Usa ka sihag o medyo sihag nga bililhong bato; usa ka matang sa corundum. Bisan tuod ang mga sapiro lainlain ug mga kolor, ang lugom-asul nga sapiro mao ang gipabilhan pag-ayo. Ang mga sapiro nga gihisgotan sa Bibliya dayag nga asul.

 Ang sapiro maoy usa sa mga bato sa “tabon sa dughan sa paghukom” sa hataas nga saserdote.​—Ex 28:15-18; 39:11.

Si Job, nga nabuhi niadtong mga ika-17 nga siglo W.K.P., nagbatbat sa mga paningkamot sa mga tawo sa pagkalot ilalom sa yuta aron sa pagmina ug bulawan ug sa mahalong mga mutya, ug iyang gihisgotan ang sapiro nga lakip sa talagsaong mga bato nga nakaplagan. Apan, matod ni Job, bisan pa sa kabililhon sa sapiro ug sa kalisod niining mabatonan, ang kaalam mas labaw pag bili ug dili kabayran sa maong mga bato.​—Job 28:4-6, 12, 16.

Mahulagwayong Paggamit. Ang madan-agong katahom, ingon man ang makapahimuot, makabibihag, ug makapadaning epekto tungod sa pagtan-aw ug bililhong mga mutya, gigamit nga mahulagwayon maylabot sa mga panan-awon sa himaya sa Diyos. Human nga gisugdan ang pakigsaad sa Balaod, si Moises, Aaron, Nadab, Abihu, ug ang 70 ka ansiyano sa Israel nakadawat ug panan-awon kang Jehova, ug ilalom sa iyang mga tiil “didtoy samag baldosa nga gama sa mga sapiro ug sama sa kalangitan sa kalunsay.” (Ex 24:8-11) Diha sa mga panan-awon sa himaya ni Jehova, si Ezequiel kaduha makakita ug “sama sa usa ka trono” nga “samag bato nga sapiro.”​—Eze 1:​1, 26-28; 10:1-4.

Sa dihang si Jehova, ingong bana nga Tag-iya sa Zion, naghisgot sa pagpasig-uli ug pagpatahom niini, siya miingon: “Ipahiluna ko ang imong patukoranan uban sa mga sapiro.” (Isa 54:​5, 11) Sa susama, ang panan-awon ni apostol Juan sa langitnong Bag-ong Jerusalem nagpadayag nga ang sapiro maoy bahin sa mga patukoranan niini.​—Pin 21:​2, 19.