Usa ka baston o olisi nga ginadala sa usa ka magmamando ingong simbolo sa harianong awtoridad. Usahay ang “setro” gigamit sa mahulagwayong diwa sa paghawas sa mga hari (Eze 19:​ 10, 11, 14) o sa awtoridad (Zac 10:11), ilabina sa harianong awtoridad.

Sa karaang Persia, gawas kon itunol sa monarko ang bulawang setro, si bisan kinsa nga moduol sa hari nga wala dapita pagapatyon.​—Est 4:11; 5:2; 8:4.

Ang matagnaong mga pulong ni Jacob nga “ang setro dili mobiya gikan kang Juda” nagpaila nga ang pagkahari maangkon sa tribo ni Juda ug magpabilin niana nga tribo hangtod nga moabot si Shilo. (Gen 49:10; tan-awa ang SUNGKOD SA KOMANDANTE.) Kasiglohan sa ulahi ang mga Babilonyanhon, nga nag-alagad ingong tiglaglag nga “espada” ni Jehova, naglaglag sa gingharian sa Juda ug nagbihag sa hari niini. Gihisgotan kini diha sa mga pulong ni Jehova pinaagi kang Ezequiel: “Usa ka espada, usa ka espada! Kini gibaid, ug kini usab gipasinaw. . . . Gisalikway ba niini ang setro sa akong anak, sama sa gihimo niini sa tanang kahoy? Kay ang usa ka pagsulay gihimo, ug unsay anaa niana kon ginasalikway usab niini ang setro?” (Eze 21:​9, 10, 13) Busa giisip sa “espada” ang Judeanhong “setro” sa dinastiya ni David nga sama ra sa tanang kahoy (nga pagaputlon) o sama sa ubang mga hari o mga gingharian nga gilaglag niini.

Ang Salmo 2, nga usa ka tagna nga gipadapat ni Pedro ngadto kang Jesu-Kristo (Buh 4:25-27), nagpakita nga ang dinihogan ni Jehova mogamit ug usa ka setro nga puthaw aron dugmokon ang kanasoran. (Sal 2:​2, 6, 9; itandi ang Pin 12:5; 19:15.) Sanglit si Jesu-Kristo kanunayng mogamit sa iyang harianong awtoridad sa matarong nga paagi, ang iyang setro maoy setro sa pagkamatarong.​—Sal 45:​6, 7; Heb 1:​8, 9.

Ang Salmo 125:3 nag-ingon nga “ang setro sa pagkadaotan dili magpabilin sa ibabaw sa bahin sa mga matarong.” Kining mga pulonga nagpasalig nga ang matarong dili kanunayng daogdaogon niadtong nagbaton ug awtoridad sa dinaotan nga paagi.