Ang ngalan sa ikatulong lunar nga bulan sa sagradong kalendaryo sa mga Hudiyo human sa pagkadestiyero, apan ang ikasiyam nga bulan sa sekular nga kalendaryo. (Est 8:9; 1Cr 27:5; 2Cr 31:7) Kini katumbas sa bahin sa Mayo ug bahin sa Hunyo. Ang kahulogan niini nga ngalan dili matino.

Ang Sivan magsugod sa kataposan sa tingpamulak sa dihang magsingabot ang grabeng ting-init. Kini mao ang panahon sa pagpangani sa trigo ug usab ang sayong bahin sa ting-init, nga magpadayon hangtod sa mga tungatunga sa Oktubre o sa lunar nga bulan sa Bul. (Ex 34:22; Pr 26:1) Sa walay duhaduha kini mao ang bulan nga ang manalagnang si Samuel nag-ampo kang Jehova ug mibunok ang kusog nga ulan bisag dili ting-ulan, nga nagpahinabog dakong kahadlok taliwala sa katawhan. (1Sa 12:16-19) Niining panahona ang “sayo nga mga igos” nga ipamunga sa hinapos nga mga bulan sa tingtugnaw mangahinog na. (Isa 28:4; Jer 24:2) Sa dapit sa kabaybayonan sa Mediteranyo, tingmansanas na usab.​—Aw 2:3; itandi ang Joe 1:10-12.

Ang Pista sa mga Semana, o Pentekostes, pagasaulogon sa ikaunom nga adlaw sa Sivan, nga pagaduyogan sa pagtanyag sa unang mga bunga sa ani sa trigo, sa ika-50 nga adlaw human sa pagtanyag sa unang mga bunga sa ani sa sebada. (Ex 34:22; Lev 23:15-21) Niining ikaunom nga adlaw sa Sivan, sa tuig 33 K.P., ang balaang espiritu gibubo nganha sa grupo sa mga 120 ka tinun-an nga nagtigom didto sa itaas nga lawak sa Jerusalem. Ang 3,000 ka tawo nga nabawtismohan nianang adlawa maoy gikan sa mga panon nga nagtigom sa siyudad alang sa pista.​—Buh 1:15; 2:1-42.

Gisaulog ni Haring Asa sa bulan sa Sivan ang usa ka dakong pista human sa iyang buluhatong pagreporma sa pagpapha sa bakak nga relihiyon gikan sa Juda, Jerusalem, ug sa ubang mga dapit. (2Cr 15:8-10) Ang tulin nga mga mensahero nga gisugo ni Haring Ahasuero aron ihatod ang mensahe nga naghatag sa mga Hudiyo sa katungod sa pagpanalipod sa ilang kaugalingon sa ika-13 ka adlaw sa Adar gipadala halos siyam ka bulan una pa niana, sa ika-23 ka adlaw sa Sivan, ngadto sa 127 ka sakop nga mga distrito sa Imperyo sa Persia gikan sa India hangtod sa Etiopia.​—Est 8:9-14.