Usa ka matang sa pahiyas. Ang pormag-singsing nga mga pahiyas nga lainlain ug matang, nga gisul-ob sa mga lalaki ug mga babaye, maoy komon taliwala sa mga Hebreohanon, Ehiptohanon, Asiryanhon, Babilonyanhon, Grego, Romano, ug sa ubang mga katawhan sa kakaraanan. Kini gisul-ob diha sa ilong, sa mga dalunggan, ug sa mga tudlo. (Tan-awa ang ARIYOS; SINGSING SA ILONG.) Ang mga materyales nga gigamit alang niini maoy bulawan, plata, tumbaga, bronse, bildo, puthaw, ug garing; ang pipila ka singsing gibutangan ug mga bato. Ang mga Ehiptohanon ilabinang gustong magbaton ug mga singsing nga may mga larawan sa scarab nga bakukang, nga alang kanila maoy simbolo sa walay-kataposang kinabuhi. Lakip sa daghang piraso sa alahas nga nakuha gikan sa lubnganan ni Paraon Tutankhamen sa Ehipto mao ang usa ka singsing nga may tulo ka lukong nga gibutangan ug tulo ka scarab, ang usa gama sa asul nga bildo ug ang duha sa bulawan. Ang pipila ka singsing sa mga Romano gikulitan ug mitolohikanhong mga disenyo o mga larawan pa gani sa ilang mga katigulangan o mga higala.

Diha sa sambingay ni Jesus bahin sa anak nga mausikon, iyang gihisgotan nga ang mapasayloong amahan nagsugo nga sul-oban ug singsing ang kamot sa iyang mipauling anak nga mausikon. (Luc 15:22) Gipakita niini nga buhat ang pag-uyon ug pagmahal sa amahan ingon man ang dignidad, kadungganan, ug ang pagtamod nga gihatag ngadto niining napasig-uling anak. Ang igsoon-sa-inahan ni Jesus nga si Santiago nagtambag sa mga Kristohanon nga dili magpakitag paboritismo niadtong mga tawo nga adunay maanindot ug mga besti ug nanagsul-ob ug mga singsing nga bulawan diha sa ilang mga tudlo (nga nagpaila sa kabahandianon ug sosyal nga kahimtang sa kinabuhi). (San 2:1-9) Sa samang diwa, si apostol Pedro, bisan tuod wala  magkondenar sa pagsul-ob sa maong mga pahiyas, nagpunting nga ang espirituwal nga dayandayan mas labaw pang hinungdanon.​—1Pe 3:1-5.

Igtitimbre nga mga Singsing. Ang Hebreohanong mga pulong nga gigamit sa pagtumong sa usa ka singsing, sa igtitimbre nga singsing, o sa timbre nga singsing naggikan sa lintunganayng mga pulong nga nagkahulogang “unlod” (Jer 38:6) ug “timbre.” (1Ha 21:8) Kini nga mga termino mahimong ilangkit sa pangunang gamit sa pipila ka karaang mga singsing, nga mao, ang paghimog marka diha sa yutang-kulonon o sa talo pinaagi sa ‘pagpaunlod’ o sa pagpaduot diha niini. Kining matanga sa mga singsing maoy gama sa bulawan, plata, o bronse; ang uban gibutangan ug bato nga kinulitan sa ngalan o simbolo sa tag-iya. Kini nga mga singsing adunay permanenteng enggaste o malisoliso o matuyoktuyok nga enggaste. Ang pipila lagmit ikulentas pinaagig pangdayandayan nga kordon.​—Gen 38:​18, 25.

Ang igtitimbre nga singsing sa usa ka magmamando o opisyal maoy usa ka simbolo sa iyang awtoridad. (Gen 41:​41, 42) Ang opisyal nga mga dokumento o mga butang nga dili angayng hilabtan o usbon gitimbrehan niini nga mga singsing, sama sa paggamit sa opisyal nga mga timbre o mga pirma sa modernong mga panahon.​—Est 3:10-13; 8:​2, 8-12; Dan 6:​16, 17.

Mahulagwayong Paggamit. Sa karaang mga panahon ang usa ka igtitimbre nga singsing daw nahimong sanglitanan bahin sa usa ka bililhong butang o tawo. Ang tagna ni Jeremias nagpailang si Haring Conias (Jehoiakin) sa Juda dili makalingkawas sa kalamidad bisan pa kon siya usa ka ‘timbre nga singsing diha sa tuong kamot ni Jehova.’ Si Jehoiakin gipalagpot sa trono human makamando sa mubo kaayong panahon. (Jer 22:24; 2Ha 24:8-15) Dugang pa, si Jehova miingon maylabot sa matinumanong si Zorobabel: “Kuhaon ko ikaw, . . . ug himoon ko ikaw nga usa ka timbre nga singsing, tungod kay ikaw ang akong gipili.” (Hag 2:23) Si Zorobabel, kinsa nag-alagad kang Jehova diha sa usa ka opisyal nga katungdanan maylabot sa pagtukod pag-usab sa templo didto sa Jerusalem, maoy bililhon kang Jehova sama sa usa ka igtitimbre nga singsing diha sa kaugalingong kamot sa Diyos. Walay kahadlok nga gisunod ni Zorobabel ang pagdasig ni Jehova pinaagi sa mga manalagnang si Haggeo ug Zacarias ug midawat sa buluhaton sa pagtukod sa templo bisan pa sa pagdili sa hari sa Persia tungod kay nakadawat kini ug sayop nga impormasyon. (Esd 4:24–​5:2) Padayong gigamit ni Jehova si Zorobabel sa pagtuman sa Iyang gipahayag nga katuyoan, ug walay tawhanong magmamando ang nakapapahawa kaniya gikan sa maong dungganong pag-alagad.