[lagmit gikan sa Babilonyanhon, nga nagkahulogang “Ihalas nga Kanding”].

1. Amahan ni Abraham, ang ikawalo nga kaliwatan gikan kang Sem. (Luc 3:34; Gen 11:10-24; 1Cr 1:24-26) Si Tera, pinaagi sa iyang mga anak nga si Abraham, Nahor, ug Haran, nahimong katigulangan sa daghang tribo. (Gen 11:27; 22:20-24; 25:1-4, 13-15; 1Cr 1:28-42; 2:​1, 2) Si Tera nagsugod sa pagkabaton ug mga anak sa dihang siya nag-edad ug 70. Si Abraham ang unang gitala tungod kay siya ang labing inila sa mga anak ni Tera ug dili tungod kay siya ang panganay. Sa dihang namatay si Tera sa edad nga 205, si Abraham 75 anyos lamang, busa si Tera lagmit 130 sa dihang natawo si Abraham. (Gen 11:​26, 32; 12:4) Si Sara maoy igsoon-sa-amahan ni Abraham, lagmit anak nga babaye ni Tera sa laing asawa. (Gen 20:12) Ang panganay ni Tera lagmit mao gayod si Haran, kansang anak nga babaye husto nag panuigon aron magminyo sa laing anak ni Tera nga si Nahor.​—Gen 11:29.

Si Tera nagpuyo sa Ur sa mga Caldeanhon, ug didto nagdako ang iyang pamilya. (Gen 11:28) Sumala sa Josue 24:​2, dihay panahon nga si Tera misimba sa ubang mga diyos gawas kang Jehova,  tingali sa diyos-bulan nga si Sin, ang pinalabing bathala sa Ur. Bisan pa niana, sa dihang gisugo ni Jehova si Abraham nga mobiya sa Ur, si Tera ingong ulo sa pamilya mikuyog ngadto sa Haran diin silang tanan namuyo hangtod human sa iyang kamatayon niadtong mga 1943 W.K.P.​—Gen 11:​31, 32; Buh 7:2-4.

2. Usa sa mga gikampohan sa panahong ang Israel naglatagaw sa kamingawan; ang nahimutangan niini wala mahibaloi.​—Num 33:​27, 28.