Mga diyos o mga idolo sa pamilya. (Gen 31:​30, 34) Bisan tuod plural, ang ngalang “terapim” mahimong magtumong usab sa usa ra ka idolo. Labing menos ang pipila niini nga mga idolo tingali samag gidak-on ug porma sa usa ka tawo. (1Sa 19:​13, 16) Ang uban lagmit mas gagmay, nga masulod ra gani sa pangmonturang bukag nga pangbabaye. (Gen 31:34) Usahay ang terapim maoy konsultahon alang sa mga tilimad-on.​—Eze 21:21; Zac 10:2.

Ang mga nakaplagan sa mga arkeologo sa Mesopotamia ug sa kasikbit nga mga dapit nagpakita nga ang paghupot ug mga larawan nga terapim adunay kalabotan sa kon kinsa ang makadawat sa panulondon sa pamilya. Sumala sa usa ka papan nga nakaplagan sa Nuzi, ang pagbaton sa mga diyos sa panimalay ubos sa pipila ka sirkumstansiya mahimong maghatag ug katungod sa usa ka umagad nga lalaki sa pag-atubang sa korte ug sa pag-angkon sa kabtangan sa iyang namatayng ugangang lalaki. (Ancient Near Eastern Texts, giedit ni J. Pritchard, 1974, pp. 219, 220, ug ftn 51) Tingali si Raquel, nga naghunahuna niini, nagtuo nga siya may katarongan sa pagkuha sa terapim tungod sa malimbongong mga pakiglabot sa iyang amahan ngadto sa iyang bana nga si Jacob. (Itandi ang Gen 31:14-16.) Ang kahinungdanon sa terapim maylabot sa mga katungod sa panulondon magpatin-aw usab kon nganong si Laban buot gayod nga makuha kinig balik, nga gani gipakuyog ang iyang mga igsoong lalaki uban kaniya ug gigukod si Jacob sa gilay-ong pito ka adlaw nga panaw. (Gen 31:19-30) Siyempre, ang gibuhat ni Raquel wala gayod mahibaloi ni Jacob (Gen 31:32), ug walay timailhan nga siya misulay gayod sa paggamit sa terapim aron maangkon ang panulondon gikan sa mga anak nga lalaki ni Laban. Si Jacob wala mogamit ug mga idolo. Ang terapim lagmit nga lakip sa mga gidispatsar sa dihang gitagoan ni Jacob ang tanang langyawng mga diyos nga gihatag kaniya sa iyang panimalay didto sa ilalom sa dakong kahoy duol sa Sekem.​—Gen 35:1-4.

Didto sa Israel ang terapim gigamit sa idolatrosong paagi sa mga adlaw sa mga Maghuhukom ingon man sa mga hari. (Huk 17:5; 18:​14, 17, 20; Os 3:4) Apan ang terapim lagmit wala gamita labot sa panulondon sa Israel tungod sa tin-awng sugo sa Diyos batok sa paghimog mga larawan. (Ex 20:4) Dugang pa, ang manalagnang si Samuel naghisgot sa terapim uban sa mahikanhong gahom, nga nagtandi sa paggamit niining duha ngadto sa pagkamapangahason (1Sa 15:23), ug ang terapim maoy lakip sa mga butang nga nalangkit sa idolatriya nga giwagtang didto sa Juda ug Jerusalem sa matinumanon nga si Haring Josias. (2Ha 23:24) Busa, tungod kay si Mikal nga asawa ni David nagbaton man ug larawan nga terapim lakip sa iyang mga kabtangan, kini nagpaila nga ang iyang kasingkasing dili bug-os kang Jehova ug nga si David lagmit wala mahibalo bahin sa iyang pagbaton ug larawan nga terapim o kaha nagtugot niini tungod kay siya anak nga babaye ni Haring Saul.​—1Sa 19:​12, 13.