[Si Jehova Nakigtigi (Milahutay)].

1. Usa ka anak nga lalaki ni Kenaz sa tribo ni Juda, igsoon ni Maghuhukom Otniel, ug pag-umangkon ni Caleb nga espiya. Ang mga kaliwat ni Seraias pinaagi sa iyang anak nga lalaki nga si Joab nahimong mga artesano.​—1Cr 4:​13, 14.

2. Ang sekretaryo sa administrasyon ni Haring David. (2Sa 8:​15, 17) Gawas kon dunay mga kausaban sa mga tawo nga naghupot niini nga katungdanan, siya gitawag sa ubang mga teksto nga Seva (2Sa 20:25), Savsa (1Cr 18:16), ug Sisa, kansang duha ka anak nga lalaki naghupot sa ulahi sa samang mga katungdanan ubos sa pagmando ni Solomon. (1Ha 4:3) Ang mga ngalan sa kadaghanan sa ubang mga opisyal sa kagamhanan pareho ra diha sa tulo ka talaan panahon sa pagmando ni David.

3. Usa ka anak nga lalaki ni Asiel sa tribo ni Simeon kansang mga kaliwat, nga katalirongan ni Ezequias, miduyog sa kasundalohan nga nagpatay sa mga Hamihanon ug mga Meunim nga nag-okupar sa usa ka dapit ug dayon ang yuta gihimong sibsibanan.​—1Cr 4:​24, 35, 38-41.

4. Usa sa tulo nga gipaadto ni Haring Jehoiakim, sa hinapos sa 624 W.K.P, aron sa pagkuha kang Jeremias ug Baruk tungod sa tagna batok sa Jerusalem ug Juda nga girekord ni Baruk ubos sa pagdiktar ni Jeremias. Si Seraias maoy anak nga lalaki ni Azriel.​—Jer 36:​9, 26.

5. Ang tagdumala sa mga lawak ni Haring Zedekias; anak nga lalaki ni Nerias ug igsoon ni Baruk. (Jer 32:12; 51:59) Sa ikaupat nga tuig ni Zedekias, sa 614 W.K.P., si Seraias miuban kang Zedekias ngadto sa Babilonya. Gihatagan siya ni Jeremias ug usa ka linukot nga basahon nga naundan sa matagnaong mahukmanon nga mga pagsaway batok sa Babilonya, ug gisugo siya nga basahon kini sa daplin sa Suba sa Euprates, dayon ihikot ang usa ka bato diha sa linukot nga basahon ug ilabog kini ngadto sa suba ingong paglarawan sa dumalayong pagkapukan sa Babilonya. (Jer 51:59-64) Lagmit nga gipahayag ni Seraias ang pipila ka bahin sa tagna ngadto sa Israelinhong mga destiyero nga atua na didto. Makaiikag nga nakaplagan sa mga arkeologo ang usa ka timbre nga may inskripsiyon nga “Iya ni Seraias (ben) Nerias.”​—Israel Exploration Journal, Jerusalem, 1978, Tomo 28, p. 56.

6. Ang pangulong saserdote sa dihang gilaglag sa Babilonya ang Jerusalem niadtong 607 W.K.P. Bisan tuod si Seraias gipatay ubos sa sugo ni Nabucodonosor, ang iyang anak nga lalaki nga si Jehozadak wala patya ug gidalang binihag ngadto sa Babilonya. (2Ha 25:18-21; Jer 52:24-27) Pinaagi sa anak ni Seraias nga si Jehozadak, ang kaliwat sa hataas nga mga saserdote gikan kang Aaron nagpadayon; ang anak nga lalaki ni Jehozadak nga si Jesua naghupot niini nga katungdanan panahon sa pagpagawas ug pagpabalik sa mga Hudiyo. (1Cr 6:​14, 15; Esd 3:2) Si Seraias gitawag usab nga amahan ni Esdras, apan tungod sa kal-ang nga 139 ka tuig tali sa kamatayon ni Seraias ug sa pagbalik ni Esdras, lagmit labing menos may duha pa ka wala-hinganling kaliwatan tali kanilang duha, usa ka paglaktaw nga sagad makita diha sa mga talaan sa kagikan sa Bibliya.​—Esd 7:1.

7. Usa sa mga pangulo sa kasundalohan nga nagpabilin sa Juda human sa tiningob nga pagdestiyero ngadto sa Babilonya; anak nga lalaki ni Tanhumet. Si Seraias ug ang uban nga sama niyag ranggo misuportar kang Gedalias sa dihang siya gitudlo ingong gobernador, ug siya nagpasidaan kang Gedalias bahin sa hulga ni Ismael batok sa iyang kinabuhi, ug sa ulahi naningkamot sa pagpanimalos sa kamatayon ni Gedalias. Apan, tungod kay nahadlok sa mga Babilonyanhon, si Seraias ug ang ubang mga pangulo nagdala sa nahibiling mga Hudiyo ngadto sa Ehipto.​—2Ha 25:​23, 26; Jer 40:​8, 13-16; 41:11-18; 43:4-7.

8. Usa niadtong mga pangulo nga gitala nga kauban ni Zorobabel nga mibalik gikan sa pagkadestiyero niadtong 537 W.K.P. (Esd 2:​1, 2) Gitawag siya nga Azarias diha sa samang talaan sa Nehemias 7:7.

9. Usa ka saserdote nga kauban ni Zorobabel nga mibalik gikan sa pagkadestiyero. Sa misunod nga kaliwatan, si Meraias maoy naghawas kang Seraias sa iyang balay o banay sa amahan. (Neh 12:​1, 12) Ang Seraias nga lakip sa mga mipirma sa pakigsaad sa mga adlaw ni Esdras ug Nehemias tingali hawas usab sa mao ra nga banay, o lain nga saserdote nga may samang ngalan. (Neh 10:​1, 2, 8) Si Seraias, nga lagmit usa usab ka sakop niini nga balay o banay sa amahan o usa ka saserdote nga may samang ngalan, mipuyo sa Jerusalem human matukod pag-usab ang mga paril.​—Neh 11:​1, 10, 11.