini ka dakong butang. Ang dakong isyu bahin sa diyosnong pagkamahinalaron nasentro diha sa usa ka persona, si Jesu-Kristo. Pagkadako sa kahulogan sa dalan nga gisubay ni Kristo labot sa diyosnong pagkamahinalaron! Kini nakahatag gayod ug kaayohan sa katawhan ug nagbayaw sa ngalan ni Jehova!—Tan-awa ang DIYOSNONG PAGKAMAHINALARON.
Natapos Na. Diha sa panan-awon ni apostol Juan, siya gisultihan: “Sa mga adlaw nga magpatingog ang ikapitong manulonda, sa dihang mohuyop na siya sa iyang trompeta, ang sagradong tinago sa Diyos sumala sa maayong balita nga iyang gipahayag sa iyang mga ulipon nga mga manalagna sa pagkatinuod matapos na.” (Pin 10:7) Ang pagkatapos niini nga sagradong tinago suod nga nalangkit sa paghuyop sa ikapitong manulonda sa iyang trompeta, nga sa paghuyop niini ang pahibalo gihimo didto sa langit: “Ang gingharian sa kalibotan nahimo nang gingharian sa atong Ginoo ug sa iyang Kristo, ug siya magamando ingong hari hangtod sa kahangtoran.” (Pin 11:15) Busa, ang sagradong tinago sa Diyos natapos sa dihang si Jehova nagsugod sa pagpalihok sa iyang Gingharian pinaagi sa iyang Mesiyas, o Kristo. Daghan ang gipamulong ni Jesu-Kristo ngadto sa iyang mga tinun-an, ang “mga ulipon” sa Diyos, bahin sa Gingharian sa Diyos ug miingon nga ang “maayong balita sa gingharian” kinahanglang padayong iwali hangtod sa kataposan (Gr., teʹlos) sa “sistema sa mga butang.” Human nga ‘ang sagradong tinago sa Diyos matapos na,’ ang “maayong balita” nga igawali maglakip sa kon unsay gipahibalo sa mga tingog didto sa langit: “Ang gingharian sa kalibotan nahimo nang gingharian sa atong Ginoo ug sa iyang Kristo.”—Mat 24:3, 14.
Alang sa ‘misteryo sa kalapasan’ (2Te 2:7), tan-awa ang TAWO SA KALAPASAN. Alang sa “Misteryo: ‘Dakong Babilonya’” (Pin 17:5), tan-awa ang DAKONG BABILONYA.