[Heb., ʽaq·ravʹ; Gr., skor·piʹos].

Usa ka gamayng hayop (usa ka arachnid, wala ilakip sa mga biologo uban sa mga insekto) nga giklasipikar sa samang grupo sa mga lawalawa. Apan, dili sama sa ubang mga arachnid, ang baye nga tanga manganak inay nga mangitlog.

Ang mga tanga may walo ka tiil; may taas, yagpis nga ikog nga may mga seksiyon nga ang tumoy may baliko ug malala nga ikot o pangtusok; ug may usa ka paris nga sipit nga kaamgid sa mga sipit sa mga banagan ug may sensitibo kaayo nga mga balhibo. Ang ikog kasagaran isahon ug ipabaliko nga paatubang ibabaw sa iyang likod ug iwarawara sa bisan diin nga direksiyon. Gamiton sa tanga ang iyang ikot ingong depensa ug aron sa pagdakop usab sa iyang tukbonon. Ang biktima dakpon pinaagi sa mga sipit niini ug dayon, kon gikinahanglan, paakon kini hangtod mamatay. Ingong hayop nga mogula panahon sa kagabhion, ang tanga magpalabay sa tibuok adlaw nga magtago sa ilalom sa mga bato, diha sa mga liki ug mga gawang sa mga bilding, ug bisan sa ilalom sa mga banig ug mga higdaanan, ug mogawas sa kagabhion aron mokaon ug mga lawalawa ug mga insekto.

Sa kapin sa 600 ka matang sa mga tanga, nga kasagarang may gidak-ong halos 2.5 sm (1 pul.) hangtod sa 20 sm (8 pul.), may mga usa ka dosena ka matang ang makaplagan sa Palestina ug Sirya. Bisan tuod ang pinaakan sa tanga kasagarang dili makapatay sa mga tawo, may ubay-ubayng matang nga ang kalala mas grabe kay sa kalala sa daghang peligrosong mga bitin sa desyerto. Ang hilabihan kalala nga mga tanga nga makaplagan sa Israel mao ang dalagon nga Leiurus quinquestriatus. Ang hilabihan kasakit nga pinaakan sa tanga gihisgotan diha sa Pinadayag 9:​3, 5, 10, diin ang simbolikong mga dulon gihubit nga nagbaton ug awtoridad nga “sama sa awtoridad nga gihuptan sa mga tanga sa yuta” ug may katakos sa pagsakit sa mga tawo sama sa “tanga inigpaak niini sa tawo.”

Ang mga tanga kasagarang makaplagan diha sa Kamingawan sa Juda ug sa Peninsula sa Sinai lakip sa “makalilisang nga kamingawan” niini. (Deu 8:15) Ang usa ka tungasanan diha sa HS nga utlanan sa Juda, nga nahimutang sa HK sa habagatang tumoy sa Patayng Dagat, gitawag gani ug Akrabim (nagkahulogang “Mga Tanga”).​—Num 34:4; Jos 15:3; Huk 1:36.

Sa 1 Hari 12:​11, 14 ug 2 Cronicas 10:​11, 14, ang Hebreohanong termino nga ʽaq·rab·bimʹ, nga gihubad nga “mga tunokong panglapdos,” sa literal nagkahulogan nga “mga tanga.” Ang gigamit sa pagkastigo nga gihisgotan dinhi lagmit maoy usa ka lapdos nga hait ug mga tumoy.

Sa pag-ilustrar nga ang iyang langitnong Amahan mohatag ug balaang espiritu niadtong mangayo kaniya, gipunting ni Jesu-Kristo nga ang usa ka tawhanong amahan dili mohatag sa iyang anak ug usa ka tanga kon siya mangayo ug itlog. (Luc 11:​12,  13) Ngadto sa 70 ka tinun-an nga iyang gipadala, si Jesus naghatag ug awtoridad ibabaw sa makadaot nga mga butang, nga gihawasan sa mga halas ug mga tanga.​—Luc 10:19; itandi ang Eze 2:6.