Usa ka basahon nga mopatim-awng gilangkoban sa lima ka koleksiyon sa sagradong mga awit​—(1) Sal 1-41; (2) 42-72; (3) 73-89; (4) 90-106; (5) 107-150​—nga ang matag koleksiyon gitapos pinaagig pagdayeg nga gipahayag alang kang Jehova. Sukad pa sa karaang kapanahonan, dayag nga ang indibiduwal nga salmo aduna nay numero sumala sa tagsatagsa ka dapit niini diha sa basahon. Pananglitan, ang gitawag karon nga “ikaduhang salmo” gitawag usab sa ingon niadtong unang siglo K.P.​—Buh 13:33.

Estilo. Ang mga balak sa basahon sa Mga Salmo gilangkoban ug paralelismo o managsamang mga ideya o mga ekspresyon. (Tan-awa ang HEBREOHANON, II [Hebreohanong Balak].) Talagsaon mao ang mga salmo nga akrostiko, o alpabetiko. (Sal 9, 10, 25, 34, 37, 111, 112, 119, 145) Niini nga mga salmo ang unang bersikulo o mga bersikulo sa unang estansa nagsugod sa Hebreohanong letra nga ʼaʹleph, ang sunod nga (mga) bersikulo sa behth, ug padayon hangtod sa tanan o halos sa tanang letra sa Hebreohanong alpabeto. Kini nga pagkahan-ay tingali nagsilbing tabang sa paghinumdom. Labot sa mga termino nga makaplagan diha sa basahon sa Mga Salmo, tan-awa ang ALAMOT; PAGTUNGAS; GITTITH; HIGGAYON; MAHALATH; MASKIL; MIKTAM; MUTH-LABEN; NEHILOTH; SELAH; SHEMINITH.

Mga Superskripsiyon. Ang mga ulohan, o mga superskripsiyon, nga makaplagan sa sinugdanan sa daghang salmo nagpaila sa magsusulat, naghatag ug detalye sa materyal, nagtaganag musikal nga mga instruksiyon, o nagpaila kon unsay katuyoan sa salmo. (Tan-awa ang mga superskripsiyon sa Sal 3, 4, 5, 6, 7, 30, 38, 60, 92, 102.) Usahay ang mga superskripsiyon nagtagana sa gikinahanglang impormasyon aron makita ang ubang mga teksto nga nagpatin-aw sa usa ka partikular nga salmo. (Itandi ang Sal 51 sa 2Sa 11:2-15; 12:1-14.) Sanglit ang ubang balaknong mga bahin sa Bibliya sagad nga gipaila sa ingon usab nga paagi (Ex 15:1; Deu 31:30; 33:1; Huk 5:1; itandi ang 2Sa 22:1 sa superskripsiyon sa Sal 18), kini nagpakita nga ang mga superskripsiyon naggikan sa mga magsusulat o kaha sa mga tighipos sa mga salmo. Ingong pamatuod niini, sukad pa sa pagsulat sa Linukot nga Basahon sa Mga Salmo sa Patayng Dagat (gipetsahan tali sa 30 ug 50 K.P.) ang mga superskripsiyon maoy bahin na sa pangunang teksto.

Mga Magsusulat. Sa 150 ka salmo, ang mga superskripsiyon nagpakita nga ang 73 niini iya ni David, 11 iya sa mga anak nga lalaki ni Kore (usa niini [Sal 88] naghisgot usab kang Heman), 12 iya ni Asap (dayag nga nagtumong sa panimalay ni Asap; tan-awa ang ASAP Num. 1), usa iya ni Moises, usa iya ni Solomon, ug usa iya ni Etan nga Ezrahanon. Dugang pa, ang Salmo 72 maoy “bahin kang Solomon” ug dayag nga gisulat ni David. (Tan-awa ang Sal 72:20.) Pinasukad sa Buhat 4:25 ug Hebreohanon 4:7 tin-awng ikahinapos nga ang Salmo 2 ug 95 gisulat ni David. Mopatim-aw nga ang Salmo 10, 43, 71, ug 91 maoy mga sumpay sa Salmo 9, 42, 70, ug 90. Nan, ang Salmo 10 ug 71 ikaingon nga iya ni David, ang Salmo 43 iya sa mga anak nga lalaki ni Kore, ug ang Salmo 91 iya ni Moises. Adunay mga ilhanan nga ang Salmo 119 lagmit gisulat sa batan-ong prinsipe nga si Ezequias. (Tagda ang Sal 119:​9, 10, 23, 46, 99, 100.) Busa adunay kapin sa 40 ka salmo nga wala hinganli o wala ipaila sa espesipiko kon kinsa ang nagtagik.

Ang mga salmo gisulat sulod sa yugtong mga 1,000 ka tuig, sukad sa panahon ni Moises hangtod human makabalik gikan sa pagkadestiyero sa Babilonya.​—Sal 90:Sup; 126:​1, 2; 137:​1, 8.

Paghugpong. Sanglit si David ang nagtagik sa kadaghanan niini ug nag-organisar sa Levihanong mga maghohoni ngadto sa 24 ka grupo sa pag-alagad, makataronganong ihinapos nga siya ang nagsugod sa pagkolekta niini nga mga awit aron gamiton sa sangtuwaryo. (2Sa 23:1; 1Cr 25:1-31; 2Cr 29:25-30) Human niana ang ubang mga koleksiyon dayag nga gihimo, ingon sa masabtan gikan sa pagsubli sa ubang mga awit diha sa basahon. (Itandi ang Sal 14 sa 53; 40:13-17 sa 70; 57:7-11 sa 108:1-5.) Daghang eskolar ang nagtuo nga si Esdras mao ang naghan-ay sa basahon sa Mga Salmo hangtod nga kini nahuman.

Pinasukad sa ebidensiya, dugay nang nakompleto ang mga kaundan sa basahon sa Mga Salmo. Ang pagkasunodsunod ug ang kaundan sa basahon diha sa Gregong Septuagint halos walay kalainan sa Hebreohanong teksto. Busa, makataronganong ikaingon nga ang basahon sa Mga Salmo nakompleto na niadtong ikatulong siglo W.K.P., sa dihang gisugdan kining Grego nga hubad. Ang usa ka tipik sa Hebreohanong teksto nga gigamit niadtong ulahing bahin sa unang siglo K.P. nga naundan sa Salmo 150:1-6 gisundan gilayon sa usa ka blangko nga lindog. Kini mopatim-awng nagpakita nga sa karaang Hebreohanong manuskrito natapos ang basahon sa Mga Salmo diha niana nga seksiyon ug sa ingon kaharmonya usab kini sa Masoretikong teksto.

 Tukmang Pagpreserbar sa Teksto. Ang Linukot nga Basahon sa Mga Salmo sa Patayng Dagat nagtaganag ebidensiya sa tukmang pagkapreserbar sa Hebreohanong teksto. Bisan tuod mas karaan ug mga 900 ka tuig kay sa gidawat sa kadaghanan nga Masoretikong teksto, ang mga kaundan niini nga linukot nga basahon (41 ka kanonikal nga mga salmo, tibuok o sa bahin lamang) halos walay kalainan sa teksto nga gipasukaran sa kadaghanan sa mga hubad. Si Propesor J. A. Sanders miingon: “Kasagaran [sa mga kalainan] maoy ortograpiko o may kalabotan sa mga letra ug mga espeling  ug hinungdanon lamang niadtong mga eskolar nga interesado sa mga paagi sa paglitok sa karaang Hebreohanon, ug sa susamang mga butang. . . . Ang pipila ka kalainan daling makita ingong mga pagpatin-aw sa teksto, ilabina niadtong naghatag ug mas tin-aw nga Hebreohanong teksto apan gamay ra ang kalainan o wala ray kalainan diha sa hubad o interpretasyon.”​—The Dead Sea Psalms Scroll, 1967, p. 15.

Inspirado sa Diyos. Walay duhaduha nga ang basahon sa Mga Salmo maoy bahin sa inspiradong Pulong sa Diyos. Bug-os kini nga nahiuyon sa ubang mga bahin sa Kasulatan. Ang kaamgid nga mga ideya sagad nga makaplagan sa ubang mga bahin sa Bibliya. (Itandi ang Sal 1 sa Jer 17:​5-8; ang Sal 49:12 sa Ecc 3:19 ug 2Pe 2:12; ang Sal 49:17 sa Luc 12:​20, 21.) Dugang pa, daghang kinutlo gikan sa Mga Salmo ang makaplagan diha sa Kristohanon Gregong Kasulatan.​—Sal 5:9 (Rom 3:13); 8:6 (1Co 15:27; Efe 1:22); 10:7 (Rom 3:14); 14:1-3; 53:1-3 (Rom 3:10-12); 19:4 (Rom 10:18); 24:1 (1Co 10:26); 32:​1, 2 (Rom 4:​7, 8); 36:1 (Rom 3:18); 44:22 (Rom 8:36); 50:14 (Mat 5:33); 51:4 (Rom 3:4); 56:​4, 11; 118:6 (Heb 13:6); 62:12 (Rom 2:6); 69:​22, 23 (Rom 11:​9, 10); 78:24 (Ju 6:31); 94:11 (1Co 3:20); 95:7-11 (Heb 3:7-11, 15; 4:3-7); 102:25-27 (Heb 1:10-12); 104:4 (Heb 1:7); 112:9 (2Co 9:9); 116:10 (2Co 4:13); 144:3 (Heb 2:6), ug uban pa.

Bahin sa iyang kaugalingon si David misulat: “Ang espiritu ni Jehova mao ang misulti pinaagi kanako, ug ang iyang pulong diha sa akong dila.” (2Sa 23:2) Ang maong pag-inspirar gipamatud-an ni apostol Pedro (Buh 1:​15, 16), sa magsusulat sa sulat ngadto sa mga Hebreohanon (Heb 3:​7, 8; 4:7), ug sa ubang unang-siglo nga mga Kristohanon (Buh 4:23-25). Ang labing talagsaon mao ang testimonya sa Anak sa Diyos. (Luc 20:41-44) Human sa iyang pagkabanhaw, siya miingon sa iyang mga tinun-an: “Kini mao ang akong mga pulong nga gisulti ko kaninyo samtang uban pa ako kaninyo, nga ang tanang butang nga nahisulat diha sa balaod ni Moises ug sa mga Manalagna ug sa mga Salmo [ang unang basahon sa Hagiographa, o Balaang mga Sinulat, ug busa nagtumong niining tibuok seksiyon] bahin kanako kinahanglang matuman.”​—Luc 24:44.

Gitagna ang mga kasinatian ug mga kalihokan sa Mesiyas. Ang pagsusi sa Kristohanon Gregong Kasulatan nagpadayag nga daghan ang gitagna diha sa Mga Salmo mahitungod sa mga kalihokan ug mga kasinatian sa Mesiyas, ingon sa ipakita sa mosunod nga mga pananglitan.

Sa dihang mitanyag sa iyang kaugalingon aron magpabawtismo, gipakita ni Jesus nga siya mianhi aron sa pagbuhat sa “kabubut-on” sa iyang Amahan maylabot sa paghalad sa iyang kaugalingong ‘giandam’ nga lawas ug maylabot sa paghanaw sa mga halad nga hayop nga gihalad sumala sa Balaod, ingon sa nahisulat sa Salmo 40:6-8. (Heb 10:5-10) Gidawat ni Jehova ang pagtanyag ni Jesus sa iyang kaugalingon, ug gibubo ang iyang espiritu ibabaw kaniya ug giila siya ingon nga iyang Anak, ingon sa gitagna sa Salmo 2:7. (Mar 1:9-11; Heb 1:5; 5:5) Dugang pa, ingon sa gitagna sa Salmo 8:​4-6, ang tawo nga si Jesus maoy “ubos ug diyutay kay sa mga manulonda.”​—Heb 2:6-8.

Sa panahon sa iyang pagministeryo, siya nagtigom ug nagbansay ug mga tinun-an. Wala niya ikaulaw nga tawgon sila nga iyang “mga igsoon,” ingon sa nahisulat sa Salmo 22:22. (Heb 2:​11, 12; itandi ang Mat 12:46-50; Ju 20:17.) Nahiuyon sa gitagna diha sa Mga Salmo, si Jesus namulong pinaagig mga sambingay (Sal 78:2; Mat 13:35), nagpakitag kadasig alang sa balay ni Jehova pinaagi sa paghinlo niini gikan sa komersiyalismo, ug wala siya magpahimuot sa iyang kaugalingon. (Sal 69:9; Ju 2:13-17; Rom 15:3) Bisan pa niana siya gidumtan nga walay pasikaranan. (Sal 35:19; 69:4; Ju 15:25) Ang ministeryo ni Kristo Jesus alang sa tinuling mga Hudiyo nagpalig-on sa mga saad nga gibungat ngadto sa ilang mga katigulangan ug, sa ulahi, nagpalihok sa katawhan sa mga nasod sa paghimaya ug sa pagdayeg kang Jehova. Kini usab gitagna.​—Sal 18:49; 117:1; Rom 15:​9, 11.

Sa dihang si Jesus misakay sa usa ka nating asno paingon sa Jerusalem, ang panon sa katawhan miabiba kaniya pinaagi sa mga pulong sa Salmo 118:26. (Mat 21:9) Sa dihang ang pangulong mga saserdote ug mga eskriba mitutol sa gisulti sa mga batang lalaki didto sa templo agig pag-ila kang Jesus ingong “ang Anak ni David,” gipahilom ni Jesus ang relihiyosong mga magsusupak pinaagi sa pagkutlo sa Salmo 8:2.​—Mat 21:​15, 16.

Ang basahon sa Mga Salmo nagtagna bahin sa pagbudhi kang Jesus pinaagi sa usa ka suod nga kauban (Sal 41:9; Ju 13:18), ug sumala sa gitagna kini siya pulihan. (Sal 69:25; 109:8; Buh 1:20) Gani gitagna usab ang paghugpong sa mga magmamando (si Herodes ug Poncio Pilato) uban sa mga tawo sa kanasoran (sama sa Romanong mga sundalo) ug sa katawhan sa Israel (Sal 2:​1, 2; Buh 4:24-28) batok kang Jesus, ingon man ang pagsalikway kaniya sa Hudiyong relihiyosong mga magtutukod. (Sal 118:​22, 23; Mat 21:42; Mar 12:​10, 11; Buh 4:11) Ug ang bakak nga mga saksi mitestigo batok kaniya, ingon sa gitagna sa Salmo 27:12.​—Mat 26:59-61.

Sa pag-abot sa dapit nga lansangan kaniya, si Jesus gidalitan ug bino nga gisagolan ug apdo. (Sal 69:21; Mat 27:34) Matagnaong naghisgot sa paglansang mismo, ang salmista misulat: “Gilibotan  ako ug mga iro; gilikosan ako sa panon sa mga mamumuhat ug daotan. Ingon sa usa ka leyon sila nagapaak sa akong mga kamot ug mga tiil.” (Sal 22:16) Ang Romanong mga sundalo nagbahinbahin sa mga besti ni Jesus pinaagig ripa. (Sal 22:18; Mat 27:35; Luc 23:34; Ju 19:24) Ang iyang relihiyosong mga kaaway nagyagayaga kaniya pinaagi sa mga pulong nga gitala sa salmista. (Sal 22:8; Mat 27:41-43) Kay nag-antos sa grabeng kauhaw, si Jesus nangayog mainom. (Sal 22:15; Ju 19:28) Sa makausa pa siya gidalitan ug aslom nga bino. (Sal 69:21; Mat 27:48; Ju 19:​29, 30) Sa dayon na siyang mamatay, si Jesus, nga nagkutlo sa Salmo 22:​1, mipatugbaw: “Diyos ko, Diyos ko, nganong gitalikdan mo ako?” (Mat 27:46; Mar 15:34) Sa dihang mabugtoan na sa iyang gininhawa, siya mikutlo sa Salmo 31:5 nga nag-ingon: “Amahan, sa imong mga kamot itugyan ko ang akong espiritu.” (Luc 23:46) Ingon sa dugang nga gitagna sa salmista, walay usa sa iyang mga bukog ang nabali.​—Sal 34:20; Ju 19:​33, 36.

Bisan tuod gipahiluna sulod sa lubnganan, si Jesus wala biyai sa Hades ni ang iyang unod nadunot, apan siya gibanhaw gikan sa mga patay. (Sal 16:8-10; Buh 2:25-31; 13:35-37) Sa iyang pagkayab sa langit, siya milingkod sa tuong kamot sa Diyos, ug naghulat hangtod nga ang iyang mga kaaway ibutang ingong tumbanan sa iyang mga tiil. (Sal 110:1; Buh 2:​34, 35) Siya usab nahimong usa ka saserdote sa paagi nga sama kang Melquisedek (Sal 110:4; Heb 5:​6, 10; 6:20; 7:​17, 21) ug naghatag ug mga gasa nga mga lalaki. (Sal 68:18; Efe 4:8-11) Ang tanan niini nga mga detalye gitagna diha sa Mga Salmo. Ang pag-abot ni Jesus ingong tigpahamtang ug silot sa Diyos aron sa pagpulpog o pagdugmok sa kanasoran maoy sa umaabot pa. (Sal 2:9; Pin 2:27; 19:​14, 15) Human niana si Kristo ingong Hari magdalag dumalayong mga panalangin ngadto sa iyang maunongong mga ginsakpan. Bisan tuod sa sinugdan gisulat bahin kang Solomon, ang kahubitan sa iyang pagmando diha sa Salmo 72 mapadapat nga mas labaw pa ngadto sa Mesiyas. Kini nga kamatuoran gipamatud-an sa tagna ni Zacarias (9:​9, 10), nga naghisgot usab sa Salmo 72:8 ug gipadapat kang Kristo Jesus.​—Mat 21:5.

Alang sa ubang mga katumanan sa basahon sa Mga Salmo, itandi ang Salmo 45 sa Hebreohanon 1:​8, 9; Pinadayag 19:7-9, 11-15; 21:​2, 9-11.

Labaw Pa kay sa Maanindot nga Balak. Gawas pa sa pagpunting sa umaabot nga mga hitabo, ang Mga Salmo naundan ug daghang butang nga makadasig sa usa ka tawo ug magsilbing giya alang kaniya. Ang Mga Salmo maoy labaw pa kay sa maanindot nga balak. Gilarawan niini kon unsa ang realidad sa kinabuhi​—ang mga kalipay, kagul-anan, kahadlok, ug mga kahigawad. Sa tibuok basahon, makita ang pamatuod sa suod nga relasyon sa mga salmista kang Jehova nga Diyos. Ug gipatugbaw niini ang mga kalihokan ug mga hiyas sa Diyos, nga makaaghat sa pagdayeg ug pagpasalamat kaniya.

Gipakita nga mabatonan ang tinuod nga kalipay tungod sa paglikay sa pagpakig-uban sa mga daotan, sa pagkalipay diha sa balaod ni Jehova (Sal 1:​1, 2), sa pagdangop sa iyang dinihogan (2:​11, 12), sa pagsalig kang Jehova (40:4), sa pagpakitag konsiderasyon sa mga timawa (41:​1, 2), sa pagdawat ug pagtul-id gikan kang Jehova (94:​12, 13), sa pagtuman sa iyang mga sugo (112:1; 119:​1, 2), ug sa pagdawat kaniya ingong Diyos ug Magtatabang (146:​5, 6).

Gitambagan ang usa nga siya angayng mosalig kang Jehova. “Itugyan ang imong palas-anon kang Jehova, ug siya magasapnay kanimo. Dili gayod niya itugot nga matarog ang matarong.” (Sal 55:22; 37:5) Tungod sa maong pagsalig mahanaw ang pagkahadlok sa tawo.​—56:​4, 11.

Gidasig ang paghulat sa Diyos (Sal 42:​5, 11; 43:5) ingon man ang paghupot ug matarong nga sinultihan ug buhat aron ang usa ka tawo makabaton sa pag-uyon sa Diyos. (1:1-6; 15:1-5; 24:3-5; 34:​13, 14; 37:​3, 4, 8, 27; 39:1; 100:2) Gipasiugda ang bili sa maayong kaubanan. (18:​25, 26; 26:​4, 5) Ug gihatag ang tambag sa dili pagkasina sa kauswagan o kalamposan sa daotang mga tawo, kay sila mangahanaw.​—37:​1, 2, 7-11.

Gipakita sa Mga Salmo nga ang mga alagad sa Diyos tukmang makaampo alang sa kaluwasan (Sal 3:​7, 8; 6:4; 35:1-8; 71:1-6), pag-uyon (4:1; 9:13), giya (5:8; 19:12-14; 25:​4, 5; 27:11; 43:3), panalipod (17:8), kapasayloan sa mga sala (25:​7, 11, 18; 32:​5, 6; 41:4; 51:1-9), putli nga kasingkasing, usa ka bag-o ug malig-ong espiritu (51:10), ug sa kahimayaan sa ngalan sa Diyos (115:1). Sila usab makaampo aron sila susihon, dalisayon (26:2), ug hukman (35:24; 43:1), ingon man usab tudloan sa pagkamaayo, pagkamay-salabotan, kahibalo, ug sa mga regulasyon sa Diyos.​—119:​66, 68, 73, 124, 125, 135.

Nagpatugbaw sa mga kalihokan ug mga hiyas sa Diyos. Gipatugbaw sa Mga Salmo ang pagpabili kang Jehova nga Diyos, kansang paglungtad wala ilha sa mga walay salabotan. (Sal 14:1; 19:7-11; 53:1) Si Jehova gipadayag ingong “nahigugma sa pagkamatarong ug sa hustisya” (33:5), usa ka “dalangpanan ug kusog, usa ka katabang nga daling hikaplagan panahon sa mga kasakitan.” (46:1) Siya maoy usa ka matarong nga Maghuhukom (7:11; 9:​4, 8), ang Maglalalang (8:3; 19:1; 33:6), Hari (10:16; 24:8-10), Magbalantay (23:1-6),  ug Magtutudlo (25:​9, 12), ang Magtatagana sa tawo ug sa mga hayop (34:10; 147:9), ang Manluluwas (35:10; 37:​39, 40; 40:17; 54:7), ug ang Tuboran sa kinabuhi (36:9) ug sa kahupayan (86:17), panalangin, ug kusog.​—29:11.

Si Jehova dili “malimot sa pagtuaw sa mga sinakit” (Sal 9:12; 10:14) apan motubag sa mga pag-ampo sa iyang mga alagad (3:4; 30:​1, 2; 34:​4, 6, 17, 18), nga magaganti ug manalipod kanila. (3:​3, 5, 6; 4:​3, 8; 9:​9, 10; 10:​17, 18; 18:​2, 20-24; 33:18-20; 34:22; tan-awa ang 34:7 bahin sa panalipod nga gihimo sa mga manulonda.) Siya nagdumot sa pagkadaotan ug molihok batok sa mga mamumuhat ug daotan.​—5:4-6, 9, 10; 9:​5, 6, 17, 18; 21:8-12; 99:8.

Gipakita nga si Jehova maoy makalilisang (Sal 76:7) ug dako (77:13), apan mapaubsanon (18:35); siya balaan (99:5) ug dagaya sa pagkamaayo (31:19) ug gahom. (147:5) Siya maoy “maluluy-on ug mapuangoron, mahinay sa kasuko ug dagaya sa mahigugmaong-kalulot ug kamatinud-anon.” (86:15) Ang iyang pagsabot dili-ikabatbat (147:5), ug ang iyang mga buhat sa paglalang nagpadayag sa iyang kaalam. (104:24) Iyang giihap ang gidaghanon sa mga bituon ug kining tanan gitawag sa ilang ngalan. (147:4) Makita niya bisan ang binhi sa tagoangkan sa tawo. (139:16) Siya makaayo sa tanang balatian. (103:3) Siya makapahunong sa mga gubat pinaagi sa paglaglag sa mga kasangkapan sa gubat sa kaaway. (46:9) Siya aktibong nalangkit sa daghang hitabo sa kasaysayan aron ipalambo ang iyang matarong nga katuyoan. (44:1-3; 78:1-72; 81:5-7; 105:8-45; 106:7-46; 114:1-8; 135:8-12; 136:4-26) Ang ingon niini nga Diyos takos gayod nga hatagan ug pagdayeg ug mga pasalamat. (92:1; 96:1-4; 146–​150) Ang pagsalig sa mga tawo (60:11; 62:9), sa mga bahandi (49:6-12, 17), o sa mga idolo (115:4-8; 135:15-18) maoy kabuangan.

Naghisgot sa kabililhon sa pulong sa Diyos. Ang Mga Salmo nagtudlo usab ug pagpabili sa pulong sa Diyos. Ang mga pulong ni Jehova gipakita ingong lunsay (Sal 12:6) ug dalisay. (18:30) Ang iyang balaod maoy bililhon (119:72) ug kamatuoran. (119:142) Mahuptan ang dumalayong mga kaayohan tungod sa pagsunod sa iyang hingpit nga balaod, kasaligang mga pahinumdom, matul-id nga mga sugo, mahinlo nga kasugoan, ug sa matarong nga hudisyal nga mga hukom. (19:7-11) Ang pulong sa Diyos nagsilbing banwag sa alagianan sa tawo (119:105), ug ang iyang mga sugo naghimo sa usa ka tawo nga maalamon, naghatag ug hait nga salabotan ug pagsabot.​—119:98-100, 104.

Nagpatin-aw ug nagtaganag dugang impormasyon sa ubang mga teksto. Usahay ang basahon sa Mga Salmo nagpatin-aw o nagtaganag dugang impormasyon sa ubang mga bahin sa Bibliya. Gipakita niini nga ang ‘pagsakit sa kalag,’ sama sa gibuhat sa mga Israelinhon sa Adlaw sa Pagtabon-sa-Sala (Lev 16:29; 23:27; Num 29:7), nagtumong sa pagpuasa. (Sal 35:13) Ang salmista lamang ang nag-asoy bahin sa grabeng pagpit-os nga naagoman ni Jose sa sinugdan samtang nabilanggo sa Ehipto: “Pinaagi sa mga talikala gipasakitan nila ang iyang mga tiil, gibutang sa talikala nga puthaw ang iyang kalag.” (105:18) Gikan sa Mga Salmo atong nahibaloan nga “ang tinudlo nga mga panon sa manulonda” maoy nagpadangat ug mga hampak batok sa Ehipto (78:44-51) ug nga, didto sa kamingawan, ang milagrosong gitagana nga tubig “midagayday agi sa walay-tubig nga mga rehiyon ingon nga usa ka suba” (105:41), sa ingon nagtaganag dagaya ug daling mabatonang suplay sa tubig alang sa nasod sa Israel ug sa ilang daghang binuhi nga mga hayop. Ang Mga Salmo naghatag ug ebidensiya nga si Paraon mismo namatay didto sa Pulang Dagat.​—136:15.

Ang Mga Salmo nagpakita nga ang mga Israelinhon nakaagom ug mga kapildihan ug hilabihang kalisdanan sa wala pa nila mapildi ang mga Edomhanon didto sa Walog sa Asin. (Sal 60:Sup, 1, 3, 9) Gipunting niini nga ang mga Edomhanon misulong sa Juda samtang ang nasod nakiggubat didto sa A batok sa kasundalohan ni Aram-naharaim ug Aram-Zoba.

Ang Salmo 101 nagpadayag sa paagi ni David sa pagdumala sa mga kalihokan sa estado. Gipili ni David ang mga tawo lamang nga matinumanon ingong iyang mga alagad. Dili siya makaagwanta sa mga tawong mapahitas-on ug wala siya mokonsentir sa pagbutangbutang. Sa adlaw-adlaw siya matinguhaon kon sa unsang paagi masilotan ang mga daotan.

[Kahon sa panid 1058]

MGA PANGUNANG PUNTO SA MGA SALMO

Usa ka hugpong sa 150 ka sagradong mga awit, nga ang kadaghanan niini maoy pinasukad sa personal nga mga kasinatian ni David ug sa ubang mga alagad ni Jehova

Gisulat sulod sa yugtong mga 1,000 ka tuig, sugod sa panahon ni Moises ug hangtod nga human na makabalik ang mga Hudiyo gikan sa pagkadestiyero sa Babilonya

Mga pahayag sa pagpasalamat ug pagdayeg kang Jehova

Tungod sa pagkadako sa iyang ngalan (99:3; 113; 148:​13, 14)

Tungod sa iyang dagkong mga buhat sa paglalang (33:​1-9; 148:1-12)

Sanglit siya mao ang Dakong Magbalantay (23)

Tungod kay siya nagatubag sa mga pag-ampo (21:1-7; 28; 116; 118:21)

Tungod sa iyang posisyon (50; 95:1-7; 96:4-13; 97; 150)

Tungod sa mga pagluwas gikan sa mga kaaway ug gikan sa malisod nga mga kahimtang (18; 30; 107; 140; 149)

Tungod sa iyang matarong nga mga paghukom (67:​3, 4; 98)

Tungod sa iyang personal nga mga hiyas (57:9-11; 92; 100; 108:1-4; 117; 138:​1, 2)

Tungod sa iyang dagayang mga tagana (37:25; 67:5-7; 145:​15, 16)

Natukmod tungod sa iyang mga pagpakiglabot kanhi sa iyang katawhan (66; 81; 105; 106; 126; 136:10-24; 147)

Mga hangyo alang sa kaluoy ug tabang sa Diyos

Aron luwason gikan sa mga kaaway (3-5; 7; 12; 13; 17; 31; 59)

Aron pasayloon ang mga sala (19:​12, 13; 25:​7, 11; 32; 51:​1, 2, 7-15; 130)

Aron magiyahan maylabot sa panggawi (119:124, 125; 143:​8, 10)

Aron palig-onon panahon sa pagkasakit ug sa katalagman (41:1-4)

Aron pakitaag kaluoy sa dihang makasinatig kasakitan (6:​2, 9; 9:​13, 14; 123)

Mga tagna nga natuman diha sa Mesiyas

Siya naggikan sa harianong linya ni David (89:​3, 4, 29, 36, 37; 132:11)

Kasibot alang sa balay ni Jehova naglamoy kaniya (69:9)

Siya misulti pinaagig mga sambingay (78:2)

Siya gibudhian sa usa ka suod nga higala (41:9; 55:12-14)

Gipaila ang paagi sa pagpatay kaniya (22:​16, ftn sa Rbi8)

Siya gipakaulawan ug gipasipalahan (22:6-8; 69:9)

Giripahan ang iyang besti (22:18)

Siya gihatagan ug suka aron imnon (69:21)

Walay usa sa iyang mga bukog ang nabali (34:20)

Siya gibangon gikan sa Sheol (16:10)

Ang bato nga gisalikway sa mga magtutukod nahimong pangulong bato sa pamag-ang (118:22)

Siya misaka sa kahitas-an, nagtaganag mga gasa nga mga lalaki (68:18)

Siya gihimaya ug gihatagan ug kagahom ibabaw sa tanang butang (8:5-8)

Siya nahimong hari (2:6; 110)

Siya maglaglag sa mga nasod nga nakigbatok kaniya (2:​8, 9; 45:3-5)

Siya may harianong kaminyoon; siya magtudlog mga prinsipe sa yuta (45:​2, 6-17)

Ang iyang pagmando ibabaw sa yuta maoy matarong ug kini magpakitag kaluoy (72)

Pangunang mga doktrina sa Bibliya nga makita sa basahon sa Mga Salmo

Ang mga hiyas sa matuod nga Diyos (78:​38, 39; 83:18; 86:15; 90:1-4; 102:24-27; 103; 139)

Soberanya ni Jehova (11:4-7; 24:1; 29; 44; 47; 48; 76; 93)

Pagbalaan sa ngalan sa Diyos (79; 83)

Ang tanang tawo makasasala (14:1-3; 51:5; 53:1-3)

Ang kabuangan sa idolatriya (115:4-8; 135:15-18)

Ang kahimtang sa mga patay (6:5; 88:10-12; 115:17; 146:4)

Ang yuta maoy usa ka dumalayong puloy-anan sa mga matarong (37:9-11, 29; 104:5; 115:16)

Inspiradong tambag nga motabang kanato nga mabatonan ang pag-uyon ni Jehova

Kahadloki si Jehova ug sunda ang iyang mga sugo (112:1-4; 128)

Ugmara ang dakong pagpabili sa mga pulong sa Diyos, sa iyang balaod (1:2; 19:7-11; 119)

Salig kang Jehova (9:10; 115:9-11; 125; 146:5-7)

Mapailobong maghulat kaniya sa paghimog aksiyon (42; 43)

Pangitaa ang kalinaw ug pagkamatarong (34:​14, 15)

Pabilhi pag-ayo ang pagpakig-uban sa katawhan sa Diyos, ang pagkaanaa sa Iyang balay (84; 122; 133)

Likayi ang daotang mga panagkauban (1:1; 26:​4, 5; 101:3-8)

Tudloi ang mga anak bahin sa mga pakiglabot ni Jehova (78:3-8)

Isulti ang kamatuoran; likayi ang pagbutangbutang ug ang bakak nga mga panumpa (15:​2, 3; 24:3-5; 34:13)

Tumana ang imong pulong, bisan kon kini daotan alang kanimo (15:4)

Likayi ang sayop nga paggamit sa salapi (15:5)

Pagkamahinatagon magdalag mga panalangin ngadto sa maghahatag (112:5-10)

Dayega si Jehova diha sa katilingban (26:​7, 12; 40:9)