[gikan sa Aramaiko, ug nagkahulogang “Matahom”].

Ang asawa ni Ananias. Siya mihimog pakigkunsabo sa iyang bana nga misangpot sa ilang kamatayon. Sama sa ubang mga Kristohanon sa Jerusalem nga nagbaligya sa ilang yuta aron makasapal sa dinaliang panginahanglan nga mitungha human sa Pentekostes sa 33 K.P., gibaligya usab nila ang ilang yuta, apan sa pagkasalingkapaw nagpakaaron-ingnon nga ilang gihatag ang tibuok halin niini ngadto sa mga apostoles.

Nahimong sad-an si Ananias ug Sapira, dili tungod kay wala nila ihatag ang tibuok halin sa gibaligyang kabtangan, kondili sila namakak sa pag-ingon nga gihatag nila ang tibuok halin, dayag nga aron madawat ang pasidungog sa mga tawo inay nga pasidunggan ang Diyos ug mohimog kaayohan alang sa iyang kongregasyon. Ilalom sa pag-inspirar sa balaang espiritu, ang ilang pagpanglimbong giyagyag ni Pedro. Siya miingon: “Ananias, nganong si Satanas nagpaisog kanimo nga mamakak sa balaang espiritu ug magtago sa bahin sa halin sa yuta? Samtang kini nagpabilin diha kanimo dili ba nagpabilin man kining imoha, ug human kini ikabaligya dili ba ilalom man gihapon kini sa imong pagbuot? Nganong imo mang gilaraw kining buhata diha sa imong kasingkasing? Ikaw namakak, dili sa tawo, kondili sa Diyos.” Sa pagkadungog sa mga pulong ni Pedro, si Ananias natumba ug nabugtoan sa gininhawa.

Sa paglabay sa mga tulo ka oras misulod si Sapira ug gisubli ang pagpamakak. Dayon si Pedro nangutana kaniya: “Nganong nagkasabot man mong duha sa pagsulay sa espiritu ni Jehova?” Sa ingon usab si Sapira natumba ug nabugtoan sa gininhawa. Kini nga hitabo nagsilbing disiplina alang sa kongregasyon, ug tungod niana sila mibatig dakong kahadlok, ug sa walay duhaduha sila usab nagbaton ug dakong pagtahod ug pagpabili sa kamatuoran nga si Jehova nagpuyo gayod diha sa kongregasyon pinaagi sa espiritu.​—Buh 4:​34, 35; 5:1-11; 1Co 3:​16, 17; Efe 2:22; itandi ang 1Ti 1:20.