[[Mga Kahoyng] Akasya].

1. Usa ka dapit sa desyertong kapatagan sa Moab diin nakaabot ang pagkampo sa mga Israelinhon gikan sa Bet-jesimot. (Num 25:1; 33:49; Jos 2:1) Mopatim-aw nga ang “Sitim” maoy pinamubo sa ngalang Abel-sitim (Sapa sa [mga Kahoyng] Akasya). Gituohan sa pipila nga kini mao ang Tell el-Kefrein, usa ka mubo nga bungtod nga mga 8 km (5 mi) sa AS sa Bet-jesimot (ang Tell el-ʽAzeimeh, duol sa AS nga kiliran sa Patayng Dagat). Apan, mas gituohan nga mao kini ang Tell el-Hammam, usa ka mas dakong luna nga maayo kaayong pagkapuwesto ug nahimutang nga 2.5 km (1.5 mi) sa S sa Tell el-Kefrein.

Pinaagi sa iyang manalagna nga si Miqueas, si Jehova nagpahinumdom sa mga Israelinhon sa iyang nahimo alang kanila: “Oh akong katawhan, hinumdomi, palihog, ang gitambag ni Balak nga hari sa Moab, ug ang gitubag kaniya ni Balaam nga anak nga lalaki ni Beor. Gikan kadto sa Sitim, hangtod sa Gilgal, aron ang matarong nga mga buhat ni Jehova mahibaloan.” (Miq 6:5) Samtang ang Israel nagkampo sa Kapatagan sa Moab, nga naglakip sa Sitim, gipakyas ni Jehova ang pagsulay ni Balak nga ipatunglo kang Balaam ang mga Israelinhon; iyang gibabagan ang paningkamot sa Moab sa pagpahamtang ug kadaotan sa iyang katawhan. Gipahinabo niyang mapildi sa Israel ang mga Midianhon, kinsa, uban sa mga Moabihanon, miapil sa pagdaldal sa daghang Israelinhon aron malangkit sa imoralidad ug idolatriya. Gidala ni Jehova ang Israel tabok sa Jordan pinaagi sa usa ka milagro, ug didto sa Gilgal iyang ‘gipahilayo ang kaulawan sa Ehipto.’​—Num 22:4–​25:8; 31:3-11, 48-50; Jos 3:​1, 14-17; 5:9.

2. Kon kini nagtumong sa usa ka partikular nga bul-oganang walog, “ang bul-oganang walog sa mga Kahoyng Akasya” (Sitim) lagmit mao ang ubos nga agosanan sa bul-oganang walog sa Kidron.​—Joe 3:18.