Ang nipis nga panit o tipaka sa mga lugas sama sa sebada ug trigo. Bisan tuod ang mga paghisgot sa Bibliya bahin sa tahop maoy mahulagwayon, kini nagpadayag sa naandang mga paagi sa paggiok nga komon sa karaang kapanahonan. Human sa pag-ani, kining dili-makaon nga panit nga nagputos sa bililhong lugas wala nay pulos, ug busa maoy usa ka haom nga simbolo sa usa ka butang nga gaan, walay bili, ug dili tilinguhaon, usa ka butang nga angayng ilain gikan sa maayo ug igasalibay.

Una, pinaagi sa paggiok ang tahop matangtang gikan sa lugas. Dayon pinaagig pagpalid, ang gaan nga tahop mapadpad sa hangin sama sa abog. (Tan-awa ang PAGPALID.) Kini haom nga nag-ilustrar kon sa unsang paagi si Jehova nga Diyos nagkuha sa mga apostata gikan sa iyang katawhan ug usab nagpapha sa daotang mga tawo ug sa kaawayng mga nasod. (Job 21:18; Sal 1:4; 35:5; Isa 17:13; 29:5; 41:15; Os 13:3) Ang Gingharian sa Diyos magdugmok sa mga kaaway hangtod sa pagkapolbos nga tungod niana sila dali ra kaayong ipadpad sama sa tahop.​—Dan 2:35.

Ang walay-bili nga tahop kasagarang tigomon ug sunogon aron kini dili na mapadpad ug balik ug masagol sa gipundok nga lugas. Sa susama, si Juan nga Tigbawtismo nagtagna sa nagsingabot nga kalayonhong kalaglagan sa daotan nga bakakong mga relihiyonista​—ang Tiggiok, si Jesu-Kristo, magtigom sa trigo, “apan ang tahop iyang sunogon sa kalayo nga dili mapalong.”​—Mat 3:7-12; Luc 3:17; tan-awa ang PAGGIOK.