ANG Jerusalem​—kanhi mao ang sentro sa matuod nga pagsimba kang Jehova nga Diyos, apan dili na mao ang siyudad nga nagdala sa ngalan sa Diyos. Ang Jerusalem nawad-an sa pinaborang posisyon niini human kini mag-apostata gikan sa mga pagtulon-an sa Pulong sa Diyos ug misalikway sa Mesiyas nga si Jesus. (Luc 13:​34, 35) Apan, bisan hangtod karong adlawa, ang Jerusalem dulot nga nakapaikag sa mga mahigugmaon sa Bibliya tungod kay ang mga panghitabo nga hinungdanon alang sa tibuok uniberso nahitabo didto.

Ang usa ka talan-awon sa siyudad gikan sa itaas dapit sa habagatan (sama sa makita niini nga panid) nagpakita sa mga dagway sa mga dapit diha sa Jerusalem. Ang Bukid sa Moria, diin ang templo nahimutang, makita sa unahan. Sa atubangan mao ang Bukid sa Zion, nga gilibotan sa bul-oganang walog sa Kidron sa sidlakan ug sa Walog sa Tyropoeon sa kasadpan. Ang Siyudad ni David gitukod sa ibabaw sa Bukid sa Zion.

Kon magbarog sa ibabaw sa Bukid sa mga Olibo dapit sa sidlakan sa Jerusalem, malantaw sa usa ang Walog sa Kidron ug makita ang dapit diin kanhi nahimutang ang templo. Karon giokupahan na kini sa usa ka ampoanan sa mga Muslim nga gitawag ug Dome of the Rock. Si Jesus “naglingkod sa Bukid sa mga Olibo nga malantaw ang templo” sa dihang iyang gihatag ang iyang bantogang tagna bahin sa “kataposan sa sistema sa mga butang.”​—Mar 13:3; Mat 24:3.