Usa ka tawong nagabantay batok sa posibleng pagdaot sa mga tawo o sa propiedad, sagad sa panahon sa kagabhion, ug lagmit nga magpasidaan batok sa naghulgang kapeligrohan. Sa serbisyo militar ang usa ka tigbantay sagad gitawag nga guwardiya.​—Jer 51:​12, ftn sa Rbi8; Buh 12:6; 28:16; tan-awa ang BANTAY, GUWARDIYA.

Ingong panalipod batok sa mga kawatan ug sa mga tigdaot, ang mga tigbantay sagad gipapuwesto aron sa pagbantay sa nagkahinog nga mga parasan o sa mga panon sa kahayopan, nga tingali mopuwesto diha sa mga balongbalong o sa habog nga bantayanang mga torre nga gitukod alang niana nga katuyoan. (2Ha 17:9; 2Cr 20:24; Job 27:18; Isa 1:8) Ang naglikos nga kasundalohan nga miatake sa kinutaang mga dapit adunay mga tigbantay o mga guwardiya nga maghatag ug mga kasayoran labot sa militaryong kalihokan ngadto sa ilang mga komandante. (Jer 51:12) Sa dihang si Haring Saul didto sa kampo sa kapatagan uban sa iyang kasundalohan, siya usab may personal nga mga tigbantay kansang responsibilidad mao ang pagseguro sa kaayohan sa ilang hari.​—1Sa 14:16; 26:​15, 16.

Ang mga tigbantay sagad gipuwesto ibabaw sa mga paril ug mga torre sa siyudad aron makita kadtong nagsingabot sa dili pa sila magkaduol. (2Sa 18:24-27; 2Ha 9:17-20) Usahay ang mga tigbantay mosuroy usab sa kadalanan palibot sa tibuok siyudad. (Aw 3:3; 5:7) Ang nangahadlok nga mga tawo, nga nagmata sa peligrosong mga oras sa kagabhion, lagmit sublisubling mangutana sa mga tigbantay kon maayo ra ba ang tanan (Isa 21:​11, 12), ug natural lamang sa mga tigbantay nga mangandoy nga moabot ang kabuntagon. (Sal 130:6) Malipayon ang siyudad nga gawas pa nga kini adunay mga tigbantay, gibantayan usab kini ni Jehova.​—Sal 127:1.

Mahulagwayong Paggamit. Si Jehova nagpatindog ug mga manalagna nga mag-alagad ingong mahulagwayong mga tigbantay sa nasod sa Israel (Jer 6:17), ug sila usab naghisgot usahay labot sa mga tigbantay diha sa simbolikong paagi. (Isa 21:​6, 8; 52:8; 62:6; Os 9:8) Kining mga manalagna-nga-tigbantay may kaakohan sa pagpasidaan sa daotan labot sa nagsingabot nga kalaglagan, ug kon sila mapakyas sa pagpasidaan, sila ang may tulubagon. Siyempre, kon ang mga tawo dili mosanong ug mapakyas sa pagpamati sa pasidaan, ang ilang dugo mahianha kanila. (Eze 3:17-21; 33:1-9) Ang usa ka dili-matinumanong manalagna maoy walay-pulos sama sa usa ka buta nga tigbantay o sa usa ka amang nga iro.​—Isa 56:10.