Mga siyudad sa usa ka partikular nga katawhan o tribo nga nahisulod sa teritoryo sa laing tribo. Ang modernong-adlaw nga mga pananglitan sa sakop nga teritoryo naglakip sa kanhing Kasadpang Berlin, nga gilibotan sa teritoryo sa Sidlakang Alemanya, ug ang gipanag-iyang teritoryo nga gihatag ngadto sa Hiniusang Kanasoran, nga anaa mismo sulod sa New York City. Usa ka bahin sa karaang Jerusalem ang nagpabiling sakop sa mga Jebusihanon nga nahimutang sulod sa teritoryo sa Israel sulod sa upat ka siglo hangtod nga sa kataposan nailog kini ni David.​—Jos 15:63; Huk 1:21; 19:​11, 12; 2Sa 5:6-9.

Sa pagbahinbahin sa Yutang Saad taliwala sa 12 ka tribo, may mga siyudad sulod sa teritoryo sa usa ka tribo nga gipanag-iya sa laing tribo. Sumala sa Josue 16:​9, “ang mga anak ni Epraim may sakop [o, “bulag; nahilain”] pa nga mga siyudad sa taliwala sa panulondon sa mga anak ni Manases” (ftn sa Rbi8), buot ingnon, “mga lungsod nga gilain alang sa mga Epraimnon nga nahimutang sulod sa panulondon sa mga anak ni Manases.” (JB; tan-awa usab ang Jos 17:​8, 9.) Ang pipila sa mga anak ni Manases nagpuyo sa mga lungsod sulod sa mga utlanan ni Isacar ug Aser.​—Jos 17:11; 1Cr 7:29.

Ang panulondon ni Simeon maoy mga siyudad nga nahimutang sulod sa teritoryo sa Juda, tungod kay ang pahat ni Juda “dako man kaayo alang kanila.” (Jos 19:1-9; MAPA, Tomo 1, pp. 744, 947) Ang tanang 48 ka siyudad nga gidumala sa mga Levihanon, lakip ang 6 ka siyudad nga dalangpanan, maoy sakop nga mga siyudad nga anaa sa teritoryo sa ubang mga tribo. (Jos 21:3-41) Niining paagiha natuman ang tagna sa himalatyong si Jacob bahin kang Simeon ug Levi, nga ‘sila makabaton ug pahat diha kang Jacob, apan magkatibulaag diha sa Israel.’​—Gen 49:7.