Ang kinadak-an sa Hebreohanong mga sukod sa gibug-aton ug sa kantidad. (Ex 38:29; 2Sa 12:30; 1Ha 10:10; 2Ha 23:33; 1Cr 29:7; 2Cr 36:3; Esd 8:26) Gibanabana pinasukad sa katumbas niini nga 60 ka mina o 3,000 ka siklo (Ex 38:​25, 26; tan-awa ang MINA), ang usa ka talanton motimbang ug 34.2 kg. Sa modernong bili ang usa ka talanton nga plata mokantidad ug $6,606.00 ug ang usa ka talanton nga bulawan mokantidad ug $385,350.00.

Sanglit ang mina maoy katumbas sa 100 ka Gregong drakma sa unang siglo K.P., ang usa ka talanton nga 60 ka mina motimbang ug 20.4 kg, nga kubos kay sa talanton sa kapanahonan sa Hebreohanong Kasulatan. Busa, sa modernong bili, ang usa ka talanton nga plata sa unang siglo mokantidad ug $3,924.00, ug ang usa ka talanton nga bulawan mokantidad ug $228,900.00.

Sa pagbanabana sumala sa Gregong sukdanan, ang simbolikong mga ulan nga yelo nga motimbang ug mga usa ka talanton (20.4 kg; 44.8 lb), ingon sa gihisgotan sa Pinadayag 16:​21, maoy usa gayod ka malaglagong hampak.