[Heb., ʽa·ghurʹ].

Ang ngalan sa daghag matang nga langgam nga kasarangan ug gidak-on nga sama sa langgam nga thrush nga makaplagan sa Aprika ug sa habagatang Asia, lakip sa Palestina. Ang tagbaya sa kinaiyanhon mubog liog, mugbog mga pako, ug taas ug ikog. Bisan tuod ang daghang hubad naghubad sa ʽa·ghurʹ ingong langgam nga “crane,” ang paghisgot ni Ezequias sa langgam nga ‘nagtuwit-tuwit’ dili gayod mohaom sa malanog nga tingog niining dakong langgam. (Isa 38:14) Ang Lexicon in Veteris Testamenti Libros (ni L. Koehler ug W. Baumgartner, Leiden, 1958, p. 679) naghubad sa ʽa·ghurʹ ingong tagbaya (Pycnonotus Reichenovi). Si Ludwig Koehler nag-ingon nga ang Hebreohanong pulong nga ʽa·ghurʹ naghubit sa usa ka langgam nga ‘magpabukad o magpatindog sa mga balhibo niini’ ug nag-ingon labot sa tagbaya nga “inighunong (sa pag-awit niini) pabukaron niini . . . sa popanahon ang nagsiwil nga samag-tapay nga mga balhibo nga anaa sa tangkugo niini.” (Kleine Lichter [Aleman], Zurich, 1945, pp. 38, 39) Dili sama sa malanog nga tingog sa crane, ang awit sa tagbaya maoy samag tingog sa plawta ug gihubit ingong kombinasyon sa pagtuwit-tuwit ug paghoni.

Si Jeremias (8:7) lagmit nagtumong sa popanahong pag-abot sa nagalalin nga mga langgam sa iyang pagbadlong sa mga Israelinhon tungod kay wala nila hatagig pagtagad ang panahon sa paghukom sa Diyos kanila.