Usa ka magwawali sa ebanghelyo o maayong balita; usa ka mensahero sa butang nga maayo. Ang Gregong eu·ag·ge·li·stesʹ (tig-ebanghelyo) suod nga nalangkit sa pulong nga eu·ag·geʹli·on, “maayong balita” o “ebanghelyo.” (Tan-awa ang MAAYONG BALITA; usab ang Nah 1:​15, ftn sa Rbi8; Mat 4:​23, ftn sa Rbi8.) Si Jehova mao ang Dakong Tig-ebanghelyo, o Tigdala sa maayong balita. Human makasala si Adan, usa ka maayong balita ang pagkasayod nga diha sa Genesis 3:15 adunay gihisgotan nga binhi nga modugmok sa ulo sa halas. Naghatag kini ug paglaom sa katawhan. (Rom 8:20) Sa paghatag ug dugang detalye bahin sa gisaad nga binhi ngadto kang Abraham, si Jehova nagpahayag ug maayong balita ngadto kaniya. (Gal 3:8; Gen 12:1-3) Gitagna sa Isaias 52:7 nga adunay usa nga ‘magdalag maayong balita’ bahin sa pagpasig-uli sa mga Hudiyo gikan sa Babilonya. Kini nga teksto gikutlo ni apostol Pablo maylabot sa buluhaton sa mga Kristohanon sa pagwali. (Rom 10:15) Ang manulonda nga si Gabriel nahimong tig-ebanghelyo kang Zacarias sa dihang gipahibalo ang maayong balita bahin sa umaabot nga pagkatawo ni Juan nga Tigbawtismo ug ingon man usab kang Maria bahin sa umaabot nga pagkatawo ni Jesus. Usa ka manulonda ang nahimong tig-ebanghelyo ngadto sa mga magbalantay sa kahayopan sa dihang natawo si Jesus. (Luc 1:18-38; 2:10) Si Juan nga Tigbawtismo maoy usa ka tig-ebanghelyo, kay girekord nga siya “nagpadayon sa pagpahayag sa maayong balita ngadto sa mga tawo.” (Luc 3:18) Ang tanang tinun-an ni Jesus nakigbahin sa publikong ministeryo sa pagmantala sa maayong balita ug busa maoy mga tig-ebanghelyo.​—Buh 8:4.

Linaing Misyonaryong mga Tig-ebanghelyo. Bisan tuod ang tanang Kristohanon gisugo nga mahimong mga tig-ebanghelyo, kini nga pulong gigamit sa linaing paagi diha sa Efeso 4:​8, 11, 12, diin si Pablo naghubit sa “mga gasa nga mga lalaki” nga gihatag ni Kristo ngadto sa kongregasyon sa dihang siya misaka sa itaas: “Ug iyang gihatag ang pipila ingong mga apostoles, ang pipila ingong mga manalagna, ang pipila ingong mga tig-ebanghelyo, ang pipila ingong mga magbalantay ug mga magtutudlo, . . . alang sa pagpalig-on sa lawas ni Kristo.” Ang espesipikong buluhaton sa maong mga tig-ebanghelyo maoy sama nianang sa mga misyonaryo. Sagad nga sila ang magbukas sa bag-ong mga natad diin ang maayong balita wala pa ikawali kanhi. Ang mga tig-ebanghelyo nag-una sa mga magbalantay ug mga magtutudlo diha sa talaan sa Efeso 4:​11, tungod kay human ikawali ang maayong balita ug diha nay nahimong mga tinun-an, ang mga magbalantay ug mga magtutudlo mao ang mohimog dugang pagpalig-on nga buluhaton sukad nianang panahona.

Si Felipe maoy usa nga ilabinang gihisgotan ingong usa ka tig-ebanghelyo. Iyang gisugdan ang buluhaton human sa Pentekostes didto sa siyudad sa Samaria nga may dakong kalamposan. Si Felipe gitultolan sa usa ka manulonda sa pagwali sa maayong balita mahitungod kang Kristo ngadto sa Etiopianhong eunuko, kinsa iyang gibawtismohan. Dayon si Felipe gidala sa espiritu aron sa pagwali didto sa Asdod ug sa tanang siyudad paingon sa Cesarea. (Buh 8:​5, 12, 14, 26-40) Si Pablo mihimog kaylap nga pag-ebanghelyo. (2Co 10:13-16) Si Timoteo maoy usa ka tig-ebanghelyo, o misyonaryo, ug gipasiugda pag-ayo ni Pablo ang pag-ebanghelyo sa dihang iyang gihatag ang iyang panamilit nga pagdasig kang Timoteo: “Apan, ikaw, maghupot ug maayong panghunahuna sa tanang butang, antosa ang daotan, himoa ang buluhaton sa usa ka tig-ebanghelyo, tumana sa bug-os ang imong ministeryo.” Si Timoteo, kinsa nakig-ambit duyog sa ubang mga Kristohanon sa pagwali sa maayong balita, nagbuhat usab sa buluhaton sa pagkamagbalantay ug pagkamagtutudlo ingong usa ka magtatan-aw sa Efeso.​—2Ti 4:5; 1Ti 1:3.

Ang Pag-ebanghelyo sa “Panahon sa Kataposan.” Ang labing sangkad nga pag-ebanghelyo nga kinahanglang pagahimoon pa maoy sa “panahon sa kataposan,” sumala sa gipahayag ni Jesus sa Mateo 24:14: “Kining maayong balita sa gingharian igawali sa tibuok gipuy-ang yuta . . . ug unya moabot ang kataposan.” Sa presenteng panahon ang mga nasod adunay mga misyonaryo alang sa ekonomiya, politika, ug medisina, ug sa susama niini. Apan ang mga Kristohanon nailalom sa sugo sa pagwali bahin sa Gingharian sa Diyos ug sa paghimog mga tinun-an ni Jesu-Kristo. (2Ti 4:2; 1Co 9:16; 1Pe 1:​12, 25; 4:17) Ang manulonda nga naglupad sa kinatung-an sa langit nga adunay walay kataposang maayong balita mipahayag: “Kahadloki ninyo ang Diyos ug ihatag kaniya ang himaya, kay ang takna sa iyang paghukom miabot na, ug busa simbaha ninyo ang Usa nga maoy naghimo sa langit ug sa yuta ug sa dagat ug sa mga tuboran sa mga tubig.” (Pin 14:​6, 7) Kini mao ang maayong balita nga igawali sa Kristohanong tig-ebanghelyo o misyonaryo. Maingon nga ang Bibliya naghubit sa pipila ka tawo, sama kang Felipe nga tig-ebanghelyo, ingong mga misyonaryo o mga tig-ebanghelyo diha sa usa ka linain nga diwa, mahimong buhaton sa pipila ka Kristohanon karong adlawa ang buluhatong pagmisyonaryo diha sa linain nga diwa, bisan gani sa pag-adto sa laing mga nasod aron sa pagwali. (Buh 21:8) Bisan pa niana, ang tanang Kristohanon gisugo ug giobligar nga  mahimong mga tig-ebanghelyo bisan asa sila, nga tungod niana sila mowali sa maayong balita ngadto sa tanang matang sa mga tawo.​—Rom 10:​9, 10.