[Heb., shiq·mahʹ; Gr., sy·ko·mo·reʹa].

Kini nga kahoy nga gihisgotan diha sa Hebreohanong Kasulatan lahi ra sa sikomoro sa Amihanang Amerika, nga maoy usa ka matang sa kahoyng platano. Dayag nga kini mao ra usab ang kahoyng “sikomoro” nga gihisgotan sa Lucas 19:4. Ang Gregong ngalan niini nga kahoy nagtumong sa usa ka kahoyng igos (Gr., sy·keʹ) nga may mga dahon nga sama sa mulberi (Gr., mo·reʹa). Kini nga kahoy (Ficus sycomorus) may bunga nga sama sa komon nga igos, apan ang mga dahon niini kaamgid sa mga dahon sa mulberi. Kini moabot sa gihabogong 10 hangtod sa 15 m (33 hangtod sa 50 p), lig-on, ug mabuhi sulod sa gatosan ka tuig. Dili sama sa komon nga igos, ang sikomoro maoy usa ka evergreen o kanunayng may mga dahon nga tanom. Bisan tuod ang pormag-kasingkasing nga mga dahon niini mas gagmay kay sa mga dahon sa kahoyng igos, ang mga sanga niini baga ug mosanggaka, ug kining kahoya maayong kasilongan. Tungod niana kini sagad gitanom sa daplin sa mga dalan. Ang mubo, supang nga punoan sa kadugayan mosanggaka ug ang ubos nga mga sanga niini halos mosangyad sa yuta, ug tungod niini kini nga kahoy nga daplin sa dalan daling makatkatan sa usa ka gamayng tawo sama kang Zaqueo aron makita si Jesus.​—Luc 19:2-4.

Ang mga sikomoro mamunga nga pinungpong ug kini mas gagmay ug mas ubos ug kalidad kay sa mga bunga sa komon nga kahoyng igos. Sa pagkakaron, nabatasan sa mga Ehiptohanon ug taga-Cipro nga mga tigtanom sa mga kahoyng sikomoro nga tusokon ang linghod pa nga bunga pinaagi sa usa ka lansang o ubang hait nga mga instrumento aron ang bunga mahimong kan-on. Ang pagsamad, o pagtusok, sa mga bunga sa sikomoro sa sayong bahin sa pagpamunga makapagulag daghang gas nga ethylene, nga kusog magpadako ug daling magpahinog sa bunga (tulo hangtod sa walo ka pilo). Hinungdanon kini kay kon dili, ang bunga dili modako ug magpabiling gahi o kitkiton sa mga ligwan nga mosulod sa bunga ug himoon kini nga ilang sanayanan. Kini naghatag ug pipila ka detalye bahin sa trabaho ni manalagnang Amos, kinsa naghubit sa iyang kaugalingon ingong “usa ka tig-alima sa mga hayop ug tigtudyok sa mga igos sa kahoyng sikomoro.”​—Am 7:14.

Gawas pa nga ang mga kahoyng sikomoro mabuhi sa Walog sa Jordan (Luc 19:​1, 4) ug sa palibot sa Tekoa (Am 1:1; 7:14), mas daghan pa gayod kini diha sa mga kapatagan sa Sepela (1Ha 10:27; 2Cr 1:15; 9:27), ug bisan tuod ang ilang bunga dili samag kalidad sa komon nga kahoyng igos, giisip ni Haring David nga kini bililhon tungod kay ang mga kahoyng sikomoro didto sa Sepela iyang gipaatiman sa usa ka administratibong pangulo. (1Cr 27:28) Ang mga kahoyng sikomoro dayag nga daghan sa Ehipto sa panahon sa Napulo ka Hampak, ug tinubdan gihapon kini sa pagkaon didto karong adlawa. (Sal 78:47) Ang kahoy maoy humokon ug daling masuhopan ug tubig ug mas menos ug kalidad kay sa kahoyng sedro, apan kini durable kaayo ug kasagarang gigamit sa pagpanukod. (Isa 9:10) Ang mga lungon nga kahoyng sikomoro nga gibutangan sa gipreserbar nga mga patayng lawas nakaplagan didto sa mga lubnganan sa Ehipto ug lig-on pa gihapon bisag kapin na sa 3,000 ka tuig.