Kini nga ekspresyon gihubad gikan sa Hebreohanong pulong nga miz·rachʹ, nga sa literal nagkahulogang “silangan sa adlaw” (Deu 3:27; 1Cr 4:39), ug gikan sa mga nombre nga naggikan sa berbong qa·dhamʹ, nga nagkahulogang “maanaa sa atubangan.” (Eze 48:2) Nabatasan na sa mga Hebreohanon nga moatubang sa misubang nga adlaw sa dihang tinoon ang direksiyon, nga nagkahulogan nga ang S anaa sa ilang atubangan, ang K sa luyo, ang A sa wala, ug ang H sa tuo.

Usahay ang qeʹdhem gigamit sa pagtumong sa pasidlakan nga direksiyon, ingon sa makita sa Genesis 11:2. Sa ubang mga higayon kini nagkahulogang “sidlakan” kon itandi sa ubang butang, sama sa Numeros 34:​11, diin gigamit ang ekspresyong “sidlakan sa Ain.” Sa uban pang mga higayon kini nagtumong sa dapit nga nahimutang sa S ug sa AS sa Israel. Lakip niini ang mga kayutaan sa Moab ug Ammon, ang Desyerto sa Arabia, ang Babilonya, Persia, Asirya, ug Armenia.

Ang lainlaing katawhan nga nagpuyo sa mga kayutaan nga gitumong sa pulong nga “sidlakan” gihisgotan ingong “mga anak sa Sidlakan.” Si Job gitawag nga mao ang labing bantogan sa tanang “taga-Sidlakan,” o “mga anak sa Sidlakan.” (Job 1:3) Siya nagpuyo niining sidlakan nga dapit. Sa dihang si Jacob miadto sa Mesopotamia aron sa pagkuhag asawa, kita giingnan nga siya miadto sa yuta sa “mga taga-Sidlakan,” o sa “mga anak sa Sidlakan.” (Gen 29:1) Ang katawhan sa S sa Israel gitawag usab ug “mga anak sa Sidlakan,” o “mga taga-Sidlakan,” sama nianang sa Maghuhukom 6:3; 8:10.

Sa Palestina ang hangin sa S maoy init nga hangin nga mohuros gikan sa desyertong kayutaan sa S ug makadaot sa mga pananom. (Eze 19:12) Mao kini ang pasukaranan sa ekspresyong ‘pun-on sa usa ang iyang tiyan sa hangin nga timog.’​—Job 15:2.

Ang tabernakulo, ang mga templo ni Solomon ug Zorobabel, ug ang ikaduhang templo nga gitukod pag-usab ni Herodes pulos nag-atubang sa S. (Num 3:38) Ang templo sa panan-awon ni Ezequiel nag-atubang sa sidlakan. (Eze 47:1) Busa ang pag-abot ni Jehova ug ni Kristo diha sa templo dahomon nga maggikan sa S.

Sa Isaias 46:​11, si Ciro, ang Persianhong hari, gihisgotan nga miabot gikan sa “sidlakan” (KJ), o sa “silangan sa adlaw” (NW). Ang mga taho nga gitagnang naggikan sa “sidlakan” (KJ), sa literal, maoy gikan sa “silangan sa adlaw,” o miz·rachʹ. (Dan 11:44) Diha sa basahon sa Pinadayag gipunting si Dario ug Ciro ingong maoy naglandong sa “mga hari gikan sa silangan sa adlaw,” maylabot sa pagpahubas sa simbolikong Euprates sa paghukom unya sa Dakong Babilonya.​—Pin 16:​12, 19.

Ang mga astrologo nga miabot aron sa pagtan-aw kang Jesus human sa iyang pagkatawo naggikan sa Babilonya, gikan sa “sidlakang mga bahin.” (Mat 2:1) Sa dihang ilang giingon nga ilang nakita ang iyang bituon “sa sidlakan [Gr., a·na·to·leiʹ, sa literal, “pagsubang”],” sama sa giingon sa ubang mga hubad sa Bibliya, sila wala magpasabot nga kadto maoy sa S sa ilang yuta, hinunoa sila nakakita niini gikan sa Sidlakan o sa dihang didto sila sa Sidlakan.​—Mat 2:​2, ftn sa Rbi8.