Ang usa nga naghatag ug tambag maoy usa ka magtatambag. Ang iyang girekomendar nga buhaton mao ang tambag.

Sa daghang Hebreohanon ug Aramaiko nga mga pulong nga gigamit sa Kasulatan aron ipahayag ang ideya sa “tambag,” mas sagad nga makita ang Hebreohanong nombre nga ʽe·tsahʹ ug ang kaamgid nga berbong ya·ʽatsʹ. Bisan tuod sagad gihubad nga “tambag,” ang ʽe·tsahʹ gihubad usab nga “laraw.” (Isa 8:10) Sa Kristohanon Gregong Kasulatan, ang konsepto sa “tambag” ingong usa ka nombre gipahayag pinaagi sa pulong nga bou·leʹ ug sym·bouʹli·on. Ang bou·leʹ gihubad usab nga ‘laraw’ (Luc 23:51; Buh 5:38), “gimbut-an” (Buh 13:36), ug ‘hukom’ (Buh 27:42).

Busa ang terminong “tambag” mahimong magtumong usab sa “kabubut-on,” “katuyoan,” “hukom,” “laraw,” sama sa dihang si Jehova nagpahayag: “Ang akong kaugalingong laraw mobarog.” (Isa 46:10) Ang “mga katuyoan sa mga kasingkasing,” sa ato pa, ang mga plano, laraw, o mga hukom, sa kinahiladman sa usa ka tawo mao ang ipadayag sa dihang si Ginoong Jesu-Kristo moabot aron sa pagpahamtang ug paghukom. (1Co 4:5) Sa Efeso 1:​11, ang prase nga “sumala sa gilaraw sa iyang kabubut-on” (sa literal, “sumala sa tambag sa iyang kabubut-on”) mahimong sabton nga nagkahulogang “sumala sa katuyoan, o hukom, nga maoy usa ka kapahayagan sa kabubut-on sa Diyos.” Si apostol Pablo miingon nga siya nahigawas sa pagkasad-an sa dugo tungod kay siya wala magpugong sa pagtudlo “sa tanang gimbut-an sa Diyos” (“sa katibuk-an sa katuyoan sa Diyos,” JB; “sa katibuk-ang kabubut-on sa Diyos,” NIV), buot ingnon, sa tanang butang nga hinungdanon alang sa kaluwasan.​—Buh 20:27.

Ang mga tawo nga nailhan tungod sa ilang kaalam gitamod pag-ayo ingong harianong mga magtatambag. (Tan-awa ang 2Sa 16:23.) Tungod sa ilang katungdanan, usahay sila hiphipan aron ilang gamiton ang ilang impluwensiya sa daotang paagi. Sa dihang ang mga kaaway sa mga Hudiyo nagsuhol ug mga magtatambag, lagmit ilang gihimo kini pinaagi sa paghiphip sa mga Persianhon nga nag-alagad sa maong kapasidad.​—Esd 4:5.

Walay usa ka tawo nga tinubdan sa tanang kahibalo. Busa, ang tawo nga maminaw sa maayong tambag maoy maalamon. (Pr 12:15) Ang pagsalikway sa usa ka tawo sa maayong tambag sa eksperyensiyadong mga magtatambag, sama sa gihimo ni Haring Rehoboam, maoy dako gayod nga kabuangan.​—1Ha 12:8.

Si Jehova mao ang tag-iya sa kaalam sa absoluto nga diwa. Siya lamang ang wala magkinahanglan ug magtatambag. (Isa 40:13; Rom 11:34) Ang iyang Anak makahimo sa pag-alagad ingong “Kahibulongang Magtatambag,” nga maghatag ug giya ug direksiyon, tungod kay siya nakadawat ug misunod sa tambag gikan sa iyang Amahan ug nakabaton sa espiritu sa Diyos. (Isa 9:6; 11:2; Ju 5:​19, 30) Kini nagpasiugda nga aron ang tambag mahimong mapuslanon, kinahanglan nga tagdon si Jehova. Ang bisan unsang tambag nga supak sa Labing Hataas maoy walay pulos. Sa pagkatinuod kini dili gayod usa ka tambag.​—Pr 19:21; 21:30.