Usa ka haring Ehiptohanon nga nailhan ingong Sheshonk (I) diha sa Ehiptohanong mga rekord. Si Sisak, nga giisip ingong mao ang magtutukod sa “dinastiya sa Libya,” gipasidunggan sa kadaghanan nga nagmando ug mga 21 ka tuig. Ang iyang anak nga lalaki nga si Osorkon I maoy mipuli kaniya sa trono.

Sa dihang si Jeroboam mikalagiw ngadto sa Ehipto aron makaikyas sa kapungot ni Haring Solomon, si Sisak maoy nagmando didto. (1Ha 11:40) Mga pipila ka tuig sa ulahi, sa ikalima nga tuig sa pagmando sa manununod ni Solomon nga si Rehoboam (993 W.K.P.), si Sisak misulong sa Juda uban ang usa ka gamhanang puwersa sa mga karo ug mangangabayo. Iyang nailog ang kinutaang mga siyudad sa Juda ug unya miadto sa Jerusalem. Apan wala itugot ni Jehova nga iyang malaglag ang Jerusalem, kay si Rehoboam ug ang mga prinsipe sa Juda nagpaubos sa ilang kaugalingon sa dihang nakadawat ug mensahe gikan sa manalagnang si Semaias. Hinunoa, giagawan ni Sisak ang siyudad sa mga bahandi niini.​—2Cr 12:1-12.

Adunay arkeolohikanhong ebidensiya nga gisulong ni Sisak ang dapit sa Palestina. Usa ka tipak sa usa ka bantayog nga nakaplagan sa Megido naghisgot kang Sheshonk (Sisak), lagmit nagpakitang ang bantayog gipatindog didto aron handomon ang iyang kadaogan. (Ancient Near Eastern Texts, giedit ni J. Pritchard, 1974, pp. 263, 264) Dugang pa, usa ka linilok diha sa paril sa templo sa Karnak (ang A nga bahin sa Thebes nga karaang siyudad sa Ehipto) ang nagtala sa daghang siyudad o mga balangay nga gisakop ni Sisak. (HULAGWAY, Tomo 1, p. 952; Supplements to Vetus Testamentum, Leiden, 1957, Tomo IV, pp. 59, 60) Ubay-ubay sa maong mga dapit nga mahimong ilangkit sa mga lugar nga gihisgotan sa Bibliya ang nahimutang sa teritoryo sa napulo-ka-tribong gingharian. Kini nagpakita nga ang tuyo ni Sisak sa iyang pagpakiggubat, dili aron tabangan ang napulo-ka-tribong gingharian, kondili aron makontrolar ang mahinungdanong mga ruta sa negosyo ug sa ingon mapadako pa ang gahom ug impluwensiya sa Ehipto.