[lagmit gikan sa lintunganayng pulong nga Heb. nga nagkahulogang “kalinaw”].

1. Ang pagtandi sa Mateo 27:56 sa Marcos 15:40 mahimong magpakita nga si Salome mao ang inahan sa mga anak nga lalaki ni Zebedeo​—si Santiago ug Juan, kinsa mga apostoles ni Jesu-Kristo. Gihisgotan sa nahaunang teksto ang duha sa mga Maria, nga mao, si Maria Magdalena ug si Maria nga inahan ni Santiago (nga Gamay) ug ni Joses; ug uban niini nila kini naghisgot usab sa inahan sa mga anak nga lalaki ni Zebedeo nga diha nianang tungora sa paglansang kang Jesus; samtang gihisgotan usab sa ulahing teksto nga ang babayeng kauban sa duha ka Maria mao si Salome.

Sumala sa susamang mga pasikaranan, gituohan nga si Salome mao ra usab ang unodnong igsoon ni Maria, ang inahan ni Jesus. Mitungha kini nga panghunahuna tungod kay kining duha ka Maria parehong ginganlan sa kasulatan sa Juan 19:​25, si Maria Magdalena ug ang “asawa ni Clopas” (giisip sa kadaghanan nga mao ang inahan ni Santiago nga Gamay ug ni Joses), ug usab nag-ingon: “Apan duol sa estaka sa pagsakit ni Jesus, nagtindog didto ang iyang inahan ug ang igsoong babaye sa iyang inahan.” Kon kini nga teksto (gawas sa paghisgot sa inahan ni Jesus) nagpunting sa mao rang tulo ka tawo nga gihisgotan ni Mateo ug Marcos, kini magpakita nga si Salome mao ang igsoon sa inahan ni Jesus. Sa laing bahin, ang Mateo 27:55 ug Marcos 15:​40, 41 nag-ingon nga dihay daghang uban pang mga babaye nga miuban kang Jesus nianang tungora, ug busa si Salome lagmit kauban nila.

Si Salome maoy usa ka tinun-an ni Ginoong Jesu-Kristo, ug lakip sa mga babayeng miuban kaniya ug mialagad kaniya ginamit ang ilang mga kabtangan, ingon sa gipakita ni Mateo, Marcos, ug Lucas (8:3).

Kon tukma nga siya ang inahan sa mga anak nga lalaki ni Zebedeo, siya mao ang usa nga miduol kang Jesus nga naghangyo nga ang iyang mga anak katagan-an ug mga lingkoranan sa tuo ug sa wala ni Jesus diha sa iyang Gingharian. Gihubit ni Mateo nga ang inahan maoy naghangyo, samtang gipakita ni Marcos nga si Santiago ug si Juan mao ang naghimo niana. Dayag nga ang mga anak mao ang nagtinguha ug nag-agni sa ilang inahan nga maoy mohangyo. Kini gisuportahan sa asoy ni Mateo nga, sa pagkadungog bahin sa maong hangyo, ang ubang mga tinun-an nasuko, dili sa inahan, apan sa duha ka magsoon.​—Mat 20:20-24; Mar 10:35-41.

Sa pagbanagbanag sa ikatulong adlaw human sa kamatayon ni Jesus, si Salome maoy lakip sa mga babaye nga miadto sa lubnganan ni Jesus aron haplasan ang iyang lawas ug mga yerbang-paalimyon, apan ilang nakita nga ang bato giligid na ug, sa sulod sa lubnganan, usa ka manulonda ang mipahibalo kanila: “Gibangon na siya, wala na siya dinhi. Tan-awa! Ang dapit nga ilang gipahilunaan kaniya.”​—Mar 16:1-8.

2. Usa ka anak nga babaye ni Herodes Felipe ug ang bugtong nga anak sa iyang inahan nga si Herodias. Paglabay sa panahon, si Herodes Antipas nakigminyo sa inahan ni Salome, nga nag-agaw kaniya gikan kang Felipe nga iyang igsoon sa amahan pinaagig pagpanapaw. Sa hapit na ang Paskuwa sa 32 K.P., si Antipas naghikay ug panihapon didto sa Tiberias aron sa pagsaulog sa iyang adlawng-natawhan. Iyang gidapit ang prinsesang si Salome, nga karon iya nang hinablos, aron mosayaw atubangan sa mga dinapit, nga naglakip sa “iyang mga tawong taas-ug-ranggo ug sa mga komandante militar ug sa mga kadagkoan sa Galilea.” Nahimuot pag-ayo si Herodes sa pagsayaw ni Salome nga tungod niana iyang gisaaran siya nga ihatag kaniya ang bisan unsa nga iyang pangayoon​—kutob sa katunga sa iyang gingharian. Pinaagi sa  sugyot sa iyang daotang inahan, gihangyo ni Salome nga ihatag ang ulo ni Juan nga Tigbawtismo. Bisag naguol si Herodes, “tungod sa pagtamod sa iyang mga panumpa ug tungod niadtong nanghirag uban kaniya nagmando nga kini ihatag; ug iyang gipaadtoan ug gipapunggotan sa ulo si Juan didto sa bilanggoan. Ug ang iyang ulo gidala diha sa usa ka bandihado ug gihatag sa dalaga, ug gidala niya kini sa iyang inahan.”​—Mat 14:1-11; Mar 6:17-28.

Bisan tuod nga wala hisgoti ang iyang ngalan diha sa Kasulatan, kini napreserbar diha sa mga sinulat ni Josephus. Gihisgotan usab ni Josephus nga si Salome wala makabaton ug anak sa dihang siya naminyo sa magmamando sa distrito nga si Felipe, nga laing igsoon-sa-amahan ni Herodes Antipas. Human sa kamatayon ni Felipe, ang asoy ni Josephus nag-ingon nga si Salome nakigminyo sa iyang ig-agaw nga si Aristobulo ug nanganak kaniya ug tulo ka anak nga lalaki.