Usa ka siyudad nga may malig-ong torre. Sa dihang giilog ni Abimelek ang Tebes ug misulay siya sa pagsunog sa torre nga gidangpan sa katawhan, ang usa ka babaye naghulog diha kaniya ug usa ka pang-ibabaw nga bato sa galingan gikan sa ibabaw sa paril. Kay nabuak ang iyang bagolbagol sa dihang naigo niini, gisugo ni Abimelek ang iyang tig-alagad sa pagpatay kaniya aron walay makaingon, “Babaye ang nakapatay kaniya.”​—Huk 9:50-54; 2Sa 11:21.

Gituohan nga ang Tebes lagmit mao ang modernong Tubas, mga 15 km (9.5 mi) sa AAS sa Sekem, bisan tuod nga walay nakaplagan nga nahibiling mga timailhan nga mohaom sa kahubitan niini.