[lagmit, Sanga [sa Usa ka Kahoy]].

1. Usa ka siyudad sa Juda diha sa Sepela nga mopatim-awng gihisgotan ingong Soco ug Socoh. (Jos 15:​20, 33, 35) Ang mga Filistehanon nagtigom sa ilang kasundalohan didto sa Socoh ug dayon nagkampo sa duol nga Epes-damim sa wala pa makig-away si Goliat kang David. (1Sa 17:1) Katuigan sa ulahi mopatim-aw nga kini nga Soco nalakip sa mga siyudad nga gipalig-on ni Rehoboam. (2Cr 11:5-7; hinuon, kini nga asoy mahimong magtumong usab sa Num. 2.) Bisan pa niana, ang Soco ug ang uban sa sakop nga mga lungsod niini, nailog sa mga Filistehanon kapin sa 200 ka tuig sa ulahi panahon sa pagmando ni Haring Ahaz. (2Cr 28:16-18) Gituohan nga kini mao ang mga kagun-oban sa Khirbet ʽAbbad (Horvat Sokho), sa Ubos nga Patag sa Elah nga mga 4 km (2.5 mi) sa SHS sa Azeka, bisan tuod ug ang Khirbet Shuweikeh  nga haduol ra dapit sa S, mopatim-aw nga nagpreserbar sa Biblikanhong ngalan.

2. Usa ka siyudad sa bukirong rehiyon sa Juda. (Jos 15:​20, 48) Sagad gituohan nga kini mao ang Khirbet Shuweikeh, mga 17 km (11 mi) sa HK sa Hebron. Lahi kini nga Khirbet Shuweikeh kay sa usa nga gihisgotan sa Num. 1.

3. Usa ka dapit nga ilalom sa pagdumala sa usa sa mga luyoluyo ni Solomon. (1Ha 4:​7, 10) Ang pangagpas nga kini mao ang Khirbet Shuweiket er-Ras, mga 15 km (9.5 mi) sa KAK sa Samaria, daw mohaom sa asoy sanglit ang giingong mga dapit sa Arubot ug Heper (nga gihisgotan uban sa Socoh diha sa asoy sa Mga Hari) anaa ra sa duol.

4. Diha sa talaan sa mga kaliwat ni Juda, si Heber gitawag nga “amahan ni Soco.” (1Cr 4:18) Ang Soco lagmit maoy usa ka personal nga ngalan sa kaliwat ni Heber, o ang teksto mahimong magpaila nga si Heber mao ang nagpundar sa siyudad sa Soco o ang gigikanan sa katawhan niini. Kon ibutang ta nga husto kining ulahing kahimtang, dili matino kon ang gitumong dinhi mao ba ang Soco(h) sa Num. 1 o sa Num. 2.