Usa ka ilimnon nga medyo diyutay ra ang gidaghanon sa alkohol ug gihimo pinaagi sa inanay nga pagpaaslom sa duga sa trigo o sa ubang lugas. Ang Hebreohanong pulong nga soʹveʼ, nga gihubad nga “serbesa sa trigo,” mahimong hubaron usab nga “distiladong alkoholikong ilimnon.”​—Isa 1:​22, ftn sa Rbi8; Os 4:​18, ftn sa Rbi8; Nah 1:​10, ftn sa Rbi8.

Gipakita sa cuneiform nga mga papan nga ang paghimog serbesa gikan sa lugas gibuhat na sa karaang Mesopotamia sukad pa sa ikatulong milenyo W.K.P. Sa dihang si Abraham unang miabot sa Ehipto lagmit iyang nakita nga ang serbesa maoy komon nga ilimnon didto. Sa ulahi, giingon nga nagustohan kaayo ni Ramses III ang serbesa nga tungod niana siya naghalad ug mga 114,000 L (30,000 gal) niini ngadto sa iyang mga diyos kada tuig. Daghan ang nakaplagan nga mga mug o mga baso sa mga Filistehanon alang sa serbesa nga may mga bokilya nga salaan. Mopatim-aw nga ang lainlaing mga nasod kaniadto adunay nagkadaiyang matang sa mga serbesa aron tagbawon kon unsay gusto nga lami sa matag usa​—tam-is nga serbesa, itom nga serbesa, pinahumotan nga serbesa, magbulabula nga serbesa, serbesa nga may yerbang-paalimyon​—nga idalit nga init o kaha bugnaw, labnaw o espeso ug hawot.​—Tan-awa ang BINO UG ILIMNONG MAISOG.