Lagmit usa ka bathala sa kabituonan ingon sa gipakita sa kamatuoran nga ang “Sakut” gihisgotan nga katumbas sa prase nga “ang bituon sa inyong diyos.” (Am 5:26) Kini nga ngalan tinuyong gibutangan ug marka sa bokales diha sa Hebreohanon nga Masoretikong teksto aron litokon nga katumbas sa shiq·qutsʹ, nga nagkahulogang “dulumtanang butang.” Tingali gituohan nga ang Sakut mao si “Sakkut,” ang Babilonyanhong ngalan ni Saturno (usa ka diyos-bituon). Apan sa Gregong Septuagint ang ekspresyong “si Sakut nga inyong hari” mabasa nga “ang tolda ni Molok,” ug si Esteban, nga lagmit nagkutlo sa Septuagint, migamit usab sa mga pulong nga “ang tolda ni Molok.” (Buh 7:43) Kini nagpasabot nga ang “Sakut” lagmit maoy usa ka mabalhinbalhin nga ampoanan, usa ka tolda o balongbalong, diin gibutang ang idolong larawan ni Molok.​—Tan-awa ang ASTROLOGO (Si Molek ug ang Astrolohiya sa Israel).