Usa ka pahiyas nga singsing nga itaod sa ilong. Kini isab-it diha sa wala o kaha sa tuong bahin sa ilong o diha sa bahin nga nag-ulang sa mga buho sa ilong ug kini gigamit ilabina sa mga babaye. (Gen 24:22, 30, 47; Isa 3:21) Apan sumala sa ubang mga hubad, ang Ismaelinhong mga lalaki naggamit usab ug mga singsing sa ilong.​—Huk 8:24-26.

Ang Hebreohanong pulong alang sa “singsing sa ilong” (neʹzem) mahimong magtumong usab sa usa ka ariyos, ug sa pipila ka kahimtang, lagmit nga diyutay lamang ang kalainan sa mga porma niini nga mga pahiyas. Usahay ang konteksto maoy magtino kon singsing sa ilong o ariyos ba ang gipasabot.​—Itandi ang Gen 24:47 sa Gen 35:4; Eze 16:12; tan-awa ang SINGSING.

Bisan tuod ang mga singsing sa ilong kasagarang ginama gikan sa bulawan, ang ubang mga materyales, sama sa plata, gigamit usab. Ang mga singsing sa ilong lagmit nga gidayandayanan ug mga lobitos, mga piraso sa korales, o mga mutya, nga isab-it diha niini ingong gagmayng mga pabitay. Nagkadaiya ang diyametro sa mga singsing sa ilong gikan sa 2.5 hangtod sa 7.5 sm (1 hangtod sa 3 pul.). Kay nagbitay man ibabaw sa baba, ang singsing sa ilong kinahanglang ipataas sa dihang mokaon.

Sa Proverbio 11:22 ang usa ka babaye nga matahom lamang sa panggawas nga dagway ug nagsalikway sa pagkamay-salabotan gipakasama sa usa ka “bulawang singsing sa ilong diha sa simod sa baboy.”