[gikan sa Akadianhon, nga nagkahulogang “Si Sin [ang diyos-bulan] Nakaluwas”].

Usa ka Horonhon (nga nagkahulogang usa ka pumoluyo sa Bet-horon o sa Horonaim) nga misupak sa mga paningkamot ni Nehemias sa pag-ayo sa paril sa Jerusalem. (Neh 2:10) Siya gituohan nga mao ang Sanbalat nga gihisgotan diha sa usa ka papiro nga nakaplagan sa Elephantine sa Ehipto, nga diha niini gipaila ang usa ka tawo nga nagbaton sa maong ngalan ingong gobernador sa Samaria ug ang amahan ni Delaias ug Selemias.

Uban ni Tobias ug Gesem, giyubit ni Sanbalat ang mga Hudiyo ug giakusahan sila nga mirebelde batok sa hari sa Persia. (Neh 2:19; 4:1) Samtang nagpadayon ang buluhaton sa pagpang-ayo, siya ug ang ubang mga magsusupak nagkunsabo sa pagpakig-away batok sa Jerusalem. Apan ang bisan unsang mga paningkamot nga ilang gihimo labot niini wala molampos, kay ang mga Hudiyo misalig kang Jehova ug nagbutang ug mga bantay. (Neh 4:7-9) Human masampongi ang mga gawang diha sa paril sa Jerusalem, si Sanbalat ug ang uban pa sublisubling nag-awhag kang Nehemias nga mopahilayo sa siyudad. Sa dihang kini napakyas, siya ug si Tobias nagsuhol ug usa ka Hudiyo sa paghadlok kang Nehemias aron siya motago sa templo ug makasala. Apan sila wala molampos.​—Neh 6:1-14.

Sa ulahi, sa iyang pagbalik human mibiya sa Jerusalem, nakaplagan ni Nehemias nga ang usa ka apo nga lalaki sa Hataas nga Saserdoteng si Eliasib nahimong umagad nga lalaki ni Sanbalat. Busa giabog ni Nehemias kini nga apo.​—Neh 13:​6, 7, 28.