[gikan sa lintunganayng pulong nga nagkahulogang “manglimbawot,” lagmit nagtumong sa daghag kahoy nga kabungtoran; o, lagmit nagkahulogang “Manglimbawot (Mangurog) sa Kalisang”].

1. Usa ka “Horihanon” kansang pito ka “anak nga lalaki” maoy mga sultan sa yuta sa Seir sa wala pa magpuyo niini si Esau (Edom). (Gen 36:​20, 21, 29, 30; 1Cr 1:38; itandi ang Gen 14:4-6.) Si Seir lagmit nagpuyo sa bukirong rehiyon sa H sa Patayng Dagat, ug kining dapita tingali ginganlan sumala sa iyang ngalan. Dili matino kon kini bang pito ka “anak nga lalaki” ni Seir maoy iya gayong mga anak o iyang ulahing mga kaliwat.​—Tan-awa ang ANAH; DISON.

2. Ang bukirong rehiyon tali sa Patayng Dagat ug sa Gulpo sa ʽAqaba. (Gen 36:​8, 30; Deu 2:​1, 8) Sa panahon ni Abraham ang mga Horihanon nagpuyo sa Seir. (Gen 14:6) Sa ulahi, ang apong lalaki ni Abraham nga si Esau nagpundar ug kapanginabuhian  sa Seir, samtang ang iyang kaluha nga si Jacob nagpuyo sa Padan-aram. (Gen 32:3) Apan mopatim-aw nga si Esau wala madayon pagbalhin sa Seir hangtod sa panahon nga nakabalik na si Jacob sa Canaan. (Gen 36:6-9) Sa kataposan, ang mga kaliwat ni Esau, ang mga Edomhanon, nagpapahawa sa mga Horihanon (Deu 2:​4, 5, 12; Jos 24:4), ug ang yuta sa kapulihay gitawag ug Edom. Apan, ang mas unang ngalan nga Seir gigamit usab sa pagtumong sa mga kaliwat ni Esau ug sa dapit nga ilang gipuy-an. (Num 24:18; itandi ang 2Ha 14:7; 2Cr 25:11.) Mopatim-aw nga sa panahon sa paghari ni Haring Ezequias ang mga tawo sa tribo ni Simeon miadto sa Bukid sa Seir, ug human nga ilang gipamatay ang nahibilin sa mga Amalekanhon, ang mga Simeonhon mipuyo didto. (1Cr 4:41-43) Alang sa mga detalye bahin sa geograpiya ug kasaysayan sa Seir, tan-awa ang EDOM, EDOMHANON.

3. Usa ka bukid tali sa Baala (Kiriat-jearim) ug Kesalon sa A nga utlanan sa teritoryo sa Juda. (Jos 15:10) Gituohan sa kadaghanan nga ang Seir mao ang tagaytay nga mga 15 km (9.5 mi) sa K sa Jerusalem, nga sa habagatang kiliran niini nahimutang ang balangay sa Shoresh.