Ang mga gihisgotan sa Bibliya bahin sa talo dayag nga nagtumong sa talo sa mga putyokan, usa ka lugom-dalag nga substansiya nga gamiton sa mga putyokan sa paggamag mga bungbong alang sa mga lawak sa udlan diin ilang ibutang ang dugos ug ang mga ulod pa nga putyokan. Ang talo himoon sa trabahante nga mga putyokan, ug human mokaon ug daghang dugos, sila maghimo ug talo pinaagi sa espesyal nga mga glandula sa sulod sa ilang mga tiyan. Ang talo ipalugwa agi sa gagmitoyng mga buhobuho sa ilang tiyan ug mahimong daw gagmayng puti nga mga tipik diha sa gawas sa tiyan. Unya, ang mga tipik sa talo kan-on sa putyokan, diin kini usapon sa dili pa gamiton sa pagtukod sa ilang balayan.  Ang mga putyokan maoy magkontrolar sa gidaghanon sa himoong talo ug ayha pa kini maghimo kon ang suplay gikinahanglan.​—Tan-awa ang PUTYOKAN.

Ang talo dali rang ilain gikan sa dugos pinaagi sa pagtunaw niini diha sa mainit nga tubig. Tungod niini ang talo molutaw sa ibabaw sa tubig, diin kini mahimong hapawon. Ang pagkatunaw sa talo gigamit diha sa mga sambingay sa Kasulatan aron ipahayag ang masulub-ong kahimtang sa kasingkasing (Sal 22:14), ang pagkatunaw sa mga kabukiran ug sa kapatagan (Sal 97:5; Miq 1:4), ug ang pagkalaglag sa mga kaaway sa Diyos; ang salmista mipatugbaw: “Ingon sa talo nga matunaw tungod sa kalayo, mahanaw unta ang mga daotan gikan sa atubangan sa Diyos.”​—Sal 68:​1, 2.