[Heb., tin·sheʹmeth].

Usa ka dako, madanihong langgam sa tubig nga taas, yagpis, ug bawog ang liog. Ang ubang mga sisne motimbang ug hangtod sa 18 kg (40 lb) ug ang sukod sa mga pako niini kon bukhad maoy mga 2.5 m (8 p).

Ang Hebreohanong ngalan (tin·sheʹmeth), nga makaplagan diha sa talaan sa mahugawng naglupad nga mga linalang (Lev 11:​13, 18; Deu 14:​12, 16), maoy gikan sa lintunganayng pulong nga nagkahulogang “hangos.” (Isa 42:14) Kini nga pulong  lagmit naghubit sa kusog nga pagsagitsit sa sisne sa dihang kini makuratan o masuko, ug ingon niini ang pagkahubad diha sa daghang hubad (KJ, Da, Le, NW, Ro, Yg). Kini nga identipikasyon maoy sukad pa sa paghubad sa Latin nga Vulgate, diin si Jerome naghubad sa Hebreohanong tin·sheʹmeth (sa Lev 11:18) pinaagi sa Latin nga pulong nga cycnus (sisne). Ang mas nahauna nga Gregong Septuagint naghubad niini nga “purple coot” (Gr., por·phy·riʹon), lagmit mao ang purple gallinule (Porphyrio porphyrio). Hinunoa, kining duha ka karaang mga bersiyon naghubad sa tin·sheʹmeth ingong langgam nga “ibis” diha sa Deuteronomio 14:​16, sa ingon nagpakita nga sila usab dili segurado.

Ang sisne, bisan tuod makaplagan sa Palestina, dili na komon didto sa pagkakaron. Tungod niini, ug usab tungod kay tanom ang pangunang pagkaon sa sisne, mas gituohan sa daghang modernong mga maghuhubad nga ang tin·sheʹmeth mao ang “himungaan sa tubig” (RS, Mo), “agilang-bukaw” (AT), “ibis” (JB), o ubang mga langgam nga nailhan nga kumakaon ug karne o tigkaon ug hugaw. Apan bisan pag talagsa rang makita ang mga sisne didto sa Palestina sa pagkakaron, kini dili gayod ebidensiya nga kini dili komon nianang dapita kaniadto. Sa susama, angayng ilhon nga ang pagklasipikar sa pipila ka langgam ingong mahugaw sumala sa pagkamanunukob o pagkatigkaon ug hugaw niini maoy banabana lamang ug wala direktang hisgoti sa Bibliya.

Gawas pa sa naandang pagkaon niini nga mga liso, mga gamot sa mga tanom sa tubig, ug mga ulod, ang sisne nahibaloang mokaon usab ug kinhason.