Ang Hebreohanong pulong alang sa “semana” (sha·vuʹaʽ) sa literal nagtumong sa pito-ka-pilo nga gitas-on o yugto. Ang Gregong pulong niini nga sabʹba·ton naggikan sa Hebreohanong pulong alang sa Igpapahulay (shab·bathʹ).

Ang pag-ihap sa mga adlaw nga tinagpito matag siklo dugay nang nagsugod sa kasaysayan sa tawo. Ang sumbanan sa maong pagbahin sa panahon gilatid ni Jehova nga Diyos pinaagi sa pagbahin sa yugto sa iyang mga buhat sa paglalang ngadto sa unom ka adlaw, o mga yunit sa panahon, nga natapos sa ikapitong adlaw sa pagpahulay. (Gen 2:​2, 3) Human niini, ang sunod nga paghisgot nga atong makaplagan bahin sa pito-ka-adlaw nga siklo maoy maylabot kang Noe sa panahon sa Lunop, apan walay gihisgotan nga ikapitong adlaw sa pagpahulay. (Gen 7:​4, 10; 8:​10, 12) Ang pito-ka-adlaw nga mga yugto gisunod maylabot sa mga kaminyoon didto sa Padan-aram ug sa Filistia. (Gen 29:​27, 28; Huk 14:​12, 17) Ang pito-ka-adlaw nga yugto gisunod usab sa paglubong kang Jacob. (Gen 50:10) Hinunoa, ang rekord sa Bibliya wala magpakita nga kining unang pito-ka-adlaw nga mga yugto adunay gisunod nga senemanang kahikayan, nga adunay regular nga adlaw sa pagsugod ug sundan sa ubang susamang pito-ka-adlaw nga mga yugto. Taliwala sa pipila ka karaang mga katawhan ang pito-ka-adlaw nga mga siklo gigamhan sa upat ka hugna sa bulan ug mosugod pag-usab sa matag bag-ong subang sa bulan. Sanglit ang lunar nga bulan adunay 29 o kaha 30 ka adlaw, dili mahimong makompleto ang sunodsunod nga pito-ka-adlaw nga mga siklo.

Ang usa ka pananglitan nga naghisgot bahin sa napulo-ka-adlaw nga yugto makaplagan sa Genesis 24:55. Sa karaang Ehipto ang panahon gibahin sa napulo-ka-adlaw nga mga siklo (tulo ka siklo sa matag bulan), ug ang mga Israelinhon dayag nga nasinati niini sa panahon sa ilang dugayng pagpuyo sa Ehipto.

 Ubos sa Balaod. Atong makaplagan maylabot sa iyang mga instruksiyon bahin sa Paskuwa ang unang paghisgot bahin sa balaod sa Diyos nga nagsugo sa pagsaulog sa usa ka espesipikong pito-ka-adlaw nga yugto. Kini nga yugto nahimong ang tinuig nga Pista sa Tinapay nga Walay Igpapatubo nga human niadto gisaulog sa mga Israelinhon human sa Paskuwa. Ang unang adlaw ug ang ikapito o kataposan nga adlaw maoy mga adlaw sa pagpahulay.​—Ex 12:14-20; 13:6-10.

Adlawng igpapahulay gisugdan. Apan human sa inagurasyon niining linain nga semana dihay misunod nga yugto nga mga usa ka bulan diin sa maong panahon ang mga Israelinhon nagpanaw sa ilang Pagpanggula gikan sa Ehipto, ug niini nga yugto walay gihisgotan nga dihay ilang gihimong senemanang pagsaulog nga matapos sa ikapitong adlaw sa pagpahulay. Human sa ika-15 nga adlaw sa ikaduhang bulan sa ilang paggula sa yuta sa Ehipto, si Jehova misugod sa paghatag kanilag mana, ug mao kadtong panahona nga sila unang gisugo sa pagsaulog sa usa ka regular nga Igpapahulay sa matag ikapitong adlaw. (Ex 16:​1, 4, 5, 22-30) Dayag nga tungod sa maong pagsaulog sa Igpapahulay namugna ang sunodsunod nga senemanang pagbahin sa mga adlaw nga wala magdepende sa mga yugto sa lunar nga bulan. Human niadto kini gihimo sa Diyos nga usa ka legal nga lagda diha sa pakigsaad sa Balaod nga gihatag pinaagi kang Moises ngadto sa nasod sa Israel.​—Ex 20:8-11; Deu 5:12-15.

Mga yugto sa kapistahan. Siyempre, dihay gilatid sa Balaod nga pipila ka yugto sa kapistahan nga molungtad ug pito ka adlaw ug kini dili kinahanglang magsugod o matapos sumala sa regular nga semana nga gipasukad sa Igpapahulay. Kini magsugod sa usa ka partikular nga adlaw sa lunar nga bulan; busa, ang adlaw sa pagsugod matunong sa lainlaing mga adlaw sa semana matag tuig. Ingon usab niini ang Pista sa Tinapay nga Walay Igpapatubo, nga mosunod sa Paskuwa ug saulogon sa Nisan 15-21, ug sa Pista sa mga Balongbalong nga saulogon sa Etanim 15-21. Dugang pa, ang Pista sa mga Semana, o Pentekostes, gibase sa pag-ihap ug pito ka semana nga dugangan ug usa ka adlaw, apan ang pito ka semana sugdan sa pag-ihap gikan sa Nisan 16 ug busa dili kanunayng mosibo sa regular nga mga semana nga matapos sa regular nga mga adlawng Igpapahulay.​—Ex 12:​2, 6, 14-20; Lev 23:5-7, 15, 16; Deu 16:​9, 10, 13.

Ang mga adlaw sa semana wala hatagig mga ngalan apan gipaila lamang pinaagig numero, gawas lamang sa ikapitong adlaw nga gitawag ug “igpapahulay.” (Ex 20:8) Pareho usab kini sa mga adlaw ni Jesus ug sa iyang mga apostoles, bisan tuod ang adlaw una pa ang Igpapahulay gitawag nga “Pagpangandam.”​—Mat 28:1; Buh 20:7; Mar 15:42; Ju 19:31.

Pito-ka-adlaw ug pito-ka-tuig nga mga yugto. Tungod sa kahinungdanon sa pakigsaad sa Balaod ngadto sa Igpapahulay, o sa ikapitong adlaw, ang pulong nga “igpapahulay” kasagarang gigamit sa pagrepresentar sa tibuok semana sa pito ka adlaw. (Lev 23:​15, 16) Kini gigamit usab sa pagtumong sa ikapitong tuig, nga maoy usa ka tuig nga Igpapahulay alang sa yuta. Ug kini nagrepresentar usab alang sa tibuok pito-ka-tuig nga yugto, o semana sa mga tuig, nga matapos sa usa ka tuig nga Igpapahulay. (Lev 25:2-8) Sublisubling gigamit sa Hudiyohanong Mishnah ang ekspresyon nga “semana sa mga tuig.”​—Sheviʽit 4:​7-9; Sanhedrin 5:1; tan-awa ang KAPITOAN KA SEMANA (Usa ka Mesiyanikong Tagna).