[Ubos nga Kayutaan].

Usa ka ngalan nga sagad gigamit sa pagtawag sa rehiyon sa ubos nga kabungtoran tali sa sentral nga kabukiran sa Palestina ug sa kapatagan daplin sa baybayon sa Filistia. (Deu 1:7; Jos 9:1; 10:40; 11:2; 12:8; Huk 1:9; 2Cr 28:18; Abd 19; Zac 7:7) Ang Sepela maoy usa sa mga rehiyon sa teritoryo nga gipahat ngadto sa Juda. (Jos 15:33-44) Bisan tuod miabot sa gihabogon nga mga 450 m (1,500 p), kini mas ubos pa gihapon nga dapit o ikaingong “kapatagan” (itandi ang Jer 17:26; 32:44; 33:13 diin ang shephe·lahʹ makita diha sa Hebreohanong teksto) kon itandi sa mas habog nga sentral nga kabukiran. Ang utlanan sa “Sepela” dapit sa H mao ang Negeb (Huk 1:9) ug sa A “ang bukirong rehiyon sa Israel” (saylo pa sa Ubos nga Patag sa Aijalon).​—Jos 11:16.

Ang mga walog nga nag-ulang sa hanayhay nga mga tiilan sa kabungtoran niini nga rehiyon nahimong agianan alang sa S-K nga pagpanaw. Ang Sepela tabunok, ug may maayo nga klima. Ang rehiyon kanhi ilado tungod sa daghang kahoy nga sikomoro ug mga kaolibohan niini. Kini usab adunay sibsibanan alang sa mga panon sa karnero ug baka.​—1Ha 10:27; 1Cr 27:28; 2Cr 1:15; 9:27; 26:10.

Ang Sepela nga gituohang mao ang “bukirong rehiyon sa Israel” (Jos 11:16) tingali mao ang kabungtoran tali sa kabukiran sa Samaria ug sa Patag sa Saron. Kini nga dapit mas hiktin ug dili kaayo ilado kay sa Sepela sa Juda. Walay pasukaranan nga isipong sayop ang pagpalahi sa Juda gikan sa Israel sa ika-11 nga kapitulo sa Josue (tan-awa ang ber 21). Ang nota o footnote sa usa ka komentaryo ni C. F. Keil ug F. Delitzsch nag-ingon: “Ang pagpalahi . . . lagmit sayon nga ikapatin-aw bisan sa mga kahimtang sa panahon ni Josue. Ang Juda ug ang duha ka tribo ni Jose (ang Epraim ug Manases) nakadawat sa ilang panulondon pinaagig ripa nga una kay sa uban. Apan bisan tuod ang tribo ni Juda miadto na sa teritoryo nga gipahat kanila dapit sa habagatan, ang tanang ubang mga tribo nagpabilin pa gihapon sa Gilgal; ug bisan sa ulahing yugto, sa dihang ang Epraim ug Manases didto na sa ilang mga teritoryo, ang tibuok Israel, gawas sa Juda, nagkampo pa gihapon sa Shilo. Dugang pa, ang duha ka bahin sa nasod niining higayona naulang na pinaagi sa teritoryo nga gipahat sa ulahi ngadto sa tribo ni Benjamin, apan kini nga teritoryo wala pay tag-iya niining higayona; ug dugang pa niini, ang halaran, ang tabernakulo, ug ang arka sa pakigsaad nahimutang didto sa taliwala ni Jose ug sa ubang mga tribo nga nagtigom pa gihapon didto sa Shilo.”​—Commentary on the Old Testament, 1973, Tomo II, Joshua, pp. 124, 125.