Usa ka administratibong dibisyon sa usa ka gingharian ubos sa pagmando sa usa ka sentrong kagamhanan. (Est 1:16; 2:​3, 18) Ang Bibliya naghisgot ug sakop nga mga distrito maylabot sa Israel, Babilonya, ug Medo-Persia. (1Ha 20:14-19; Est 1:1-3; Dan 3:​1, 3, 30) Ang Hebreohanon ug Aramaikong pulong alang sa “sakop nga distrito” (medhi·nahʹ) naggikan sa lintunganayng berbo nga din, nga nagkahulogang “paghukom.”

Ang manalagnang si Daniel gihimong magmamando sa tibuok sakop nga distrito sa Babilonya, tingali ang pangunang distrito nga naglakip sa siyudad sa Babilonya. (Dan 2:48) Ang iyang tulo ka Hebreohanong mga kauban, si Sadrak, Mesak, ug Abednego, gitudlo usab aron mag-alagad niini nga distrito ingong mga tagdumala. (Dan 2:49; 3:12) Ang Elam mopatim-aw nga laing sakop nga distrito sa Babilonya. (Dan 8:2) Lagmit tungod kay nakapuyo sa sakop nga distrito sa Babilonya, ang gipasig-uli nga destiyerong mga Hudiyo gitawag nga “mga anak sa sakop nga distrito.” (Esd 2:1; Neh 7:6) O, kaha gitawag sila niini tungod sa ilang pagkamolupyo sa Juda nga usa ka sakop nga distrito sa Medo-Persia.​—Neh 1:3.

Panahon sa paghari ni Ahasuero (Jerjes I), ang Imperyo sa Medo-Persia gilangkoban ug 127 ka sakop nga mga distrito, gikan sa India hangtod sa Etiopia. Ang mga Hudiyo nagkatibulaag pagpuyo sa tibuok niining halapad kaayong imperyo. (Est 1:1; 3:8; 4:3; 8:17; 9:​2, 30) Ang yuta sa Juda, nga may kaugalingong gobernador ug segundaryong mga pangulo, maoy usa sa 127 ka sakop nga mga distrito. (Neh 1:3; 11:3) Apan mopatim-aw nga ang Juda maoy bahin sa usa ka mas dako pang politikal nga dibisyon nga gimandoan sa mas taas nga opisyal sa kagamhanan. Lagmit kini nga opisyal mao ang magsang-at sa tanang seryosong mga sumbong ngadto sa hari may kalabotan sa mga distrito nga ubos sa iyang pagmando ug unya magpaabot siya sa awtorisasyon sa hari aron sa paghimog aksiyon. Dugang pa, ang ubos-ubos nga mga opisyal makahangyo nga paimbestigahan ang mga kalihokan sa usa ka sakop nga distrito. (Esd 4:8-23; 5:3-17) Kon duna nay awtorisasyon sa hari, ang sakop nga mga distrito makadawat ug salapi gikan sa harianong tipiganan sa bahandi, ug ang mga mando sa hari ipadala pinaagig mga mensahero ngadto sa nagkalainlaing bahin sa imperyo. (Esd 6:6-12; Est 1:22; 3:12-15; 8:10-14) Busa, ang tanang molupyo sa sakop nga mga distrito sinati sa mga balaod ug mga mando sa sentrong kagamhanan.​—Itandi ang Est 4:11.

Tungod sa sistema nga gigamit sa sakop nga mga distrito sa mga nasod sa kanhing kapanahonan, sagad nalisdan pag-ayo ang mga ginsakpan niini. Kini nga kamatuoran giila sa maalamong magsusulat sa Ecclesiastes (5:8).​—Tan-awa ang LALAWIGAN.