[Heb., teʼash·shurʹ].

Usa ka evergreen o kanunayng may mga dahon nga kahoy nga kapamilya sa mga kahoyng nagapamungag kono (cone). Ang sipres maoy lakip sa ubang mga kahoy nga nahimong bahin sa “himaya sa Lebanon,” ug kini nagpaila sa dapit diin kini makaplagan ug usab nagpaila sa usa ka kahoy nga maayog kalidad o maanindot ug hitsura. Ang “box tree” nga gihisgotan sa King James Version lagmit dili husto nga hubad sanglit, sumala sa pipila ka eskolar, ang box tree dili mabuhi sa Palestina, ug sa Sirya kini maoy usa lamang ka gamay nga kahoykahoy. (Unger’s Bible Dictionary, 1965, p. 1134; The Interpreter’s Dictionary of the Bible, giedit ni G. Buttrick, 1962, Tomo 2, p. 292) Ang sipres giisip sa daghan nga mao ang kahoy nga lagmit mao ang gitumong sa Hebreohanong pulong diha sa Isaias 41:19; 60:13.​—Tan-awa ang hubad ni Moffatt; A Dictionary of Life in Bible Times, ni W. Corswant, Suffolk, 1960, p. 55; The Interpreter’s Dictionary of the Bible, Tomo 1, p. 459; Tomo 2, p. 292; Lexicon in Veteris Testamenti Libros, ni L. Koehler ug W. Baumgartner, Leiden, 1958, p. 1017.

Ang sipres (Cupressus sempervirens) may lubos-berde nga mga dahon ug mga sanga nga nagtuhoy nga daw susama nianang sa Lombardy poplar. Kini adunay aberids nga gitas-on nga 9 hangtod sa 15 m (30 hangtod sa 50 p) apan usahay ang gitas-on mahimong moabot ug 24 m (80 p). Kini sagad nga gitanom sa tibuok Palestina; ang pipila ka matang niini nakaplagang nanubo sa Gilead, Edom, ug sa mga bakilid sa Bukid sa Lebanon. Ang kahoy niini lubos pula, humot, ug lig-on kaayo. Lagmit nga gigamit kini sa mga Fenicianhon, Cretanhon, ug mga Grego sa pagbuhat ug mga barko (Eze 27:6), ug gituohan sa pipila nga ang “kahoyng salongon” nga gigamit ni Noe sa paghimo sa arka mao ang kahoyng sipres.​—Gen 6:14; tan-awa ang SALONGON, KAHOYNG.

Sa Isaias 41:19 si Jehova nagsaad nga ang mga kahoy nga naandang nanubo diha sa tabunok nga kayutaan molambo usab diha sa mga desyerto, ug diha sa tagna mahitungod sa umaabot nga pagbayaw ug kauswagan sa Zion, gitagna nga ang sipres, uban sa fresno ug sa junipero, gamiton sa pagpatahom sa dapit sa sangtuwaryo sa Diyos.​—Isa 60:13.

Sa Ezequiel 27:​6, ang ekspresyon nga “sa kahoyng sipres” nahiuyon sa mga Targum. Apan, ang Hebreohanon niini maoy bath-ʼashu·rimʹ ug nagkahulogang “ang anak nga babaye sa mga Asurihanon.” Daghang eskolar ang naghunahuna nga kining duha ka Hebreohanong pulong angayng basahon ingong usa ka pulong, bith·ʼash·shu·rimʹ, nga nagkahulogang “sa kahoyng sipres.”