[nagkahulogang “Si Jehova Namati (Nagpatalinghog)”].

1. Usa ka Simeonhon kansang layo nga kaliwat miduyog sa ekspedisyon nga nag-ilog sa teritoryo nga sibsibanan gikan sa mga Canaanhon sa mga adlaw ni Ezequias.​—1Cr 4:​24, 37-41.

2. Usa ka anak nga lalaki ni Joel sa tribo ni Ruben.​—1Cr 5:​3, 4.

3. Pangulo sa Levihanong balay ni Elizapan. Si Semaias ug ang 200 sa iyang mga igsoong lalaki, human makabalaan sa ilang kaugalingon, miuban sa parada nga nagdala sa arka sa pakigsaad ngadto sa Jerusalem.​—1Cr 15:​4, 8, 11-16.

4. Sekretaryo sa mga Levihanon nga maoy nagtala sa 24 ka saserdotehanong dibisyon nga giorganisar sumala sa instruksiyon ni David; anak nga lalaki ni Netanel.​—1Cr 24:6.

5. Panganayng anak nga lalaki ni Obed-edom, usa ka Levihanon. Si Semaias ug ang iyang mga anak nga lalaki gitala tanan ingong mga magbalantay-sa-ganghaan nga gipuwesto diha sa mga balay-tipiganan sa sangtuwaryo.​—1Cr 26:​1, 4, 6, 7, 12, 13, 15.

6. Usa ka manalagna ni Jehova panahon sa paghari sa anak nga lalaki ni Solomon nga si Rehoboam. Human sa pag-alsa sa napulo ka tribo sa amihanan niadtong 997 W.K.P., gipahayag ni Semaias ang mga pulong ni Jehova nga nagbaod kang Rehoboam nga dili sakopon pag-usab kini nga mga tribo. (1Ha 12:21-24; 2Cr 11:1-4) Sa ikalimang tuig ni Rehoboam (993 W.K.P.), si Haring Sisak sa Ehipto misulong sa Juda, ug si Semaias nagpahibalo kang Rehoboam ug sa iyang mga prinsipe nga si Jehova mibiya na kanila tungod kay sila mibiya Kaniya. Apan, tungod kay si Rehoboam ug ang iyang mga prinsipe nagpaubos sa ilang kaugalingon, menos ra ang kalaglagan nga gipahinabo ni Jehova sa maong pag-atake. (2Cr 12:1-12) Gisulat usab ni Semaias ang usa sa mga nahisulat nga mga rekord sa paghari ni Rehoboam.​—2Cr 12:15.

7. Usa sa mga Levihanon nga gisugo ni Haring Jehosapat sa ikatulong tuig sa iyang pagmando (934 W.K.P.) aron sa pagtudlo sa Balaod diha sa mga siyudad sa Juda.​—2Cr 17:7-9.

8. Usa ka Levihanong kaliwat ni Jedutun nga gisugo ni Ezequias sa unang tuig sa iyang pagmando (745 W.K.P.) aron motabang sa paghinlo sa templo. Si Semaias ug ang ubang mga Levihanon nagdala sa mahugawng mga butang ngadto sa Walog sa Kidron. (2Cr 29:​12, 14-16) Lagmit mao ra usab ang Num. 9.

9. Usa sa mga Levihanon nga nag-apod-apod sa mga ikapulo ug sa ubang mga amot diha sa mga siyudad sa mga saserdote panahon sa paghari ni Ezequias. (2Cr 31:​6, 12, 14, 15) Lagmit mao ra usab ang Num. 8.

10. Usa sa Levihanong mga pangulo nga mihatag ug daghang amot sa halad nga mga hayop alang sa pagsaulog sa dakong Paskuwa ni Josias.​—2Cr 35:​1, 9.

11. Amahan ni Uriyas, usa ka manalagna nga katalirongan ni Jeremias; gikan sa Kiriat-jearim.​—Jer 26:20.

12. Amahan ni Delaias, usa ka prinsipe sa Juda panahon sa paghari ni Jehoiakim.​—Jer 36:12.

13. Usa ka mini nga manalagna sa lungsod sa Nehelam ug magsusupak ni Jeremias; siya gibihag ngadto sa Babilonya uban kang Jehoiakin niadtong 617 W.K.P. Gikan didto iyang gisulatan si manalagnang Sofonias ug ang kaubang mga saserdote sa Jerusalem, ug gisaway si Jeremias tungod kay kini nanagna nga ipahinabo ang dugay nga pagkadestiyero ug kini nag-aghat usab sa mga nadestiyero nga manimuyo sa Babilonya. Si Semaias miinsistir nga si Jeremias kinahanglang ibalhog sa mga sepohan. Apan, gitagna ni Jehova nga tungod kay si Semaias misulay sa pagpasalig sa mga Hudiyo sa kabakakan ug siya namulong ug tataw nga pagsukol, siya ni ang iyang mga kaliwat dili mahiapil sa mamalik nga mga destiyero.​—Jer 29:24-32.

14. Usa ka saserdote, ug lagmit ang magtutukod sa usa ka saserdotehanong banay, nga mibalik sa Jerusalem uban kang Zorobabel niadtong  537 W.K.P. Sa misunod nga kaliwatan, si Jehonatan maoy nangulo sa balay o banay sa amahan ni Semaias. (Neh 12:​1, 6, 7, 12, 18) Ang ilang hawas, o laing saserdote nga samag ngalan, nagpamatuod sa pakigsaad sa nasod panahon sa pagkagobernador ni Nehemias.​—Neh 10:​1, 8.

15. Usa ka Levihanon nga naggikan kang Jedutun kansang anak nga lalaki o kaliwat nga si Abdias mipuyo sa Jerusalem human sa pagkadestiyero.​—1Cr 9:​16, 34.

16. Usa ka Levihanon gikan sa mga kaliwat ni Merari nga mipuyo usab sa Jerusalem human sa pagkadestiyero sa Babilonya; anak nga lalaki ni Hasub.​—1Cr 9:​14, 34; Neh 11:15.

17. Usa ka lider sa mga anak nga lalaki ni Adonikam nga miuban kang Esdras ngadto sa Jerusalem niadtong 468 W.K.P. Lagmit usa siya niadtong gipadala ni Esdras aron sa paghangyo ug mga alagad alang sa sangtuwaryo, nga tungod niini natigom ang pipila ka Levihanon ug mga Netinim alang sa panaw.​—Esd 8:​1, 13, 16-20.

18. Usa sa mga saserdote nga sa pag-abot sa Jerusalem, gidasig ni Esdras sa pagpapahawa sa ilang langyawng mga asawa; anak nga lalaki ni Harim.​—Esd 10:​10, 11, 21, 44.

19. Usa sa mga Israelinhon, anak nga lalaki sa lain pang Harim, kinsa nangasawa usab ug langyawng mga asawa ug nagpapahawa usab kanila.​—Esd 10:​25, 31, 44.

20. Usa niadtong mitabang sa pag-ayo sa paril sa Jerusalem; anak nga lalaki ni Secanias ug usa ka magbalantay-sa-ganghaan, busa lagmit usa ka Levihanon.​—Neh 3:29.

21. Ang mini nga manalagna nga gisuholan ni Tobias ug Sanbalat aron sultihan si Nehemias bahin sa giingong hulga sa iyang kinabuhi, sa ingon gihadlok si Nehemias, kinsa dili usa ka saserdote, aron makasala pinaagi sa pagtago didto sa templo. Anak nga lalaki ni Delaias.​—Neh 6:10-13.

22. Usa sa miuban sa martsa sa kasaulogan nga gihikay ni Nehemias human matukod pag-usab ang paril sa Jerusalem.​—Neh 12:31-34.

23. Usa ka saserdote sa banay ni Asap kansang kaliwat mimartsa sa mao gihapon nga parada, dayag nga usa ka tigtrompeta.​—Neh 12:​31, 35.

24. Usa ka maghohoni nga saserdote sa mao gihapon nga parada; dayag nga usa ka paryente sa Num. 23.​—Neh 12:​31, 36.

25. Usa ka saserdote nga nagpatokar sa trompeta sa dihang ang duha ka grupo sa koro sa pagpasalamat nagtagbo sa balay ni Jehova panahon sa inagurasyon sa paril.​—Neh 12:40-42.

26. Usa ka layong kaliwat ni David. (1Cr 3:​9, 10, 22) Gituohan sa pipila ka eskolar nga ang mga pulong “ug ang mga anak nga lalaki ni Semaias,” sa tungatunga sa bersikulo 22 (nga gisundan lamang sa lima ka ngalan), dili angayng ilakip ingong usa ka sayop sa eskriba, busa gipasidungog kang Secanias ang unom ka anak nga lalaki. Apan, gituohan sa ubang mga eskolar nga si Semaias ug ang iyang lima ka anak nga lalaki mao ang unom ka kaliwat ni Secanias.