Mga dapit didto sa Yutang Saad nga gigahin ingong mga dapit nga puy-anan sa Aaronikong mga saserdote ug sa ilang mga banay. Sa 48 ka siyudad nga gihatag sa ubang mga tribo sa Israel ngadto sa tribo ni Levi, 13 ang gipahat ngadto sa Kohatnong mga saserdote sa banay ni Aaron. (Jos 21:1-42; 1Cr  6:54-81) Ang mga tribo ni Juda ug Simeon naghatag kanila ug siyam ka siyudad ug ang tribo ni Benjamin naghatag ug upat. Busa, “ang tanang siyudad sa mga anak ni Aaron, ang mga saserdote, napulog-tulo ka siyudad ug ang mga sibsibanan niini.” (Jos 21:​4, 9-19) Kini nga mga siyudad mao ang Hebron (usa ka siyudad nga dalangpanan), Libna, Jatir, Estemoa, Holon (lagmit ang Hilen), Debir, Ain (Asan), Juta, Bet-semes, Gabaon, Geba, Anatot, ug Almon (Alemet), ug ang tanan gawas sa Juta ug Gabaon gihisgotan pag-usab diha sa 1 Cronicas 6:54-60.

Sa dihang hapit na niyang dad-on ang arka ni Jehova ngadto sa Jerusalem, gipasugoan ni David ang mga saserdote sa ilang lainlaing mga siyudad aron kini sila magkatigom. (1Cr 13:1-5) Ug espesipikong gihisgotan ang pagtudlo ug mga lalaki aron sa pag-apod-apod sa mga inamot ngadto sa ilang saserdote nga mga igsoon nga nagpuyo sa mga siyudad sa mga saserdote panahon sa paghari ni Haring Ezequias.​—2Cr 31:11-19.