Usa ka titulo nga kasagarang gihatag ngadto sa Edomhanon ug Horihanong mga pangulo sa tribo, ang mga anak nga lalaki ni Esau ug ang mga anak nga lalaki ni Seir nga Horihanon. (Ex 15:15) Sa Hebreohanon kini nga titulo maoy ʼal·luphʹ, nga nagkahulogang “hepe,” “pangulo sa usa ka libo.” (Tan-awa ang Gen 36:​15, ftn sa Rbi8.) Ang karaang Edomhanon ug Horihanong titulo maoy katumbas sa titulong “sultan” nga gigamit alang sa mga pangulo sa tribo taliwala sa modernong mga Bedouin. Sa pipila ka hubad sa Bibliya ang mga titulo nga “hepe,” “pangulo,” ug “duke” mao ang gigamit inay ang “sultan.”

Gitala ang pito ka sultan sa mga Horihanon, nga ang tanan maoy “mga anak nga lalaki ni Seir.” (Gen 36:​20, 21, 29, 30) Dayag nga dihay 14 ka sultan sa Edom: pito ka apong lalaki gikan sa panganay ni Esau nga si Elipaz nga anak nga lalaki sa iyang asawa nga si Ada, upat ka apong lalaki gikan sa iyang anak nga si Reuel nga anak nga lalaki sa iyang asawa nga si Basemat, ug tulo sa iyang mga anak nga lalaki pinaagi sa iyang asawa nga si Oholibama. (Gen 36:15-19) Apan giduhaduhaan kon angay bang iapil ang sultan nga si Kore kinsa gilakip sa mga anak nga lalaki ni Elipaz. Kon ang paglakip sa sultan nga si Kore maoy usa ka sayop sa magkokopya, ingon sa gituohan sa uban, kini magkahulogan nga adunay 13 lamang ka sultan sa Edom. (Gen 36:​16, ftn sa Rbi8) Ang mga banay nga naporma gikan niini nga mga sultan gitawag sumala sa ilang mga ngalan.

Sa Genesis 36:40-43 ug 1 Cronicas 1:51-54 gihatag ang usa ka lahing talaan sa “mga sultan ni Esau [Edom].” Lagmit nga kini maoy ulahing mga sultan kay sa naunang gitala. Apan ang pipila ka komentarista nagtuo nga kini nga mga ngalan dili mga ngalan sa mga tawo kondili maoy mga ngalan sa mga siyudad o mga rehiyon diin ang lainlaing gingharian sa mga sultan nahimutang. Sa pagsunod niini nga panglantaw, ang hubad sa Jewish Publication Society mabasa: “ang pangulo sa Timna, ang pangulo sa Alva,” ug uban pa.