Usa ka Amorihanong hari sa panahong ang Israel haduol na sa Yutang Saad. Sa usa ka panahon ang gingharian ni Sihon miabot gikan sa bul-oganang walog sa Jabok, diin ang utlanan niini mao ang dominyo ni Haring Og, hangtod sa bul-oganang walog sa Arnon, ug gikan sa Suba sa Jordan pasidlakan hangtod sa desyerto. Ang iyang kaulohang siyudad mao ang Hesbon, sa S sa amihanang tumoy sa Patayng Dagat. (Num 21:​23, 24; Jos 12:​2, 3) Giilog ni Sihon ang yuta sa Moab sa A sa Arnon, ug mopatim-aw nga iyang gimandoan ang Midian, kay ang mga pangulo sa Midian gitawag ug “mga duke ni Sihon.” (Num 21:26-30; Jos 13:21) Sa dihang ang Israel nagpadalag mga mensahero aron mangayog permiso kang Sihon nga moagi sa iyang gingharian diha sa dalan sa hari ug nagsaad nga dili mokuhag bisan unsa gikan sa mga Amorihanon, si Sihon wala motugot ug nagtigom sa iyang kasundalohan aron babagan ang Israel. Didto sa Jahaz siya gipildi ug gipatay.​—Num 21:21-24; Deu 1:​3, 4; 2:24-35; 3:​2, 6.

Makita ang kahinungdanon sa kadaogan sa Israel batok kang Sihon tungod kay gihisgotan kini sa makadaghan diha sa kasaysayan sa Israel, duyog sa kapildihan sa mga Ehiptohanon didto sa Pulang Dagat. Si Moises, Jepte, usa ka salmista, ug ang mga Levihanon human sa pagkadestiyero naggamit usahay niini ingong makapadasig nga panig-ingnan sa mga kadaogan ni Jehova alang sa iyang matinumanong katawhan. (Num 21:34; Deu 31:4; Huk 11:19-22; Neh 9:​5, 22; Sal 135:9-12; 136:​18, 19) Ang mga taho labot niini ang nag-aghat kang Rahab ug sa mga Gabaonhon nga makigdait sa Israel. (Jos 2:10; 9:​9, 10) Ang yuta ni Sihon gibahinbahin taliwala sa mga tribo ni Ruben ug Gad.​—Num 21:​25, 31, 32; Deu 29:​7, 8; Jos 13:8-10, 15-28.