Mga galamiton nga ang pipila adunay taklob (Num 19:15), nga kasudlan ug mga likido o uga nga mga pagkaon ug mga butang. (1Ha 17:10; Est 1:7; Jer 40:10) Daghan niini ang gama sa yutang-kulonon, kahoy, metal, o bato. (Lev 6:28; 15:12; Num 7:85; 1Ha 10:21; Mat 26:7) Ang komon nga mga sudlanan naglakip sa mga banga ug mga “panaksan” (Isa 22:24), mga puntil o mga sako (Gen 42:25; Hag 1:6), mga bukag (Mar 8:​19, 20; 2Co 11:33), panit nga mga sudlanan (Huk 4:19; Luc 5:​37, 38), ug mga timba.​—Num 24:7; Ju 4:11; tan-awa ang GALAMITON.

Mga Tadyaw, Banga, ug mga Tibod. Ang tadyaw o banga, nga sagad lawom nga silindrong sudlanan nga may usa, duha, o upat pa gani ka kuptanan, kasagaran maoy mga kulonon (Isa 30:14; Lam 4:2) ug usahay, gama sa bato. (Ju 2:6) Ang komon nga banga sa panahon sa mga gingharian sa Juda ug Israel lagmit maoy mga 65 sm (25 pul.) ang gitas-on nga may diyametro nga mga 40 sm (16 pul.). Ang ubang mga banga adunay mga bukilya. (2Ha 4:2) Ang mga tadyaw o banga lagmit ipatong diha sa usa ka tungtonganan (Lev 11:35) ug gigamit ingong sudlanan sa mga likido sama sa tubig o lana (1Ha 18:33; 2Ha 4:2), ug ang dagkong mga tadyaw gigamit ingong mga sudlanan sa bino. (1Sa 10:3; 25:18; 2Sa 16:1; Jer 13:12) Dugang pa ang ugang mga butang, sama sa harina, ibutang usab diha sa mga tadyaw. (1Ha 17:12) Usahay ang mga dokumento, lakip sa mga sulat-kalig-onan sa pagpalit, tipigan diha sa mga banga nga kulonon o mga sudlanan. (Jer 32:13-15) Daghang karaang mga manuskrito ang napreserbar niining paagiha diha sa mga banga sa dapit sa Qumran duol sa Patayng Dagat, nga lakip niini nga mga manuskrito mao ang nabantog nga Linukot nga Basahon ni Isaias sa Patayng Dagat.

Ang mga tibod sa tubig (1Sa 26:​11, 12, 16; 1Ha 19:6) ug mga tibod (1Sa 10:1; 1Ha 14:3; 2Ha 9:3; Jer 19:​1, 10) sagad maoy mga kulonon.

Mga Panaksan, Pinggan, ug mga Bandihado. Ang mga panaksan gigamit ingong mga sudlanan sa mga likido sama sa bino (Am 6:6), gatas (Huk 5:25), ug tubig (Huk 6:38). Kini maoy gama sa yutang-kulonon, bato, ug metal. Ang ubang pangbangkete nga mga panaksan maoy mga seramik. Ingon sa gipakita sa mga nadiskobrehan sa mga arkeologo, sa mga adlaw sa mga gingharian sa Juda ug Israel, ang seramik nga mga panaksan nag-aberids ug mga 20 sm (8 pul.) ang gitas-on, may diyametro sa sulod nga bahin nga mga 40 sm (16 pul.), ug usahay may upat ka kuptanan. Kon itandi sa mga panaksan, ang mga pinggan ug mga bandihado magbaw ra.​—Ex 25:29; 37:16; Num 4:7; 7:​84, 85; Mat 14:​8, 11; Mar 6:​25, 28.

Mga Kopa. Ang kopa, nga medyo gamayng sudlanan nga gigamit sa pag-inom ug mga likido, sagad gama sa yutang-kulonon, bisan tuod usahay gama sa metal. (Pr 23:31; Jer 35:5; Mar 9:41) Ang ubang mga kopa giumol nga sakar kaayo sa kamot sa dihang gunitan. Sagad kini mabaw nga mga panaksan nga walay mga gunitanan. Kadtong adunay mga gunitanan mahimong gamiton usab ingong mga kabo.

Mahulagwayong Paggamit. Gipakita sa magtitigom nga inigkamatay sa usa ka tawo “magupok ang banga sa tubod.” Lagmit kini nga banga mao ang kasingkasing, nga inigkamatay mohunong sa pagdawat ug pagpasa sa dugo ngadto sa tibuok lawas. Kini mahimong walay pulos sama sa nabuak nga banga nga dili na kasudlan ug tubig. Dugang pa, ang utok nga maoy gitumong sa mahulagwayong pagkahubit ingong usa ka “panaksang bulawan” (dayag nga mao ang bagolbagol diin ang utok anaa niini), mohunong sa pag-obra, nga samag ‘nabuak.’​—Ecc 12:​6, 7.

Mga sudlanan. Ang Kasulatan sagad naghisgot sa mga tawo ingong mga sudlanan. (Buh 9:15) Ang mga Kristohanon maoy huyang nga kulonong mga sudlanan nga gipiyalan ug mahimayaong bahandi, ang ministeryo. (2Co 4:7) Ang mga babaye gitawag ingong “sudlanan nga mas mahuyang.” Busa, pinaagi sa pagtagad sa pisikal ug biolohikal nga mga limitasyon sa ilang mga asawa, sama sa gibuhat ni Jehova diha sa Balaod nga gihatag  ngadto sa Israel (Lev 18:19; 20:18), ang Kristohanong mga bana molihok “sumala sa kahibalo, nga maghatag kanila ug kadungganan samag ngadto sa usa ka sudlanan nga mas mahuyang, ang babaye.”​—1Pe 3:7.

Ang usa ka tawo angayng magpabiling bulag gikan sa mga sudlanan nga “dili dungganon” (mga tawong wala mogawi sa hustong paagi) ug magkinabuhi nga uyon sa kabubut-on ni Jehova. Busa siya mahimong “sudlanan alang sa katuyoang dungganon, binalaan, mapuslanon sa iyang tag-iya, andam alang sa tanang maayong buhat.” (2Ti 2:​20, 21) Tungod kay si Jehova wala dayon magpahamtang ug kalaglagan batok sa “mga sudlanan sa kapungot,” nga mao ang mga tawong daotan, natagan-an ug kaluwasan ang mga tawong hustong nakiling sa pagkamatarong tungod kay kini naghatag kanilag panahon nga maumol ingong “mga sudlanan sa kaluoy.”​—Rom 9:17-26.

Kopa. Ang kopa sagad gigamit ingong simbolo sa panimalos o sa kasuko sa Diyos. Gikan sa maong kopa mahimong paimnon ang mga tawong daotan, mga siyudad, o bisan ang mga katawhan ug mga kanasoran. (Sal 11:6; 75:8; Isa 51:​17, 22; Jer 25:12-29; 51:41; Lam 4:21; Pin 14:​9, 10; 16:19; 18:​5-8) Pananglitan, ang karaang Babilonya gipakasamag usa ka “kopang bulawan diha sa kamot ni Jehova,” nga gikan niana ang daghang kanasoran napugos sa pag-inom sa mapait nga bino sa kapildihan.​—Jer 51:7.

Sa dihang nagsingabot ang kalaglagan sa Jerusalem, ang mga molupyo gisultihan nga ang mga tawo dili “maghatag kanila sa kopa sa paghupay aron imnon tungod sa amahan sa usa ug tungod sa inahan sa usa.” Lagmit kini nagtumong sa usa ka kopa sa bino nga gipainom sa usa ka tawong nagbalata tungod sa kamatayon sa iyang mga ginikanan.​—Jer 16:5-7; itandi ang Pr 31:6.

Ang simbolikong “kopa” nga gibubo ni Jehova alang kang Jesu-Kristo nagtumong sa Iyang kabubut-on alang kang Jesus. Sa walay duhaduha tungod sa dakong kabalaka ni Kristo nga ang iyang kamatayon ingong usa ka tawo nga gisumbong sa pagpasipala ug pag-alsa makahatag gayod ug kaulawan sa Diyos, si Jesus miampo nga kon mahimo isaylo unta kining “kopa” gikan kaniya. Bisan pa niana, andam siya nga magpasakop sa kabubut-on ni Jehova ug imnon kana. (Mat 26:​39, 42; Ju 18:​10, 11) Ang gihatag ni Jehova nga bahin, o “kopa,” alang kang Jesus nagkahulogan nga dili lamang si Jesus makasinati ug pag-antos kondili siya usab makasinati ug bawtismo ngadto sa kamatayon ug nga human niana siya mabanhaw ngadto sa imortal nga kinabuhi sa langit. (Luc 12:50; Rom 6:​4, 5; Heb 5:7) Busa, kadto usab mao “ang kopa sa dakong kaluwasan” alang kang Kristo. (Sal 116:13) Uyon sa kabubut-on sa Diyos, ang “kopa” nga gihatag kang Jesu-Kristo nga iyang imnon gipakig-ambit usab niya sa “gamayng panon,” ang iyang kaubang mga manununod sa Gingharian.​—Luc 12:32; Mar 10:35-40.