[Kahoyng Palma].

1. Umagad nga babaye ni Juda nga anak ni Jacob. Si Tamar naminyo kang Er nga panganayng anak ni Juda, apan si Jehova nagpatay kang Er tungod sa iyang pagkadaotan, ug tungod niana nabalo si Tamar. Unya gihatag kaniya si Onan, apan gipatay ni Jehova si Onan tungod kay wala niya tumana ang kahikayan sa kaminyoon sa bayaw nga lalaki, ug si Tamar nagpabilin gihapong balo nga walay anak. Si Juda naglangaylangay sa paghatag kang Tamar sa iyang ikatulong anak. Si Tamar wala magpaila ug nagtakoban nga usa ka pampam aron si Juda makigdulog kaniya, ug sa malinglahong paagi siya nagkuha sa timbre nga singsing, kordon, ug sungkod ni Juda ingong garantiya. Sa dihang nasayran ni Juda nga si Tamar nagmabdos, sa sinugdan siya nagsugo nga sunogon si Tamar human nga siya batohon. (Itandi ang Jos 7:​15, 25.) Apan sa pagkasayod nga siya ang amahan niini tungod sa pagmaniobra ni Tamar nga makapatunghag manununod, si Juda mipatugbaw, “Matarong pa siya kay kanako.” Human sa malisod nga pagpahimugso, si Tamar nakapatunghag kaluha, si Perez ug Zera. (Gen 38:6-30) Ang kaliwatan sa kagikan sa Mesiyas masubay pinaagi sa anak ni Tamar nga si Perez.​—Ru 4:​12, 18-22; 1Cr 2:4; Mat 1:3.

2. Usa ka matahom nga anak nga babaye ni Haring David ug pursosong igsoon ni Absalom. (1Cr 3:9; 2Sa 13:1) Ang iyang kamagulangang igsoon-sa-amahan nga si Amnon naibog pag-ayo kaniya ug pinaagi sa kamalansison milampos sa pag-among-among kaniya, bisan pag siya midumili. Si Absalom naghupay kaniya, nagpapuyo kaniya sa iyang balay, ug duha ka tuig sa ulahi nanimalos alang kang Tamar pinaagi sa pagpapatay kang Amnon.​—2Sa 13:1-33.

3. Anak nga babaye ni Absalom, lagmit gingalan kini kaniya pinasukad sa ngalan sa iyang iyaan (Num. 2). (2Sa 14:27) Sama sa iyang amahan, si Tamar matahom kaayo. Lagmit naminyo siya kang Uriel, ug tungod niana siya nahimong inahan sa pinalabing asawa ni Rehoboam nga si Maaca.​—2Cr 11:​20, 21; 13:​1, 2.

4. Usa sa mga siyudad nga gitukod (lagmit gitukod pag-usab o gipalig-on) ni Haring Solomon. (1Ha 9:​17-19) Ang Tamar gihisgotan sa 1 Hari 9:18 nga “didto sa yuta,” nga tatawng nagpakita nga kini makaplagan sa teritoryo sa Israel. Si Yohanan Aharoni nag-ingon nga ang Tamar mao ang ʽAin Husb (ʽEn Hazeva), mga 30 km (20 mi) sa HHK sa Patayng Dagat. Ang iyang pasikaranan niini mao ang pagtandi sa mga latid sa utlanan sa Canaan nga makaplagan sa Numeros 34:​3-6; Josue 15:​1-4; ug Ezequiel 47:19; 48:28.

Bisan tuod ang katumbas nga teksto sa 2 Cronicas 8:4 mabasa nga “Tadmor,” kini tatawng naghisgot sa laing siyudad, usa nga kasagarang gituohan nga mao ang Palmyra.​—Tan-awa ang TADMOR.