Duha ka inspiradong mga sulat sa Kristohanon Gregong Kasulatan, lagmit mao ang una nga gisulat ni apostol Pablo, kinsa nagpaila sa iyang kaugalingon ingong magsusulat niining duha ka sulat. (1Te 1:1; 2:18; 2Te 1:1; 3:17) Sa panahon nga gisulat kining mga sulata, si Silvano (Silas) ug Timoteo kauban ni Pablo. (1Te 1:1; 2Te 1:1) Kini nagpunting sa Corinto nga mao ang dapit nga gikan niini gipadala ang maong mga sulat, sanglit walay rekord nga kining tulo ka lalaki nagkauban na usab sa paghago diha sa ministeryo human sa ilang pag-estar sa Corinto panahon sa ikaduhang misyonaryong panaw ni Pablo. (Buh 18:5) Sanglit ang 18-ka-bulan nga buluhaton sa apostol didto sa Corinto mopatim-awng nagsugod sa tinghunlak sa 50 K.P., lagmit nianang panahona usab gisulat ang  unang sulat ngadto sa mga taga-Tesalonica. (Buh 18:11; tan-awa ang KRONOLOHIYA [Ang ulahing apostolikanhong yugto].) Dayag nga iyang gisulat ang ikaduhang sulat wala madugay human niana, lagmit sa mga 51 K.P.

Sa tanang ilado nga mga katalogo sa ikaduha, ikatulo, ug ikaupat nga mga siglo K.P., kining duha ka sulat gilista ingong kanonikal. Kini usab bug-os nga kaharmonya sa ubang bahin sa Kasulatan sa pagpahimangno sa mga alagad sa Diyos nga magpadayon sa paghupot ug maayong panggawi sa tanang panahon. Niini nga mga sulat makaiikag usab ang pagpasiugda bahin sa pag-ampo. Si Pablo, lakip sa iyang mga isigkamagbubuhat, kanunayng nahinumdom sa mga taga-Tesalonica diha sa pag-ampo (1Te 1:2; 2:13; 2Te 1:​3, 11; 2:13), ug ang apostol nagdasig kanila: “Pag-ampo nga walay-hunong. Pagpasalamat sa tanang butang.” (1Te 5:​17, 18) “Mga igsoon, magpadayon sa pag-ampo alang kanamo.”​—1Te 5:25; 2Te 3:1.

Mga Detalye sa Unang Tesalonica. Halos sukad sa sinugdan ang kongregasyon nga gipadad-an sa Unang Tesalonica nakasinati ug paglutos. Human makaabot sa Tesalonica, si Pablo nagwali sa sinagoga didto sulod sa tulo ka Igpapahulay. Ubay-ubayng mga tawo ang nahimong mga magtutuo, ug natukod ang usa ka kongregasyon. Apan, ang panatikong mga Hudiyo nagsugnib sa usa ka magubtanong panon sa paghimog kapintasan. Kay wala makaplagi si Pablo ug Silas sa balay ni Jason, ang magubtanong panon nagtaral kang Jason ug sa ubang mga igsoon ngadto sa atubangan sa mga magmamando sa siyudad, nga nag-akusar kanila ug pag-alsa sa pamunoan. Gibuhian lamang si Jason ug ang uban sa dihang sila mihatag ug “igong piyansa.” Tungod niini ang mga igsoon naaghat sa pagpagikan kang Pablo ug Silas ngadto sa Berea panahon sa kagabhion, dayag nga alang sa kaayohan sa kongregasyon ug sa kahilwasan niining duha ka lalaki.​—Buh 17:1-10.

Human niana, gawas pa sa nagpadayon nga paglutos (1Te 2:14), ang kongregasyon mopatim-awng nakasinati ug dakong kasubo tungod sa pagkamatay sa usa (o sa pipila) sa ilang mga kauban. (4:13) Kay nasayod sa pagpig-ot nga midangat sa bag-ong kongregasyon ug nahingawa pag-ayo bahin sa mga epekto niini, gipadala ni Pablo si Timoteo aron sa paghupay ug sa pagpalig-on sa mga taga-Tesalonica.  Una pa niana ang apostol misulay sa pagduaw kanila sa duha ka higayon, apan ‘si Satanas miali sa iyang alagianan.’​—2:17–​3:3.

Kay nakadawat sa makapadasig nga taho ni Timoteo bahin sa pagkamatinumanon ug gugma sa mga taga-Tesalonica, si Pablo nalipay. (1Te 3:6-10) Apan, sila nagkinahanglan ug dugang pagdasig ug pahimangno sa pagpakigbugno sa mga kahuyangon sa unod. Tungod niini si Pablo, gawas sa paghatag ug komendasyon sa mga taga-Tesalonica tungod sa ilang matinumanong paglahutay (1:2-10; 2:14; 3:6-10) ug sa paghupay kanila pinaagi sa paglaom sa pagkabanhaw (4:13-18), nag-awhag kanila sa pagpadayon sa pagsubay sa samang dalan nga giuyonan sa Diyos ug sa pagbuhat niana nga mas bug-os pa. (4:​1, 2) Ang apostol, lakip sa ubang mga butang, nagtambag kanila nga ayran ang pakighilawas (4:3-8), higugmaon ang usag usa sa mas bug-os pa, magtrabaho ginamit ang ilang mga kamot (4:9-12), magtukaw sa espirituwal nga paagi (5:6-10), tamdon silang naghago taliwala kanila, ‘pahimangnoan ang mga badlonganon, hupayon ang magul-anong mga kalag, buligan ang mga maluya, magmataas-ug-pailob sa tanan,’ ug ‘ayran ang tanang dagway sa pagkadaotan’ (5:11-22).

Mga Detalye sa Ikaduhang Tesalonica. Ang pagtuo sa mga Kristohanon sa Tesalonica milambo pag-ayo, nag-uswag ang ilang gugma sa usag usa, ug sila nagpadayon sa paglahutay nga matinumanon sa paglutos ug sa kasakitan. Busa, si apostol Pablo, sama sa iyang unang sulat, naghatag kanila ug komendasyon ug nagdasig kanila nga magpadayon sa pagbarog nga malig-on.​—2Te 1:3-12; 2:13-17.

Apan, ang pipila sa kongregasyon nangatarongan sa sayop nga paagi nga ang presensiya ni Jesu-Kristo nagsingabot na. Lagmit diha pa ganiy usa ka sulat nga giingong iya kuno ni Pablo ug kini gisabot nga nagpailang “ang adlaw ni Jehova ania na.” (2Te 2:​1, 2) Lagmit nga mao kini ang hinungdan kon nganong ang apostol nagpasiugda sa pagkatinuod sa iyang ikaduhang sulat, nga nag-ingon: “Ania ang akong pangomosta, ni Pablo, sa akong kaugalingong kamot, nga maoy usa ka ilhanan sa matag sulat; ingon niini ang paagi sa akong pagsulat.” (3:17) Kay dili buot nga ang mga igsoon mahaylo sa pagdawat sa sayop nga pagtulon-an, gipakita ni Pablo nga adunay ubang mga panghitabo nga kinahanglan unang mahitabo sa dili pa moabot ang adlaw ni Jehova. Siya misulat: “Kini dili moabot gawas kon ang apostasya moabot una ug ang tawo sa kalapasan mapadayag.”​—2:3.

Usa ka suliran nga naglungtad na kanhi sa kongregasyon ang kinahanglang hatagan gihapon ug pagtagad. Sa iyang unang sulat ngadto sa mga taga-Tesalonica, gisultihan sila ni Pablo: “Kami nag-awhag kaninyo, mga igsoon, . . . himoon ninyong tumong nga magkinabuhing malinawon ug magtagad sa inyong kaugalingong kalihokan ug magtrabaho ginamit ang inyong mga kamot, ingon sa among gisugo kaninyo; aron kamo magalakaw nga may kahapsay labot sa mga tagagawas ug dili  manginahanglan sa bisan unsa.” (1Te 4:10-12) May pipila diha sa kongregasyon nga wala mamati niini nga pahimangno. Busa si Pablo nagsugo sa maong mga tawo nga magtrabaho nga malinawon ug mokaon sa pagkaon nga ilang gihagoan, ug nagdugang: “Apan kon adunay dili magmasinugtanon sa among pulong pinaagi niining sulata, timan-i ninyo siya, hunong na sa pagpakig-uban kaniya, aron siya maulaw. Hinuon ayaw siya isipa nga kaaway, kondili magpadayon sa pagpahimangno kaniya ingong igsoon.”​—2Te 3:10-15.

[Kahon sa panid 1286]

MGA PANGUNANG PUNTO SA UNANG TESALONICA

Pagdasig ug tambag alang sa medyo bag-o pa nga kongregasyon

Gisulat ni Pablo niadtong mga 50 K.P., pipila ka bulan human nga siya mibiya sa Tesalonica tungod sa kapintasan nga gihimo sa magubtanong panon

Komendasyon alang sa kongregasyon (1:1-10)

Mainitong gikomendahan ni Pablo ang mga taga-Tesalonica tungod sa ilang matinumanong buhat ug paglahutay

Ang mga taga-Tesalonica nahimong usa ka panig-ingnan ngadto sa ubang mga magtutuo maylabot sa pagdawat sa pulong ubos sa kasakitan ug uban sa kalipay nga gipatungha sa espiritu sa Diyos

Sa bisan diin gitaho kon sa unsang paagi gibiyaan nila ang idolatriya ug nagpaulipon sa buhing Diyos ug nagpaabot kang Jesus

Ang panig-ingnan ni Pablo sa dihang anaa sa ilang taliwala (2:1-12)

Human pasipad-i didto sa Filipos, si Pablo nakabaton ug kusog gikan sa Diyos ug nagwali nga maisogon ngadto sa mga taga-Tesalonica

Si Pablo naglikay sa pag-ulog-ulog, hakog nga pangibog, ug pagpangitag himaya

Siya naglikay nga mahimong pabug-at ngadto sa mga igsoon, apan hinunoa malumong nagtratar kanila sama sa usa ka nagpasusong inahan ug nagtambag kanila sama sa usa ka mahigugmaong amahan

Pagdasig nga magpabiling lig-on atubangan sa paglutos (2:13–​3:13)

Human makadawat sa mensahe nga gimantala ngadto kanila ingong pulong sa Diyos, ang mga igsoon sa Tesalonica gilutos sa ilang isigkalungsoranon; ang samang mga butang nahitabo didto sa Judea, diin ang mga Kristohanon nag-antos sa mga kamot sa mga Hudiyo

Nagtinguha pag-ayo si Pablo nga makita ang mga taga-Tesalonica; tungod sa iyang kabalaka nga wala nay balita bahin kanila, iyang gipadala si Timoteo, ug si Timoteo bag-o pa gayong mibalik uban ang maayong balita bahin sa ilang espirituwal nga kahimtang

Si Pablo nag-ampo alang sa ilang padayong pag-uswag

Pahimangno bahin sa tinamdan ug panggawi (4:1–5:28)

Lakaw nga mas bug-os pa sa paagi nga makapahimuot sa Diyos; ayri ang pakighilawas

Higugmaa ang mga igsoon nga mas bug-os pa; magtrabaho pinaagi sa inyong mga kamot aron bisan ang mga tawo sa gawas makakita nga kamo nagalakaw nga mahapsay

Hupaya ang usag usa pinaagi sa paglaom nga sa presensiya ni Kristo ang gianak-sa-espiritung mga magtutuo nga namatay na maoy unang pagabanhawon ug mahiusa uban kang Kristo; human niana kadtong buhi pa mahiuban kaniya ug sa mga binanhaw

Ang adlaw ni Jehova moabot sama sa kawatan​—sa dihang sila moingon: “Kalinaw ug kasegurohan!” moabot ang kalit nga kalaglagan; tungod niini, magpabiling magtukaw sa espirituwal nga paagi, nga gipanalipdan pinaagi sa pagtuo ug gugma ingong kotamaya ug pinaagi sa paglaom sa kaluwasan ingong helmet

Magbaton ug lalom nga pagtamod alang niadtong nagadumala sa kongregasyon; magmakigdaiton, tinguhaa ang maayo, kanunayng magmaya, magpasalamat, tinoa ang tanang butang, pangupti pag-ayo ang maayo, ug ayri ang pagkadaotan

[Kahon sa panid 1287]

MGA PANGUNANG PUNTO SA IKADUHANG TESALONICA

Usa ka sulat sa pagtul-id sa usa ka sayop nga panglantaw bahin sa presensiya ni Kristo ug sa pagtambag kon unsaon pagtratar ang mga tawong badlonganon

Gisulat ni Pablo wala madugay human sa iyang unang sulat ngadto sa mga taga-Tesalonica

Ang kahupayan moabot inigpadayag na ni Kristo (1:1-12)

Ang mga taga-Tesalonica gikomendahan tungod sa ilang paglahutay ug pagtuo bisan pa sa mga paglutos ug kasakitan

Ang kahupayan moabot inigpadayag na ni Kristo; unya si Jesu-Kristo, inubanan sa gamhanang mga manulonda, molaglag niadtong wala mosunod sa maayong balita ug mahimaya may kalabotan sa iyang mga balaan

Si Pablo nag-ampo nga ang mga taga-Tesalonica isipon untang takos aron nga ang ngalan ni Ginoong Jesus mahimaya diha kanila

Ang tawo sa kalapasan ipadayag sa dili pa moabot ang presensiya ni Kristo (2:1-17)

Ang mga taga-Tesalonica gipahimangnoan nga dili matugaw o makuratan sa bisan unsang mensahe nga nag-ingon nga ang adlaw ni Jehova midangat na kanila

Ang apostasya kinahanglang moabot una, ug ang tawo sa kalapasan kinahanglang mapadayag; siya magpataas sa iyang kaugalingon ibabaw sa tanang butang nga ginasimba ug magpakita sa iyang kaugalingon ingong usa ka diyos

Sa dihang siya nga nagsilbing pugong mawala na, ang malinapason ipadayag, siya kansang presensiya gitiman-an pinaagi sa bakak nga mga ilhanan ug sa matag dili-matarong nga panglimbong aron malimbongan kadtong pagalaglagon

Si Jesu-Kristo magawagtang kaniya inigpadayag sa iyang presensiya

Kon unsaon pagtratar ang mga tawong badlonganon (3:1-18)

Magpahilayo gikan sa mga badlonganon, niadtong nanghilabot sa mga butang nga wala silay labot, niadtong wala manumbaling sa sugo nga: “Kon adunay dili buot magtrabaho, ayaw usab siya pakan-a”

Timan-i ninyo ang maong mga tawo nga kanila dili angayng makig-uban, apan tambagi sila ingong mga igsoon aron ilang mabag-o ang ilang mga dalan