1. Pangulo sa kasundalohan ilalom sa Canaanhon nga si Haring Jabin. Si Sisera, nga nagpuyo sa Haroset inay sa siyudad ni Jabin sa Hazor, mas inila diha sa asoy kay kang Haring Jabin. Wala madugay human nga si Maghuhukom Ehud nagpukan sa pagmando sa mga Moabihanon, gilupigan ni Sisera ug Jabin ang Israel sulod sa 20 ka tuig.​—Huk 4:​1-3; 1Sa 12:9.

Sa pagkadungog nga gitigom ni Debora ug Barak ang mga Israelinhon aron makig-away batok kaniya, gitigom ni Sisera ang iyang kasundalohan lakip ang iyang 900 ka karo nga tinaoran ug puthawng mga sanggot, ug giharong ang Israel sa bul-oganang walog sa Kison. Apan si Jehova nakig-away batok kang Sisera ug gipahinabo nga magkaguliyang ang tibuok niyang kasundalohan, sa ingon nakaagom sila ug bug-os nga kapildihan.​—Huk 4:​7, 12-16, 23; 5:​20, 21; Sal 83:9.

Ang iyang mga karo miungot sa kalapokan (itandi ang Huk 5:21), ug si Sisera midagan sa pagkalagiw ug nakaabot sa tolda ni Jael, ang asawa ni Heber nga Kenihanon, kinsa may pakigdait kang Jabin. Iyang gipasulod si Sisera. Kay gikapoy tungod sa gubat ug sa pagkalagiw, ang naluya nga si Sisera, nga nagsalig nga siya hilwas sa tolda ni Jael, nakahukom nga mopahulay. Gihatagan ni Jael si Sisera ug gatas nga mainom, ug gihangyo niya si Jael nga bantayan siya. Sa dihang siya nahinanok, si Jael mihinok sa pagduol kaniya ug iyang gibugsok ang ugsok sa tolda sa iyang mga tampihak lapos sa yuta. Sa dihang miabot si Barak, gipakita ni Jael kaniya ang napukan nga kaaway. (Huk 4:​9, 17-22; 5:25-27) Ang inahan ni Sisera ug ang iyang panimalay kawang nga naghulat sa iyang pagbalik nga magdala ug daghang inagaw.​—Huk 5:28-30.

2. Katigulangan sa usa ka pamilya sa mga Netinim nga mibalik sa Jerusalem uban kang Zorobabel niadtong 537 W.K.P. (Esd 2:​1, 2, 43, 53; Neh 7:55) Lakip sa mga Netinim mao ang mga binihag sa gubat, ug bisan tuod ang pipila lagmit gidala sa panahon nga si Sisera (Num. 1) napildi ug tingali nahimong mga sulugoon sa templo, walay katarongang mohinapos nga ang mga Netinim nga mibalik gikan sa Babilonya maoy mga kaliwat ni Sisera sa panahon ni Barak.