Ang umog o likido nga gikan sa lawas nga gipagawas pinaagi sa mga glandula sa singot ug modaligdig agi sa gagmitoyng mga lungag sa panit. Ang pagpangusog (panahon sa mabug-at nga trabaho), emosyon (sama sa kabalaka), kainit, ug uban pa, mao ang kasagarang hinungdan sa singot.

Human makasala si Adan, siya kinahanglang magbudlay sa pagkinabuhi sa tinunglo nga yuta sa gawas sa tanaman sa Eden, ug himoon niya kini pinaagi sa pagpatulo sa iyang singot bisan pa sa mga tunok ug mga kudyapa. Giingnan siya ni Jehova: “Sa singot sa imong nawong ikaw magakaon sa tinapay hangtod nga ikaw mobalik sa yuta, kay gikan niini ikaw gikuha.”​—Gen 3:17-19.

Sa dihang gipakita kang Ezequiel ang panan-awon labot sa templo, si Jehova nag-ingon nga ang mga saserdote nga nag-alagad didto kinahanglang magsul-ob ug lino nga mga besti ug nga “kinahanglang dili sila magsul-ob ug delana.” Dili sila magsul-ob ug delana o bisan unsa nga “makapasingot.” Tingali gihatag kini nga sugo aron malikayan ang bisan unsang kahugawan nga ipatungha sa singot, o kaha tungod sa singot ang ilang pag-alagad dili makapahimuot inay nga makapalipay, sanglit ang singot nalangkit sa kahago ug kabudlay, sama sa kahimtang ni Adan.​—Eze 44:15-18.

Si Jesus sa Getsemane. Mahitungod kang Jesu-Kristo sa dihang siya didto sa Getsemane sa kataposang gabii sa iyang yutan-ong kinabuhi, ang Lucas 22:44 nag-ingon: “Apan sa nagaantos sa labihang kasakit siya nagpadayon sa pag-ampo nga labi pang matinuoron; ug ang iyang singot nahimong sama sa mga tinulo sa dugo nga nangatagak sa yuta.” Ang magsusulat wala mag-ingon nga ang singot ni Jesus aktuwal nga nasagol sa iyang dugo. Lagmit nga siya mihimo lamang ug usa ka pagtandi, tingali nagpakita nga ang singot ni Kristo nahimong sama sa tinulo sa dugo o aron ihulagway kon sa unsang paagi ang pagtulo sa singot ni Jesus nahisamag dugo nga nagtulotulo gikan sa samad. Sa laing bahin, ang dugo ni Jesus lagmit nga migawas agi sa iyang panit ug nasagolan sa iyang singot. Ang singot nga may dugo giingong mahitabo sa pipila ka kahimtang kon adunay grabeng kapit-osan sa hunahuna. Ang dugo o ang mga elemento sa dugo mogawas agi sa walay-buslot nga mga bungbong sa kaugatan sa kahimtang nga gitawag ug diapedesis, ug sa kahimtang nga gitawag ug hematidrosis mogawas ang singot nga nasagolan ug dugo, o pluwido sa lawas nga may sagol nga dugo, nga mosangpot sa ‘pagsingot ug dugo.’ Siyempre, kini maoy mga ideya lamang kon unsa ang posibleng nahitabo sa kahimtang ni Jesus.

Ang Lucas 22:​43, 44 wala ilakip diha sa Vatican Manuscript Num. 1209, sa Alexandrine Manuscript, sa Syriac Sinaitic nga codex, ug sa gibag-o nga hubad sa Sinaitic Manuscript. Apan, kini nga mga bersikulo makita diha sa orihinal nga Sinaitic Manuscript, sa Codex Bezae, sa Latin nga Vulgate, sa Curetonian Syriac, ug sa Syriac nga Peshitta.