[Heb., sis].

Usa sa kinatulinan sa tanang mga langgam, nga sagad moabot sa gikusgong kapin sa 100 km/oras (60 mko) ug makapatulin pa sa paglupad sa gikusgong mga 200 km/oras (120 mko) o kapin pa. Paspas nga ikapakapa niini ang iyang daw dili kapoyon nga taas, nipis, samag-galab nga mga pako sa dihang kini mosakdop ug mogukod sa iyang tukbonong insekto, ug maglamoy niini samtang naglupad. Sa upat ka matang sa mga sayaw nga makita sa Israel, ang Alpine swift (Apus melba) mao ang kinadak-an ug lahi tungod sa putig-kolor nga tiyan niini. Kini ang una sa tiglalin nga mga sayaw nga makita sa Palestina sa hapit na ang tingpamulak, nga sa dili madugay human  niana sundan sa taas nga panon sa komon nga mga sayaw (Apus apus). Sila magsalag diha sa ngitngit nga mga dapit, sagad ilalom sa mga balisbisan, ug usahay sulod sa lungag sa mga kahoy o sa kilid sa mga pangpang, ug ang ilang mga salag himoon ginamit ang mga uhot ug mga balhibo nga ipatapot pinaagi sa pilit nga laway nga gikan sa mga glandula niini nga langgam. Ang tiil sa sayaw dayag nga wala gidisenyo sa paglakaw o sa pagbatog, busa kini nga langgam magkuha sa iyang tanang pagkaon ug sa iyang mga himoonong salag samtang naglupad ug usab moinom pinaagi sa pagsarap sa ibabaw sa tubig; kini mopahulay pinaagi sa pagkumbitay sa kilid sa patindog nga mga butang. Ang pagpiyakpiyak sa sayaw daw usa ka honi sa pagbangotan ug kasubo.

Ang pamatuod nga ang Hebreohanong sis mao ang sayaw gipakita pinaagi sa paggamit sa samang ngalan diha sa Arabiko alang niana nga langgam. Gituohan sa ubang mga eskolar nga kining ngalana nagpasabot ug paghaguros; apan giisip sa uban nga kining ngalana nagrepresentar sa taliis nga pagpiyakpiyak sa sayaw nga nagpatunghag honi nga si-si-si.

Si Ezequias, sa dihang naulian sa sakit, miingon sa usa ka mapalandongong pagkatagik nga mga pulong nga siya ‘nagpadayon sa pagtuwit-tuwit sama sa sayaw,’ dayag nga sa usa ka masulub-ong paagi, ug ang manalagnang si Jeremias migamit sa tiglalin nga sayaw ingong sanglitanan sa dihang gibadlong ang katawhan sa Juda tungod kay wala nila hatagig pagtagad ang panahon sa paghukom sa Diyos.​—Isa 38:14; Jer 8:7.