[Pakigdait].

Usa ka karaang siyudad diin si Melquisedek mao ang hari ug saserdote. (Gen 14:18) Ang Hebreohanong espeling sa “Salem,” ingon sa paglakip niini sa ngalang Jerusalem, nagsugyot nga kini usa ka dual form ug, busa, ang pulong mahubit ingong “Duha-ka-Pilong Pakigdait.” Ang kahulogan niining ngalana ingong “Pakigdait” gikompirmar diha sa inspiradong mga pulong sa Hebreohanon 7:2.

Gituohan sa karaang Hudiyohanong tradisyon nga ang Salem mao ang Jerusalem, ug ang ebidensiya sa Kasulatan nagpaluyo niini. Nahimamat ni Abraham ang hari sa Sodoma ug si Melquisedek didto sa “Ubos nga Patag sa hari.” Sanglit kasiglohan sa ulahi ang anak nga lalaki ni Haring David nga si Absalom nagpatindog ug monyumento didto, kining ubos nga patag lagmit haduol gayod sa  Jerusalem, ang kaulohan sa gingharian. (Gen 14:​17, 18; 2Sa 18:18) Ang pulong nga “Salem,” sa pagkatinuod, gilangkob diha sa ngalang “Jerusalem,” ug gigamit kini sa salmista ingong katumbas sa “Zion.” (Sal 76:2) Dugang pa, haom nga si Melquisedek ang mahimong hari ug saserdote diha sa mismong dapit diin sa ulahi ang mga hari sa Davidnong linya ug ang Levihanong mga saserdote nag-alagad ug diin gihalad si Jesu-Kristo, ang usa nga gipili aron mahimong hari ug saserdote “sa paagi nga sama kang Melquisedek.”​—Heb 3:1; 7:1-3, 15-17.