Usa ka ngalan nga gigamit sa pagtawag sa usa ka kamingawan ug sa usa ka siyudad.

1. Usa ka rehiyon sa kamingawan nga ngadto niini ang mga Israelinhon, lagmit usa ka bulan human sa ilang Pagpanggula gikan sa Ehipto, mibalhin human mobiya sa Elim ug sa usa ka dapit nga gikampohan duol sa Pulang Dagat. Human niini nga kamingawan, diha pay daghang dapit nga gikampohan, lakip ang Dopka, Alus, ug Repidim, una pa sila miabot sa Sinai. (Ex 16:1; 17:1; Num 33:9-15) Didto sa Kamingawan sa Sin nga nahitabo sa kampo ang pagbagulbol ug pagreklamo tungod kay walay makaon nga karne. Dinhi si Jehova nagpadangat ug usa ka panon sa mga buntog nga “milukop sa kampo,” ug dinhi ang mga Israelinhon mikaon ug mana sa unang higayon. Dinhi usab nga gisugdan pagpatuman ang balaod sa Igpapahulay.​—Ex 16:2-30.

Ang tukmang nahimutangan sa Kamingawan sa Sin dili matino, apan dayag nga ubay kini sa HK nga utlanan sa Peninsula sa Sinai. Ang mga geograpo sagad mipabor sa pagtuo nga mao kini ang balason nga luna nga nailhang Debbet er-Ramleh, nga nahimutang ubay sa tiilan sa Sinai Plateau. Kining desyertong patag duol usab sa gituohang dapit sa Dopka.

2. Ang Sin maoy lakip sa mga siyudad sa Ehipto nga gitakdang makaagom sa espada nga gipadangat nianang yutaa ni Haring Nabucodonosor sa Babilonya. (Eze 30:​6, 10, 15, 16) Gitawag kini nga “kuta sa Ehipto.” Ang pipila ka awtoridad karong adlawa midawat nga kini mao ang Pelusium nga makaplagan sa Latin nga Vulgate. Ang Pelusium maoy usa ka karaan nga kinutaang siyudad nga nahimutang sa pangunang posisyon sa depensa batok sa pagsulong sa mga kaaway gikan sa kontinente sa Asia. Ang nahimutangan niini gituohan sa kadaghanan nga mohaom sa presenteng-adlaw nga Tell el Farame, usa ka dapit nga mga 32 km (20 mi) sa HS sa Port Said diha sa kabaybayonan sa Mediteranyo. Makita sa nagapanawng mga panon o kasundalohan nga molugsong sa kabaybayonan sa Filistia kini nga kuta nga nagdepensa sa agianan pasulod sa Ehipto. Gihisgotan kini ni Haring Ashurbanipal sa Asirya diha sa iyang mga talaan sa kasaysayan. Karong adlawa kining karaan nga dapit gilibotan sa balas ug kalamakan.