Ang usa nga (dili sama sa usa ka ulipon) makadawat ug suweldo alang sa iyang trabaho.

Gilatid sa Balaod nga ang maong mga mamumuo pagabayran sa pagkatapos sa tibuok adlaw nga trabaho. (Lev 19:13; Deu 24:​14, 15) Sa unang siglo K.P., mopatim-aw nga sabotan una ang suhol sa dili pa ang mga mamumuo mosugod sa ilang trabaho, nga ang maong tibuok adlaw nga trabaho maoy 12 ka oras ang gidugayon, gikan sa alas sayis sa buntag hangtod sa alas sayis sa hapon, ug ang naandang suhol sa tibuok adlaw alang sa mga mamumuo sa parasan dayag nga usa ka denario ($0.74). (Mat 20:1-13) Ang gihisgotan sa Kasulatan nga “mga tuig sa usa ka sinuholang mamumuo” daw nagpakita nga tino usab ang gitas-on sa gikasabotang trabaho o kontrata.​—Isa 16:14; 21:16.

Lagmit nga sa Israel daghang mamumuo ang dili tinuli, kay ang Balaod naglatid nga sila dili moambit sa Paskuwa, bisan tuod ang tinuling mga ulipon makahimo sa pag-ambit sanglit sila giisip ingong mga sakop sa usa ka Israelinhong banay. Sa susama, bisan tuod nga ang sinuholang mga mamumuo sa usa ka saserdote dili makakaon sa balaang mga butang, wala kini idili ngadto sa tinuling mga ulipon, sanglit sila mga sakop man usab sa panimalay sa saserdote.​—Ex 12:43-45; Lev 22:​10, 11.

Ang usa ka Israelinhon kinsa, tungod sa kapit-os sa pinansiyal, magbaligya sa iyang kaugalingon ingong ulipon ngadto sa isigka-Israelinhon, o sa usa ka langyawng pumoluyo, sa usa ka lalin, o sa usa ka sakop sa pamilya sa langyawng pumoluyo, dili pagalupigan, kondili pakitaan ug nahiangayng konsiderasyon sama sa usa ka sinuholang mamumuo. Unya, kon sa iyang kahimtang dili posibleng makapahimulos sa katungod sa paglukat, siya pagawason gikan sa pagkaulipon sa ikapitong tuig sa iyang pagkaulipon o kaha sa tuig sa Tinghugyaw, depende kon hain ang mauna.​—Ex 21:2; Lev 25:​39, 40, 47-49, 53; Deu 15:12; tan-awa ang ULIPON.

Usahay ang sinuholang mga mamumuo abusohan sa ilang mga amo. Pinaagi sa iyang manalagnang si Malaquias, si Jehova nagpasidaan nga Siya mahimong usa ka matulin nga saksi batok sa mga nanikas sa suhol sa sinuholang mamumuo.​—Mal 3:5; tan-awa usab ang San 5:4; SUHOL.

Ang sinuholang mamumuo kasagarang maghinamhinam sa pagpaabot sa pagkatapos sa tibuok adlaw nga trabaho ug sa pagdawat sa iyang suhol. (Job 7:​1, 2) Siya sagad wala maghunahuna sa bug-os nga kaayohan sa iyang amo, sumala sa makita sa gipamulong ni Jesu-Kristo nga, dili sama sa sinuholang tawo kinsa mokalagiw sa panahon sa kapeligrohan, siya, ingong Maayong Magbalantay, magatugyan sa iyang kalag alang sa mga karnero.​—Ju 10:11-15; tan-awa usab ang Jer 46:21.